"தேனார் திருவரங்கம்" என்பதற்கான உரை:
"வண்டினம் முரலும் சோலை" என்று ஸ்ரீ தொண்டரடிப்பொடி ஆழ்வாரால் புகழப்படும் திருவரங்கம், பல பூஞ்சோலைகளால் சூழப்பட்டது. அப்பூஞ்சோலைகளுள் உள்ள மலர்கள் யாவும் தேனைச் சிந்திக்கொண்டு இருக்கும். இது திருவரங்கத்தின் இனிமைக்கு ஒரு சான்று. திருவரங்கத்து எந்தையை மகான்கள் சென்று வணங்கும்போது, அவ்வூரில் உள்ள சோலைகளையும் சேர்த்தே வணங்குவர் என்பதை 'ஸ்ரீ 6000 படி குரு பரம்பரா பிரபாவம்' மற்றும் 'ஸ்ரீ யதீந்த்ரப்ரவண பிரபாவம்' ஆகிய நூல்களில் காணலாம்.
இது மட்டுமின்றி, மற்ற அனைத்து திவ்யதேசங்களும் திருவரங்கத்திற்குச் சோலைகள் போலவாம். அந்தத் திவ்யதேசங்கள் ஆகிய மலர்ச்சோலைகளால் சூழ்ந்து விளங்கும் திருவரங்கம் "ஆராமம் சூழ்ந்த அரங்கம்" என்று கொண்டாடப்படுகின்றது.
அரங்கத்தம்மா! பள்ளி எழுந்தருளாயே!
|
|
ஸ்ரீ தொண்டரடிப்பொடியாழ்வார் - திருப்பள்ளியெழுச்சி - பாசுரம் # 1
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
உரையில் ஆசாரியர் தெரிவிப்பது - ஒரு சிறு பொழிப்புரை:
திருவரங்கத்தில் பள்ளிகொண்டுள்ள பெருமானே! பல கோடி நூறாயிரம் ஆதவர்கள் ஒன்றாக உதித்தது போல உனது திருமுகமண்டலம் உள்ளது. நீ திருவடியை வைத்திருக்கும் கிழக்குப் பக்கத்தின் உச்சிக்கு, இரவின் கடும் இருளைப் போக்கிக் கொண்டு, உன்னைத் தொழ ஆதவன் வந்துவிட்டான். நீ எழுந்தவுடன் மங்கலமான திருவிளக்கை ஏற்றி உனக்கு நல்விடிவு சொல்லி வாழ்த்த, அவன் தன்னுடைய கதிர்களால் உலகெங்கும் ஒளியைப் பரப்பியுள்ளான்.
உன்னைத் தொழுவதற்கு மிகவும் ஏற்றதான காலை நேரம் வந்துவிட்டதால், பூந்தோட்டங்களால் சூழப்பட்டத் திருவரங்கத்தில், சிறந்த பூக்களில் தேன் வடிகிறது.
உன்னுடைய திருக்கண்கள் நோக்கும் தெற்குத் திசையில், ஒருவரையொருவர் தள்ளிக்கொண்டு, தேவர்களும் அரசர்களும் முழு இடத்தையும் நிரப்பிக்கொண்டு நிற்கிறார்கள். உன்னுடைய இணைபிரியா அன்னமாகிய ஸ்ரீரங்கநாயகியுடன் நீ எங்களுக்கு அருள் பாலிக்கின்றாய். அதே போல, உன்னை வணங்க ஆண் மற்றும் பெண் யானைகள் [இவை தேவர்கள், மன்னர்கள் போன்றவர்களின் வாகனங்கள்] ஒன்று சேர்ந்து கூடியுள்ளன. இசைக்கருவிகளை வாசிப்பவர்களின் பெரிய குழுக்களும் வந்துள்ளன.
உனது திவ்ய தரிசனத்தை ஆவலுடன் எதிர்பார்த்து, அனைத்து திசைகளையும் அடையும் ஒலிகள் யாவும் கடுமையான அலைகள் கொண்ட கடலின் பெரும் ஒலியை ஒத்திருக்கின்றன.
எனவே, அரங்கத்தம்மா! நீ இப்போது திருப்பள்ளி எழுந்தருளவேண்டும்!
|
பகுதி 2 - திருவரங்கனுடைய மேன்மை
|
செங்கோல் உடைய திருவரங்கச் செல்வனார்
|
|
ஆழ்வார் திருமகளார் ஆண்டாள் - நாய்ச்சியார் திருமொழி - பாசுரம் # 11-3
|
|
|
|
ஆசாரியர் ஸ்ரீ பெரியவாச்சான் பிள்ளை உரை - சுருக்கம்
|
| |
"பொங்கோதம் சூழ்ந்த புவனியும் விண்ணுலகும் அங்காதும் சோராமே ஆள்கின்ற எம்பெருமான் செங்கோல் உடைய திருவரங்கச் செல்வனார்" என்பதற்கான உரையில் ஆசாரியர் அருளுவதாவது:
திருவரங்கன் இரண்டு செல்வங்கள் உடையவன்:
1. பொங்கோதம் சூழ்ந்த புவனி என்பது பிரம்மாண்டத்தின் எல்லையில் உள்ள ஆவரணக் கடல் நீரால் சூழப்பட்ட ஈரேழு பதினான்கு உலகங்கள் - இவை பிரளயத்திற்கு உட்பட்ட "லீலா விபூதி" எனப்படும். இது ஒரு செல்வம்.
2. விண்ணுலகம் என்பது பிரளயத்திற்கு உட்படாமல், என்றும் மாறாத, குற்றமேதும் இல்லாத பரமபதம் [எ] வைகுந்தம் - இது "நித்ய விபூதி" எனப்படும். இது மற்றொரு செல்வம்.
ஒரு செங்கோலை வைத்து, இந்த இரண்டு செல்வங்களும் சோராமல், திருவரங்கன் ஆட்சி புரிகின்றான். இப்புவனியில் வாழும் உயிரினங்களுக்கு, அவைகளின் கண், காது, மூக்கு, நாக்கு, தோல் ஆகியவற்றால் அடையும் இன்ப துன்பங்களை அனுபவிக்கும்படிச் செய்து ஆள்கின்றான். வைகுந்தத்தில் வாழும் அமரர்கள் யாவரையும், அவர்கள் விரும்பிச் செய்யும் திருப்பணிகளை ஏற்றுக்கொண்டு ஆட்சி புரிகின்றான்.
நாம் பரமபதம் செல்லவேண்டும் என்று விரும்பினாலும் கூட, அதற்கு முதலில் திருவரங்கனின் திருவுள்ளம் இசையவேண்டும்!
|
திருவரங்கனே தசாவதாரங்களின் தோற்றுவாய்
|
|
ஸ்ரீ பெரியாழ்வார் - பெரியாழ்வார் திருமொழி - பாசுரம் # 4-9-9
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
இப்பாசுரத்தின் முதல் 4 வரிகளுக்கும் ஆசாரியர் அருளிய உரை:
தேவுடைய: "தேசு" - "ஒளி உடைய" என்று பொருள். வல்வினையின் காரணமாகப் பிறக்கும் நாம், பிறக்கப் பிறக்க, ஒளியை இழக்கின்றோம். நல்லோர்களைக் காக்கவும் [அதற்காகத் தீயோர்களை அழிக்கவும்] தோன்றும் பிறவா ஆக்கைப் பெரியோனான எம்பெருமான், தன் இச்சைப்படி இப்பூமியில் பிறக்கப் பிறக்க, அவனுடைய ஒளி கூடுகின்றது!
வேதங்களைக் காக்க மீனமாகவும், அலைகடல் கடைந்து அமுதம் எடுக்க ஆமையாகவும், பிரளய கால நீரில் மூழ்கிய பூமியைக் காக்க வராகமாகவும், இரணியனின் கொட்டத்தை அடக்க நரசிங்கமாகவும், மகாபலியிடம் இந்திரன் இழந்த செல்வத்தை மீட்க வாமனனாகவும், தீய அரசர்களைக் கொன்று பூமியின் பாரத்தைக் குறைக்கப் பரசுராமனாகவும், இராவணனை முடிக்கத் தயரத இராமனாகவும், தீயோரை அழிக்கப் பலராமனாகவும், பூமியின் பாரத்தைக் குறைக்கக் கண்ணனாகவும், கலியின் கொடுமையை ஒடுக்கக் கற்கியாகவும் யுகங்கள் தோறும் தோன்றுவது திருவரங்கனே.
முடிப்பான் கோயில் [புனல் அரங்கமே]: தீயோரை முடிப்பான் உறைகின்ற திருத்தலம் [நீர்வளம் மிக்கதாம் திருவரங்கம்]. மேற்கூறிய அவதாரங்கள் முடிந்த பின்பும், நம் போன்றோரும் அவனைத் தொழுவதற்காகத் திருவரங்கத்தில் பள்ளி கொண்டுள்ளான்.
|
பகுதி 3 - திருவரங்கனுடைய திருவருள்
|
|
ஸ்ரீ குலசேகராழ்வார் - பெருமாள் திருமொழி - பாசுரம் # 1-2
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
"மாயோனை மணத்தூணே பற்றி நின்று" என்பதற்கான அதிசயிக்கத் தக்க உரை:
திருவரங்கனுடைய திருவருளைப் பெறச் செல்வதற்கு முன்னால், நாம் ஸ்ரீ குலசேகராழ்வார் அருளும் ஒரு குறிப்பை நோக்கவேண்டும்:
திருவரங்கனின் திருமேனியில் உள்ள நறுமணம் 2 தூண்களாக அவனது சந்நிதி முன்னே நின்று அருள் பாலிக்கின்றனர்! இவற்றைத் "திருமணத்தூண்" என்று பெரியோர் அழைப்பர். "திருவரங்கனைத் தொழும் போது இந்தத் திருமணத்தூணைப் பற்றி நின்று தொழ வேண்டும்," என்று ஸ்ரீ குலசேகராழ்வார் அருளுகின்றார்.
ஏன் என்பதை ஆசாரியர் விளக்குகின்றார்: "திருவரங்கனைத் தொழும் போது, 'நமக்கு அருள் புரிய, தமது திருவுள்ளம் இரங்கி, பரந்தாமன் இறங்கி வந்தானே!' என்று அவன் அருளையும், எளிமையையும் நினைத்து நினைத்து நாமே உள்ளம் உருகி நிற்க, அவனுடைய திருக்கண்கள் நம் மீது பொழியும் அருள் வெள்ளம் பாய்ந்துகொண்டு வரும். அவ்வெள்ளத்தில் நாம் அடித்துக்கொண்டு போக வாய்ப்புள்ளது!! எனவே, இந்தத் திருமணத்தூணைப் பற்றி நின்றே திருவரங்கனைத் தொழ வேண்டும்!" என்று ஆழ்வார் முழங்குகின்றார்!
|
"திருவரங்கனுடைய திருவருள் வெள்ளம் நம்மை அடித்துக்கொண்டும் போகுமோ?" என்ற கேள்விக்கு விடை:
|
|
ஸ்ரீ பூதத்தாழ்வார் - இரண்டாம் திருவந்தாதி - பாசுரம் # 88
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
இப்பாசுரத்திற்கு ஆசாரியர் அருளிய உரை:
"திருவரங்கனின் திருவடிகளில் வாழ்ச்சியையும் [அதனால், வைகுந்த மாநகரைச் சென்றடைவதையும்] இழக்கும் மக்கள் இரண்டு வகையினர்:
1. அறியாமையால் எம்பெருமானிடம் வெறுப்பு பாராட்டியதால் இழப்பவர்
2. எம்பெருமானிடம் அன்பு பாராட்டியும், எம்பெருமான் நம்மை அடைய முயற்சி எடுக்கும்போது, அதைத் தள்ளிவிட்டு, அவனை அடைய தாமே [தவம், உபாசனை போன்ற வேறு வழிகளால்] முயற்சிப்பவர்! [நமது முயற்சியில் என்றுமே குற்றம் இருப்பது இயற்கை அன்றோ?]
அன்று, கீதையை உபதேசித்த கண்ணன், "என்னையே சரணம் அடைவாய்," என்று ஒரே ஒரு முறை அருளினான். நமக்காகவே திருவரங்கத்தில் கிடக்கும் எந்தையான திருவரங்கனோ, நாம் எல்லோரும் கிட்டும் வண்ணம் அர்ச்சைத் திருமேனியில் [விக்கிரக வடிவில்] எழுந்தருளி, "என்னையே சரண் அடைவாய்," என்று எப்போதும் சொல்லிக்கொண்டே இருக்கின்றான். இது எளிமையின் எல்லைநிலம்!
இதனால், தென்னரங்கத்து எந்தையான திருவரங்கனுடைய திருவருளால் திருவரங்கனை அடைவதே சிறந்தது. இதனை அறிந்தேன்!"
|
"நாம் ஒன்றுமே செய்யாமல் திருவரங்கன் தாமே அருள்வரோ?" என்ற கேள்விக்கு விடை:
|
|
ஸ்ரீ பொய்கையாழ்வார் - முதல் திருவந்தாதி - பாசுரம் # 6
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
இப்பாசுரத்திற்கான உரையில் ஆசாரியர் அருளியுள்ளவை:
திருவெஃகா திருத்தலத்துத் திருக்கோயிலின் பொற்றாமரைத் திருக்குளத்தில் மலர்ந்த ஒரு பொற்றாமரையில் உதித்தவர் ஸ்ரீ பொய்கையாழ்வார். இவர் அந்தத் தாமரையின் கருவில் இருந்தபோதே, திருவரங்கநாதன் தாமே வந்து ஆழ்வாருக்குக் காட்சியளித்து, அவருக்கு மயர்வற மதிநலம் அருளினன்.
இதனால், "உலகியலில் ஈடுபட்டு இருக்கும் ஏழைகளே! நான் தாமரை மலரின் கருவில் இருந்தபோது, அவன் பரமபதநாதனாகக் காட்சி அளிக்கவில்லை. தன்னுடைய எல்லையற்ற எளிமைக்குச் சான்றாக, திருவரங்கனாகவே காட்சியளித்தான்! நான் ஏதும் வேண்டாமலேயே காட்சியளித்தான்! திருவரங்கனுடைய அருளால், கருவில் இருந்தபோதே அவனைக் கைகளைக் கூப்பித் தொழும் பேறு பெற்றேன். அப்படி இருக்க, அக்காட்சியை இப்போது எப்படி மறப்பேன்? திருவரங்கத்துக் கடல்நீர்வண்ணனுடைய வடிவழகையும், அவனது நற்குணங்களின் கூட்டங்களின் பெருமைகளையும் எப்போதும் மறவேன்!" என்று ஆழ்வார் முழங்குகின்றார்.
|
"திருவரங்கன் ஆழ்வாருக்கு அருள்வார்! நமக்கு அருள்வாரோ?" என்ற கேள்விக்கும் விடை!
|
|
ஸ்ரீ திருமழிசை ஆழ்வார் - திருச்சந்தவிருத்தம் - பாசுரம் # 55
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
இப்பாசுரத்திற்கு ஆசாரியர் அருளியுள்ள உரை:
"சிறந்த தாமரை மலரில் வீற்றிருக்கும் திருமாமகளுக்கும், வையத்தை ஆளும் நிலமாமகளுக்கும் மிகவும் விருப்பமான இளங்காளையாக இருக்கின்றாய்! ஆயர்மாமகளான நப்பின்னைப் பிராட்டியின் திருத்தோள்களையும் அனுபவக்கின்றாய்! இப்படிப்பட்ட நிறை புகழ் மேன்மையை உடையவனான நீ, குற்றத்தையும் நற்றமாகக் கொள்ளும் உன் பெருங்குணத்தினால், அடியேன் போன்ற அற்பனின் நெஞ்சிலும் உன் திருவடிகளை வைத்து, அடியேனுக்கும் மிகப் பெரிய நன்மையை நல்கினாய்.
இந்த உதவியை அடியேனுக்கு மட்டுமே செய்யாமல், தாமரை போன்ற அங்கங்கள் உடையதும், அழகும், மென்மையும், குளிர்ச்சியும் நிறைந்ததும் ஆகிய உன்னுடைய தாமரைத் திருமேனியை எல்லோருக்கும் கொடுக்க, திருக்காவிரி சூழ்ந்த திருவரங்கத்தில் கிடக்கின்றாய்! என்னே உனது பெருங்குணம்!" என்று ஆழ்வார் உருகுகின்றார்.
"திருவரங்கனின் திருவருளைப் பெறச் சரணாகதி செய்யவேண்டும் அன்றோ?" என்ற கேள்விக்கு விடை:
|
|
ஸ்ரீ தொண்டரடிப்பொடியாழ்வார் - திருமாலை - பாசுரம் # 30
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
இப்பாசுரத்திற்கு ஆசாரியர் அருளியுள்ள உரையும் இப்பாசுரம் போலவே உள்ளத்தை உருக்கும் வண்ணம் உள்ளது:
"என் மனத்தில் என்னாளும், எக்கணமும் ஒரு சிறு துளியும் தூய்மை ஏதும் இல்லை. என்னுடைய வாக்கினால் ஒரு நல்ல சொல்லும் என்றும் சொன்னதில்லை - ஒருவரை "நலமா?" என்று விசாரித்தது கூட இல்லை! என்னுடைய மனதில் இருக்கும் தீய கோவங்கள் யாவும் என்னுடைய கண்ணில் வெளிப்படும் படி அனல் விழி விழித்து, எல்லோரும் அந்த அனல் பார்வையாலேயே பொசுங்கும்படி நோக்குபவனாய் உள்ளேன். இந்நிலையில், உன்னை அடைய என்னால் எந்த ஒரு முயற்சியும் செய்ய இயலாது. செய்தாலும், என் குற்றங்களால் அவை ஒன்றும் பலிக்காது. என் போன்றோருக்கும் அருள் புரிய திருக்காவிரியான பொன்னி சூழ்ந்த இந்தத் திருவரங்கத்தில் பள்ளி கொண்டுள்ளவனே! என் உயிரின் உரிமையாளனான திருவரங்கத்துக்கரசே! உன்னைத் தவிர அடியேனுக்கு வேறு கதி இல்லை, ஐயா!" என்று ஆழ்வார் அருளியுள்ளார்.
"நம்மிடம் எந்தக் கைமுதலும் இல்லை; அவனை அடைய நம்மால் முயன்று இயலாது; நாம் செய்யும் இந்தச் சரணாகதியும் அவனை அடைய ஒரு வழி அல்ல; அவனது அருள் ஒன்று மட்டுமே நமக்குத் தஞ்சம்," என்பதை உணர்ந்து, அதை வெளிப்படுத்தும் வண்ணம் திருவரங்கனின் திருத்தாள் பணிவதே சாலச் சிறந்ததாம்.
|
பகுதி 4 - குழல் அழகர் வாய் அழகர் கண் அழகர் கொப்பூழில் எழு கமலப் பூவழகர்!
|
திருவரங்கனுடைய கிடந்த திருக்கோலத்தின் எழில்
|
|
ஸ்ரீ தொண்டரடிப்பொடியாழ்வார் - திருமாலை - பாசுரம் # 19
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
இப்பாசுரத்திற்கு ஆசாரியர் வரைந்த உரை நம் பக்தியைச் சுய பரிசோதனை செய்து, சிந்திக்கத் தூண்டும் கருத்துக்கள் கொண்டது:
"திருவரங்கத்து எம்பெருமான் திசைகளைப் படைத்ததன் பயனே அவனது திருமுடியையும் திருவடியையும் அவைகளை நோக்கி வைத்து, நம் போன்றவர்களுக்கு மோட்சத்தில் ஆசை உண்டாக்கவே என்று உணர்ந்தேன்!
"மண்ணுலகுக்கும் விண்ணுலக்குகும் நாமே நாயகன்!" என்று வெளிப்படுத்தும் அவனது திருமுடியை மேற்குத் திசையில் உள்ளோர் வாழும்படி மேற்கில் வைத்தான். திருமுடி வைத்த பக்கம் வாழும் எல்லோரும் வாழ்ச்சி அடையும்போது, எல்லோருக்கும் அருள்வதற்கே இருக்கும் அவனுடைய திருவடியை நீட்டிய கிழக்கில் உள்ளவர்கள் வாழ்வார்கள் என்பதைச் சொல்லவும் வேண்டுமோ? வடமொழியில் பேசும் வடதிசையில் உள்ளோர் தீஞ்சுவைத் தமிழை அறியார் என்பதால் முன்பிலும் பின்பழகிய பெருமானான திருவரங்கன், தனது பின்னழகைக் காட்டி அவர்களை ஈர்க்கின்றான்!
திருவரங்கன் தெற்கு நோக்கி சயனித்து இருப்பது, தாய்ப்பசுவாகிய திருவரங்கனின் அன்புக் கன்றானச் செல்வ விபீடணனைக் காணவே! அன்று செல்வ விபீடணன் செய்த சரணாகதியை ஏற்ற திருவரங்கன், அவனுக்கு இலங்கை அரசை ஒப்புவித்து, ஒரு தாய் தன்னுடைய சேய் வாழ்வதைக் கண்டு மகிழ்வது போலவே, இலங்கை அரசைச் செல்வ விபீடணன் நன்கு ஆள்வதைத் திருவரங்கன் கண்டு களிக்கின்றான்.
கடலானது தன்னை நோக்குபவர்களின் களைப்பைப் போக்கும். அந்தக் கடலையும் கடந்த கடல் நிறக் கடவுள் ஆகிய திருவரங்கன், தங்கத்தில் பதித்த மணியைப் போலத் திருவனந்தாழ்வான் மீது பள்ளி கொண்டு, புலன்களுக்கு அடிமைப்பட்டிருந்த எனக்கும் தன்பால் ஆதரம் பெருக வைத்தான்! அவனது எழில் மிகு திருக்கோலத்தைக் கண்ட எனது உடல், நீராய் உருகுகின்றது. உலகத்தீரே! அவனைக் கண்டும் உங்கள் உடல்கள் உருகாமல் முடக்குவாதம் வந்ததுபோல இருக்கின்றீரே! இந்த இரகசியத்தை எனக்குச் சொல்லுங்கள்!"
|
திருவரங்கனுடைய திருவுருவம் - முன்பிலும் பின்பழகிய பெருமாள்!
|
|
ஸ்ரீ திருமங்கையாழ்வார் - திருநெடுந்தாண்டகம் - பாசுரம் # 25
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
நாயகி மனோபாவத்தில் ஸ்ரீ பரகால நாயகி தோழியிடம் பேசும் பாசுரம். உரையில் இதன் சுவை நன்கு வெளிப்படும் வண்ணம் ஆசாரியர் அருளியுள்ளார்:
- "கருத்த மழைமேகம் போல ஒளிவீசும் திருவுருவமும்,
- வந்து அடைந்தவருக்குப் புகலாக விளங்கி அவர்களைக் காக்கும் திருத்தோள்களும்,
- குவலயாபீடம் என்ற கம்சனின் யானையைத் தள்ளியே கொன்ற திருக்கைகளும்,
- அடியவர்கள் யாவரையும் 'ஆகா! இவற்றை அனுபவிக்க வேண்டுமே!' என்று மிகவும் பரவசப்படச் செய்யும் திருக்கண்களும்,
- அவரிடம் தன்னை இழந்த என்னிடம் 'நிச்சயம் வருவேன்!' என்று பேசிய திருவதரமும்,
- திருத்துழாய் மாலையை அணிந்த திருக்குழலும்,
- மகரநெடுங்குழைகளால் அலங்கரிக்கப்பட்ட திருக்காதுகளும்
உடைய திருவரங்கன், முன்பிலும் அழகியதான அவரது பின்னழகு நன்கு ஒளிவீசும்படி நடந்து, ஸ்ரீ கருடாழ்வாரின் மீது ஏறி, காண்போரின் களைப்பை நீக்கும் திருக்காவிரியால் சூழப்பட்ட புனல் அரங்கத்திற்குப் போனார்!
தோழி! அவர் நடந்து சென்றபோது ஒளி வீசிய அவரது பின்னழகை நீ காணவில்லை! தம்மிடம் உள்ளதையெல்லாம் கொடுப்பவர் போல வந்த அந்த முன்பிலும் பின்பழகிய பெருமாள், என்னிடம் உள்ளதையெல்லாம் எடுத்துக்கொண்டு சென்றார் காண்!"
|
திருவரங்கனுடைய பேதைமை செய்யும் திருக்கண்கள்
|
|
ஸ்ரீ திருப்பாணாழ்வார் - அமலனாதிபிரான் - பாசுரம் # 8
|
|
|
|
ஆசாரியர் ஸ்ரீ அழகிய மணவாளப் பெருமாள் நாயனார் உரை - சுருக்கம்
|
| |
இப்பாசுரத்தில் திருவரங்கனின் திருக்கண்களைப் போற்றும் வரிகளுக்கு மிக அழகான உரையை ஆசாரியர் வரைந்துள்ளார்:
"முகத்து:" திருவரங்கனின் திருமுகத்தில் உள்ள இரு திருக்கண்கள் சந்திர மண்டலத்தில் மலர்ந்த இரு தாமரை மலர்களைப் போலவும், ஒரு தாமரை மலரிலேயே மலர்ந்த இரு தாமரை மலர்களைப் போலவும் உள்ளன.
"கரியவாகி": அவற்றின் கரிய நிறம் பிறவிச் சுழற்சியின் தாபத்துடன் வந்தவருக்கு, முகத்தில் நீர்வெள்ளத்தைப் பாய்ச்சியது போலே, குளிர்ச்சி தருபவையாக உள்ளன.
"புடைபரந்து": கடலைத் தடாகமாக்கியது போல இருக்கும் அத்திருக்கண்கள், அந்தத் தடாகங்களின் இரு கரைகள் ஒன்றுக்கொன்று நல்ல தொலைவில் இருப்பது போல, நன்கு பரந்து விரிந்து உள்ளன.
"மிளிர்ந்து": "வந்து அடைந்தவர்களை அருள் புரிந்து காக்க வேண்டும்" என்ற திருவரங்கனின் திருவுள்ளத்தில் பொங்கும் கருணைக் கடல், அவனது திருக்கண்களில் அலைவீசிக் கொண்டிருப்பதால் அவை மிளிர்கின்றன!
"செவ்வரி ஓடி": அவன் திருமகள் கேள்வன் என்றும், நம் குற்றத்தையும் நற்றமாகக் கொண்டு உகப்பவன் என்றும் கோள் சொல்லிக் கொடுக்கும் வண்ணம் அவன் திருக்கண்கள் சற்றே சிவந்துள்ளன.
"நீண்ட": "புவியில் உள்ளோருக்கு அகப்படாமல், புலப்படாமல் எங்கோ அமர்ந்திருக்கும் ஸ்ரீ பரமபதநாதனுக்கும் இரண்டு திருக்கண்களாம். எல்லோரும் எளிதாகக் கிட்டிச் சென்று அடையும் படி, இங்கே வந்து பள்ளி கொண்டிருக்கும் திருவரங்கனுக்கும் இரண்டு திருக்கண்களாம்! இது சரியல்லவே. நாம் இருவரும் அவனது திருமேனி முழுவதும் படரவேண்டும்!" என்று எண்ணி திருவரங்கனின் திருக்கண்கள் இரண்டும் அவனது திருமேனி முழுவதும் பரவுவதற்கு நீள முயற்சித்துக் கொண்டிருக்கின்றன. திருவரங்கனின் திருக்காதுகள் வரை நீண்டு, அங்கே தடைபட்டு நிற்கின்றன," என்று ஆசாரியர் ஸ்ரீ பராசர பட்டரின் திருவாக்கு.
"அப்பெரியவாய கண்கள்": திருவரங்கனுடைய திருக்கண்களை மேலே வருணிக்க முடியாமலும், அவற்றைத் தாம் நோக்கினால் திருவரங்கனுக்குக் கண்ணெச்சில் [திருஷ்டி] ஏற்படுமோ என்ற அச்சத்திலும், தமது திருமுகத்தைத் திருப்பிக்கொண்டு, "அப்பெரியவாய கண்கள்" என்று ஆழ்வார் முடித்துக்கொள்கிறார்.
"என்னைப் பேதைமை செய்தனவே": "நீசனேன் நிறைவு ஒன்றும் இலேன்" என்று இருக்கும் என்னைக் கூடத் தம்மிடம் ஈர்த்த பெருமை உடைய திருக்கண்கள். திருவரங்கனின் திருக்கண்களின் கடாட்சம் அறிவைத் தெளிவிக்கும் என்றே சாத்திரங்கள் கூறுகின்றன. ஆனால், அடியேனது அறிவை மட்டும் கலக்கியது, காணீர்!
ஸ்ரீ மணக்கால் நம்பி என்கிற ஆசாரியர், ஸ்ரீ ஆளவந்தார் என்ற அவரது சீடரை, திருவரங்கன் முன்னே நிற்க வைத்து, "ஐயனே! திருப்பாணாழ்வாருக்கு உமது திருக்கண்ணழகைக் காட்டியது போல, இவருக்கும் காட்டி அருள வேண்டும்!" என்று வேண்ட, [அப்போது உலகியலில் ஈடுபட்டு இருந்த] ஸ்ரீ ஆளவந்தாருக்கு ஸ்ரீ பெரிய பெருமாள் தமது திருக்கண்களைக் காட்ட, அந்தக் கணமே ஸ்ரீ ஆளவந்தார் துறவறம் ஏற்றுக்கொண்டு, திருவரங்கித்தேலேயே வாழ்ந்து, பின்னர் ஸ்ரீ இராமானுசருக்கும் பரமகுருவாகித் திகழ்ந்தார்.
இதே போல, தமது மனைவியின் கண்ணழகில் மயங்கியிருந்த ஸ்ரீ பிள்ளை உறங்காவில்லி தாசர் என்பாருக்கு, ஸ்ரீ பெரிய பெருமாளின் திருக்கண்ணழகை ஸ்ரீ இராமானுசர் காட்டச் செய்ய, ஸ்ரீ பிள்ளை உறங்காவில்லி தாசரும் ஸ்ரீ பெரிய பெருமாளுக்குப் பல்லாண்டு பாடும் மெய்யடியார் ஆகி, ஸ்ரீ இராமானுசரின் திருவுள்ளத்தில் நீங்காத இடம் பெற்றார்.
|
பகுதி 5 - திருவரங்கன் திருமுற்றத்து அடியார்களின் பெருமை!
|
வண் குருகூர்ச் சடகோபன் முகில்வண்ணன் அடி மேல் சொன்ன சொல் மாலை!
|
|
ஸ்ரீ நம்மாழ்வார் - திருவாய்மொழி - பாசுரம் # 7-2-8
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
இப்பாசுரத்தின் உரை மிகவும் உருக்கமானது :
பாசுரத்தின் பின்னணி: திருவரங்கனைப் பிரிந்து இருக்கும் ஸ்ரீ நம்மாழ்வார் ஆகிய ஸ்ரீ பராங்குச நாயகியின் நிலை மிகவும் கவலை தருவதாக இருக்கின்றது - திருவரங்கனைக் காணமுடியாமல் நெருப்பில் இட்ட சிறு பறவையைப் போலத் துடிக்கின்றாள். பித்து பிடித்த நிலையில் இருக்கும் அவளால் பேசவும் முடியவில்லை. ஆதலால், அவளது தாய் திருவரங்கனைக் கேள்வி கேட்கின்றார்:
"நீ வைகுந்தத்தில் மிளிரும் வானவர்களுக்குக் கொழுந்து போல இருப்பவன். இது உன்னுடைய மேன்மையை வெளிப்படுத்துகின்றது. அன்று குன்றம் ஏந்தி ஆநிரைகளைக் [இந்திரன் பெய்த மழையைத் தடுத்துக்] காத்தாய். இது உன்னுடைய எளிமையை வெளிப்படுத்துகின்றது. அன்று ஆனிரைகளைக் காக்க இந்திரன் பெய்த மழையைத் தடுத்த நீ, இன்று என்னுடைய மகளின் கண்களில் பொழியும் மழையைத் தடுக்க ஏன் வரவில்லை?
அவள் உன்னை நோக்கி கைகளைக் கூப்பித் தொழவும் செய்தாள். நீ வரவில்லை. நீ வராததால் அவள் துடிதுடித்து, தன்னுடைய அனல் போன்ற வெப்பம் மிகுந்த பெருமூச்சினால், தனது உயிரையே [ஆன்மா] எரிக்க முயன்றாள். முடியவில்லை. அவளது பெருமூச்சின் வெப்பத்தைத் தணிக்க வல்ல உன்னுடைய மை போன்ற குளிர்ந்த திருமேனியைக் காட்டி அவளைக் காக்க நீ ஏன் வரவில்லை?
அவளோ நீ வரும் அந்த நொடியிலிருந்து உன்னைக் காண வேண்டும் என்று பத்துத் திசைகளிலும் நோக்கிக்கொண்டு இருந்தாள். நீ வரவே இல்லை.
நீ செங்கயல் பாயும் திருக்காவிரி ஆற்றினால் சூழப்பட்டிருக்கும் திருவரங்கத்தில் பள்ளி கொண்டது ஏன்? இவள் போன்ற ஒரு அடியாரைப் பெறுவதற்காகவே அன்றோ? நீ அவளைத் தேட வேண்டியிருக்க, அவள் உன்னைத் தேடும் படி வைத்தாயே! அடியேன் என்ன செய்ய முடியும்?
திருமாமகள் ஆகிய ஸ்ரீ மகாலட்சுமி உன்னைத் தவிர வேறு ஒருவரையும் விரும்பமாட்டாள். அதுவே அவளது பெருமை. என்னுடைய திருமகள் திருமாமகளுடன் என்றும் பிரியாமல் விளங்கும் திருமால் ஆகிய உன்னைத் தவிர வேறு ஒருவரையும் விரும்பமாட்டாள். இது அந்தத் திருமாமகளுக்கும் இல்லாத பெருமை அன்றோ? இப்படிப்பட்ட என் திருமகளை உன்னதாக்கிக் கொள்ள வேண்டாமா? விடை சொல்லாய், திருவரங்கா!"
இப்பேற்பட்ட ஒரு அருமையான அடியவரான ஸ்ரீ நம்மாழ்வாரின் அடி பணிந்து உய்ந்த ஸ்ரீ இராமானுசரே கதி என்கின்றனர் பெரியோர். அதனையும் காண்போம்.
|
தென்னரங்கன் செல்வம் முற்றும் திருத்தி வைத்த எம் ஐயன் இராமானுசன்!
|
|
ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 57
|
|
|
|
ஆசாரியர் ஸ்ரீ மணவாள மாமுனிகள் உரை - சுருக்கம்
|
| |
"[ஸ்ரீ நம்மாழ்வாராகிய ஸ்ரீ பராங்குச நாயகி போன்ற] திருவரங்கனின் திருவடிகளுக்கு மட்டுமே அடிமை செய்யும் ஒப்பற்ற அடியார்களையே தமக்கு உற்றவராகக் கொள்ளும் உத்தமர் ஸ்ரீ இராமானுசர்!" என்று திருவரங்கத்து அமுதனார் போற்றுகின்றார். "அப்படிப்பட்ட ஸ்ரீ இராமானுசருடைய இன்னருள் அடியேனுக்குக் கிடைத்தது. அதன்பின் வேறு ஒன்றை அடைய விரும்புவது பேதைமையே!" என்று முழங்குகின்றார்.
|
|
ஸ்ரீ மணவாள மாமுனிகள் - ஆர்த்தி பிரபந்தம் - பாசுரம் # 60
|
|
|
|
ஆசாரியர் ஸ்ரீ பிள்ளைலோகம் ஜீயர் உரை - சுருக்கம்
|
| |
ஸ்ரீ இராமானுசர் திருவரங்கனிடம், "அடியேனுடைய தொடர்பைப் பெற்றிருக்கும் அடியார்களுக்கும், அவர்களின் அடியார்களுக்கும் வீடுபேறு அருள வேண்டும்!" என்று ஒரு பங்குனி உத்திர நன்னாளில் சரணடைந்தார். தென்னரங்கச் செல்வம் முற்றும் திருத்தி வைத்த ஸ்ரீ இராமானுசர், ஸ்ரீ நம்மாழ்வார் போன்ற திருவரங்கனின் மெய்யடியார்களுக்கு மெய்யடியார். திருமாமகளாம் ஸ்ரீரங்கநாயகியின் பூரண அருள் பெற்ற தவராசர். அவர் கேட்கும் வரத்தைத் தென்னரங்கன் மறுப்பானோ? திருவரங்கனும் அந்தச் சரணாகதியை ஏற்றுக்கொண்டு, "நீ கேட்கும் வரம் தந்தோம்! இந்தத் திருவரங்கத்தில் எம்மை நம்பிச் சுகமாக வாழ்வாய்!" என்று அருளினார்.
இதனாலேயே, காரேய் கருணை இராமானுசர் அவருடைய திருவடிகளின் தொடர்பைப் பெற்ற அடியார்களுக்கு மோட்சம் அருளும் தெய்வமாகத் திகழ்கின்றார்.
தமது ஆசாரியன் ஸ்ரீ திருவாய்மொழிப்பிள்ளை காட்டிக் கொடுத்த தெய்வமான ஸ்ரீ இராமானுசரைப் போற்றும் ஸ்ரீ மணவாள மாமுனிகள், "இந்த வரம் எந்தை எதிராசருக்குக் [ஸ்ரீ இராமானுசருக்குக்] கொடுக்கப்பட்டதால், அவரது புதல்வனான அடியேனுக்கும் கொடுக்கப்பட்டது. தந்தையின் சொத்து புதல்வரையே சேரும் அன்றோ?" என்று கொண்டாடுகின்றார்.
இப்படிக் கொண்டாடும் ஸ்ரீ மணவாள மாமுனிகளின் பெருமையை உணர்ந்த அடியவர்கள், ஸ்ரீ மணவாள மாமுனிகளுடைய பொற்றாமரையடியே போற்றும் பொருள் கேட்போம், வாரீர்!
|
அரங்க நகர் வாழ மணவாள மாமுனியே இன்னுமொரு நூற்றாண்டிரும்!
|
|
ஸ்ரீ மணவாள மாமுனிகள் - ஆர்த்தி பிரபந்தம் - பாசுரம் # 55
|
|
|
|
ஸ்ரீ பிரதிவாதி பயங்கரம் அண்ணா - சாற்றுமுறை
|
|
|
|
ஆசாரியர் ஸ்ரீ பிள்ளைலோகம் ஜீயர் உரை - சுருக்கம்
|
| |
- திருவரங்கனாலேயே ஆசாரியராகக் கொள்ளப்பட்டவரும்
- தமது ஆசாரியருடைய கட்டளைப்படி, திருவரங்கத்திலேயே வாசம் செய்து, திருவரங்கனுக்குப் பல்லாண்டு பாடுபவரும்
- ஸ்ரீ நம்மாழ்வார் அருளிய திருவாய்மொழியை உணவாகப் பெற்றவரும், அந்தத் திருவாய்மொழியில் பொதிந்திருக்கும் "அடியார்க்கு அடிமை செய்தல்" என்பதையே தமது வாழ்வாகக் கொண்டவரும்
- பூருவாசாரியர்கள் அருளிய பொன்மொழிகளைத் தமது திருவுள்ளத்தில் தேக்கிவைத்து, அவற்றைக்கொண்டே பொழுது போக்கியவரும்
ஆகிய ஸ்ரீ மணவாள மாமுனிகளுடைய பொன்னடியாம் செங்கமலப் போதுகளுக்கு நாம் பல்லாண்டு பாடினால்:
- அடியார்கள் வாழ்வர்
- அரங்கநகர் வாழும்
- திருவாய்மொழி வாழும்
- [மேற்கூறிய காரணங்களால்] கடல் சூழ்ந்த மன்னுலகம் வாழும்
என்று [ஸ்ரீ வேங்கடேச சுப்ரபாதம் அருளிய] ஸ்ரீ பிரதிவாதி பயங்கரம் அண்ணா அறுதியிடுகின்றார்.
இதனால், அடியார்களும், அரங்க நகரும், திருவரங்கனும், திருவாய்மொழியும், கடல் சூழ்ந்த மன்னுலகும் வாழவேண்டும் என்று விரும்பும் பெரியோர்கள், திருவரங்கத்தில் எழுந்தருளியிருக்கும் ஸ்ரீ கோயில் மணவாள மாமுனிகளுக்குப் பல்லாண்டு பாடுவர்!
|
|
முடிவுரை
|
| |
'ஸ்ரீ எம்பெருமானார் தரிசனம்' என்று கொண்டாடப்படும் ஸ்ரீவைஷ்ணவத்தில், ஸ்ரீ பெரிய பெருமாள் என்று போற்றப்படும் ஸ்ரீ திருவரங்கனுடைய பெருமைகளை ஆழ்வார்களும், ஆசாரியர்களும் எவ்வாறு வெளியிட்டருளியுள்ளனர் என்பதைச் சில பாசுரங்கள் வாயிலாகச் சுவைத்தோம்.
இந்நீண்ட கட்டுரையைப் படித்த பின்பும் நாம் திருவரங்கனின் பெருமைகளுள் ஒரு சிறு துளியே சுவைத்துள்ளோம் என்பதே உண்மை. "பெரியோர்களின் இன்னருளால் இவ்வளவாகிலும் பெற்றோமே!" என்று கூறி ஸ்ரீ பெரிய பிராட்டியார் உடனுறை ஸ்ரீ பெரிய பெருமாளுக்கும், அந்த திவ்ய தம்பதிகளுக்குப் பல்லாண்டு பாடுவோருக்கும் பல்லாண்டு பாடுவோமாக.
பல்லாண்டு! பல்லாண்டு! பல்லாண்டு!
மணவாள மாமுனியே இன்னுமொரு நூற்றாண்டிரும்!
|
|
நன்றிகள் பல!
|
| |
பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்!
பொலிக! பொலிக! பொலிக!
|
ஆழ்வார்களும் ஆசாரியர்களும் போற்றும்
திருவேங்கடத்தான்
|
|
முன்னுரை
|
| |
ஸ்ரீ பெரியாழ்வார் "நீ பிறந்த திருவோணம் இன்று நீ நீராட வேண்டும்!" என்று அருளியபடியே திருப்புரட்டாசி திருவோணம் ஆகிய இன்று திருவவதார உற்சவம் கண்டருளும் திருவேங்கடவன் தீர்த்தவாரி நடத்திக்கொள்கின்றான்.
ஆழ்வார்களும் ஆசாரியர்களும் திருவேங்கடமாமலையை எவ்வாறு பெருமதிப்புடன் போற்றிப் பாடினர் என்பதைத் திருவேங்கடமாமலையின் பெருமை என்ற கட்டுரையில் விண்ணப்பம் செய்திருந்தேன்.
இக்கட்டுரையில் இன்று திருவவதார உற்சவம் கண்டருளும் திருவேங்கடவனை ஆழ்வார்களும் ஆசாரியர்களும் எவ்வாறு உள்ளம் உருக உருகப் பாடியுள்ளனர் என்பதை ஓரளவாகிலும் சுவைத்துத் தேனருவியில் நீராடுவோம், வாரீர்!
|
அர்ச்சாவதாரத்திற்குப் பொற்கால் பொலியவிட்ட இடம்!
|
|
ஸ்ரீ திருப்பாணாழ்வார் - அமலனாதிபிரான் - பாசுரம் # 1
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
"விண்ணவர்கோன் விரையார் பொழில் வேங்கடவன்" என்ற சொற்றொடருக்கு ஆசாரியர் அருளிய உரை:
"விண்ணவர்கோன்" ஆகிய ஸ்ரீ பரமபதநாதன், நம் போன்றவர்களுடனும் கலந்து பழக, திருவுள்ளம் இரங்கி, நம் கண்களுக்குப் புலப்படாத வைகுந்தத்திலிருந்து கீழே இறங்கினான். அப்போது அவனுடைய பொற்காலை முதலில் பதித்த இடம் எதுவெனில் நறுமணம் வீசும் சோலைகள் நிறைந்த திருவேங்கடமாமலை! அதன் பின்பே, திருக்காவிரிக்கும் கொள்ளிடத்திற்கும் நடுவே திருவரங்கநாதனாகப் பாம்பணையில் பள்ளி கொண்டான்.
எனவே, நாம் எளிதில் கிட்டிப் பழகச் சிலையாய் நின்று அருள் பாலிக்கும் "அர்ச்சாவதாரம்" என்ற நிலைக்குத் திருவேங்கடவனே முன்னோடியாம். ரிக் வேதமும் சங்கத் தமிழும் திருவேங்கடவனைப் போற்றிப் பாடுகின்றன.
|
திருவேங்கடவனின் பெருமையை உணர்வார் ஆர்?
|
|
ஸ்ரீ பொய்கையாழ்வார் - முதல் திருவந்தாதி - பாசுரம் # 68
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
ஸ்ரீ பொய்கையாழ்வார் அருளியதை ஆசாரியர் ஸ்ரீ நம்பிள்ளை உரையில் விளக்குகின்றார்:
- ஊழி தோறும் ஆராய்ந்தாலும், நீ பரம வைகுந்தத்தில் விண்ணகத்தானாக விளங்கும் பெருமையை உணர்வார் யார்?
- நீ விண்ணகத்தானாக இருந்தும் மண்ணில் வந்து பிறப்பதன் பெருமையை உணர்வார் யார்?
- இப்படி ஒப்பற்ற பெருமை வாய்ந்தவனாக இருந்தும், விண்ணவரும் மண்ணவரும் தொழலாம் படி நீ திருவேங்கடத்தில் நிற்பதன் பெருமையை உணர்வார் யார்?
- நீ நால்வேதப் பண்ணகத்தில் [இசைச் சுவரங்களுள்] விளங்குவதின் பெருமையை உணர்வார் யார்?
- நீ கிடக்கும் திருப்பாற்கடலின் பெருமையை உணர்வார் யார்?
ஞானத்திற்கு நீயே புகலிடம் என்றாலும் உன் பெருமையை - அப்பெருமை உன்னுடைய மேன்மையாக இருந்தாலும் சரி அல்லது உன்னுடைய எளிமையாக இருந்தாலும் சரி அல்லது உன்னுடைய கருணையாக இருந்தாலும் சரி - உள்ளபடி உணர்ந்தவர் எவரும் இலர்!
|
"சரி, இவ்வளவு பெருமை உடையவன் இறங்கி வந்துள்ளான் என்றாலும் நாம் சென்று அவனைக் கிட்டமுடியுமோ?" என்ற வினாவிற்கான விடை ஆழ்வார்களின் பாசுரங்களில் உள்ளது:
|
|
ஸ்ரீ பெரியாழ்வார் - பெரியாழ்வார் திருமொழி - பாசுரம் # 2-9-6
|
|
|
|
ஆசாரியர் ஸ்ரீ மணவாள மாமுனிகள் உரை - சுருக்கம்
|
| |
"வேதப் பொருளே! என் வேங்கடவா! வித்தகனே!" என்பதற்கான உரையில் ஆசாரியர் அருளியுள்ளவை:
"வேதப் பொருளாக இருந்தபோதும், 'என் வேங்கடவன்!' என்று உரிமையுடனும், அன்புடனும் நினைக்கும்படி திருவேங்கடமாமலையில் நிற்பவனே! [இந்த அற்புதமான குணத்தினால்] வியக்கத்தக்கவனே!" என்று ஆழ்வார் கொண்டாடுகின்றார்.
இதனால், திருவேங்கடவனின் மேன்மையைக் கண்டு நாம் மிரள வேண்டியதில்லை - அவன் வேதப் பொருளாக இருப்பினும் "என் வேங்கடவன்!" என்று நாம் சொல்லும்படி இருப்பவன், காணீர்!
|
|
ஆழ்வார் திருமகளார் ஆண்டாள் - நாய்ச்சியார் திருமொழி - பாசுரம் # 1-3
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
"கோவிந்தன் என்பதோர் பேரெழுதி வித்தகன் வேங்கடவாணன் என்னும் விளக்கினில்" என்பதற்கான உரை:
"மன்மதனே! உன்னுடைய மலர்க்கணையில் "ஆநிரை காத்தவனே கோவிந்தா! உன்னை பட்டர்பிரான் கோதை மிக விரும்புகின்றாள்!" என்று எழுதி அவன் நெஞ்சில் அம்மலர்க்கணைகள் தைக்கும் வண்ணம் செய்யவேண்டும். அவனுக்கும் என் மேல் அன்பு பிறந்து, எங்கள் திருமணம் இனிதே நடைபெறவேண்டும். அற்புதனான திருவேங்கடவன் என்ற விளக்கினில் நான் புகவேண்டும்! இதை நீ செய்ய வேண்டும்!"
ஆழ்வார் திருமகளார் ஆண்டாள் வேங்கடவாணனை [வேங்கடத்தில் வாழும் எம்பெருமானை] "விளக்கு" என்கிறாள்.
வைகுந்தவாசிகளுக்கு எம்பெருமானுடைய கருணை, எளிமை, குற்றத்தையும் நற்றமாக கொள்ளும் பண்பு போன்ற குணங்கள் தேவையே இல்லை - ஏனெனில், அவர்கள் ஞானத்தில் மிகச்சிறந்து, குற்றமற்றவர்களாய், பிறவி என்ற துன்பத்திற்கு ஆளாகாமல், ஒரு ஜீவாத்மா எங்கு இருக்க வேண்டுமோ அங்கு வாசம் செய்து, எம்பெருமானுக்குத் தொண்டு செய்துகொண்டிருக்கிறார்கள். இதனால், எம்பெருமான் வைகுந்தத்தில் பகலில் ஏற்றிய விளக்காக உள்ளான்.
இருள் சூழ்ந்திருக்கும் இந்த உலகத்திலேயே இப்பெருங்குணங்கள் யாவும் தேவைப்படுகின்றன. இவ்வுலகில் திருவேங்கடவனாக அவன் இருப்பதனால் அவன் அற்புதனாக, குன்றிலிட்ட விளக்காகத் திருவேங்கடமாமலை மீது ஒளி வீசுகின்றான்!
|
ஸ்ரீ பெரியாழ்வார் எம்பெருமானுக்குப் பல்லாண்டு பாடி, தமது திருமகளாரை எம்பெருமானுக்குத் திருமணம் செய்து கொடுத்து, அவனுக்கு மாமனாரானவர்.
ஆழ்வார் திருமகளார் ஆண்டாள் எம்பெருமானின் இனிய மணவாட்டி. அவள் சூடிக்கொடுத்த மாலையை அவன் சூடிக்கொள்வான்.
இவர்கள் இருவரும் எம்பெருமானை மிக எளிதாக அடைய முடியும். நம் போன்றவர்கள் அப்படிச் செய்ய இயலுமோ?" என்ற கேள்விக்கும் ஆழ்வார்களின் பாசுரங்கள் விடை அளிக்கின்றன.
|
|
ஸ்ரீ பூதத்தாழ்வார் - இரண்டாம் திருவந்தாதி - பாசுரம் # 72
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
பாசுரத்தின் உரையில் ஆசாரியர் அருளியவை:
"வைகுந்தவாசிகள் திருவேங்கடவனைத் தொழுகின்றார்கள். அதே போல, திருவேங்கடமாமலையில் வாழும் குரங்குகளும் எம்பெருமானைத் தொழுகின்றன!
அக்குரங்குகள், முனிவர்களைப் போல அதிகாலையில் எழுந்து, குளிரைப் பொருட்படுத்தாமல் அங்குள்ள சுனைகளில் நீராடி, அப்போது அலர்ந்த மலர்களைப் பறித்து, திருவேங்கடவனின் திருவடிகளில் அவற்றை இட்டுத் தொழுகின்றன!
என் உள்ளமே! திருவேங்கடவனின் இந்த எளிமையைக் கொண்டாடி, அக்குரங்குகளைப் போலவே நீயும் திருவேங்கடவனின் திருவடிகளில், அவனது திருநாமங்களைப் பாடிக்கொண்டே, தூமலர்களைத் தூவித் தொழுவாயாக!"
|
|
ஸ்ரீ பேயாழ்வார் - மூன்றாம் திருவந்தாதி - பாசுரம் # 70
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
பாசுரத்தின் உரையில் ஆசாரியர் அருளியவை:
அன்று, கஜேந்திரன் என்ற ஒரு யானையின் காலை முதலை பற்ற, யானையின் கூக்குரலைக் கேட்டு, அரை குலைய தலை குலைய வந்து, யானை அளித்த ஒரு தூய தாமரை மலரைப் பெற்றுக்கொண்டான்.
அதே போல, திருவேங்கடமாமலையில் வாழும் யானைகளும் தன்னை வணங்குமாறு ஞானத்தை அளிக்க வல்லவன் திருவேங்கடவன்.
திருவேங்கடமாமலையில் வாழும் யானையானது, தனது தலையில் பெருகும் மத நீரால் வாயைக் கொப்பளிக்கும். கீழே தேங்கி இருக்கும் மத நீரில் கால்களைக் கழுவும். செருக்குடன் பொய்கைக்குச் சென்று, மலர்களைக் கொய்து, அவற்றைத் திருவேங்கடவனுக்கு அளித்து வணங்கும்.
குலப்பிறப்பு, செயல்கள், தன்மை ஆகியவை எம்பெருமானுக்கு ஒரு பொருட்டல்ல என்பதை உணர இது போதாதோ?
|
"அறிந்தே பாவங்கள் செய்யாதவை என்பதால் நம்மைக் காட்டிலும் விலங்குகள் தூய மனங்கள் உடையவை. அதிலும், ஆழ்வார்களுடைய பாசுரங்களில் பேசப்படும் இவ்விலங்குகள் திருவேங்கடமாமலை மீது வாழும் பேறு பெற்றவை!
நமக்கோ மனத்தில் ஓர் தூய்மை இல்லை. வாயில் ஓர் இன்சொல் இல்லை. திருவேங்கடமாமலை மீது வாழும் பேறும் நாம் பெறவில்லை. இப்படி இருக்கையில், நாம் எவ்வாறு திருவேங்கடவனைப் பற்றமுடியும்?" என்ற கேள்விக்கும் ஆழ்வார்களின் பாசுரங்களில் விடைகள் உள்ளன!
|
|
ஸ்ரீ நம்மாழ்வார் - திருவாய்மொழி - பாசுரம் # 3-3-5
|
|
|
|
ஆசாரியர் ஸ்ரீ நம்பிள்ளை உரை - சுருக்கம்
|
| |
"தகதகவென மின்னும் உருக்கிய பொன்னின் ஒளியைப் [சோதியைப்] போன்றவன்; வேதம் அறிந்தவர்கள் கொண்டாடும் நான்மறைகளால் 'ஆராவமுதன்' என்று போற்றப்படுபவன்; அனைத்துக்கும் காரணமான முழுமுதற்கடவுளாம் ஆதிமூர்த்தி; இன்னார் இனையார் என்ற வேறுபாடின்றி எல்லோராலும் தொழப்படுபவன்," என்பதோ எம்பெருமானுக்குப் பெருமை? "தீது இல் சீர்த் திருவேங்கடத்தான்" என்பதன்றோ அவன் பெருமை!
"தீதில் சீர்த் திருவேங்கடத்தான்" என்பதற்கான உரையில் இப்பாசுரத்தின் ஆழ்பொருள்களை ஆசாரியர் சொல்லொணா அழகுடன் வெளியிட்டருளியுள்ளார்:
ஸ்ரீ நம்மாழ்வார் அருளுவது: "திருவேங்கடத்தான் தனது அருளைப் வெள்ளமெனப் பொழிவதற்கு இந்தப் பிரபஞ்சத்திலேயே மிகவும் குணக்கேடனைத் தேடி, 'நீசனேன் நிறைவு ஒன்றும் இலேன்' ஆகிய அடியேனைக் கண்டுபிடித்து, அடியேனுக்கு அருள் புரிந்தான். இதுவே அவனுடைய சீர்.
எனினும், அடியேனுடன் அவனது தேடலை நிறுத்திக்கொண்டால், அது அவனுடைய சீர்மைக்குத் தீது! அவன் பட்டினி கிடந்தது, தவமிருந்து அடியேனைக் காட்டிலும் நீசனைத் தேடிக்கொண்டிருக்கின்றான். அருள் புரிவதற்குக் காத்திருக்கின்றான். எனவே தான், அவன் தீதில் சீர்த் திருவேங்கடத்தான்! அவனது இந்தப் பெருமைக்கு முன் "அவன் எல்லா உலகும் தொழும் ஆதி மூர்த்தி" என்ற பெருமை நிற்காது காணீர்!"
குறிப்பு: தாய்ப்பசுவிற்கு அன்று ஈன்ற கன்றின் அழுக்கு விருந்தும் மருந்தும் ஆகும்! ஆசையுடன் கன்றுக்குட்டியை நக்கிக் கொடுக்கும். குற்றத்தைக் நற்றமாகக் கொள்ளும் இந்தக் குணமே "வாத்சல்யம்" என்று போற்றப்படுகின்றது. திருவேங்கடத்தானுடைய திருக்கல்யாண குணங்களிலேயே மிகச் சிறந்தது "வாத்சல்யம்" என்பதை இப்பாசுரத்தால் ஆழ்வார் வெளியிட்டு அருளியுள்ளார் என்பதை ஆசாரியர் நமக்கும் புரியும் வண்ணம் உரை அருளியுள்ளார்! இது திருவேங்கடவனின் வாத்சல்யத்தைக் காட்டிலும் பெரிய வாத்சல்யம்!!
திருவேங்கடவனின் வாத்சல்யத்தைப் பற்றிக் கேட்டும் நம்பிக்கை வராதவர்களுக்கு, இந்த இரகசியத்தின் இரகசியத்தை நன்கு புரியும்படி ஸ்ரீ திருமங்கையாழ்வார் மேலும் வெளிப்படையாக அருளியுள்ளார்! ஆசாரியர்கள் அருளால் அது நம்மிடம் வந்தடைந்துள்ளது. என்னவென்று காண்போம்:
|
|
ஸ்ரீ திருமங்கையாழ்வார் - பெரிய திருமொழி - பாசுரம் # 1-9-9
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
“பாவமே செய்து பாவியானேன்” என்பதற்கும் "எங்கள் மாதவனே" என்பதற்கும் உள்ள உரை மிகவும் போற்றத்தக்க உரை.
“பாவமே செய்து பாவியானேன்”:
"திருவேங்கடவா! நான் புண்ணியம் எதுவும் செய்யவில்லை. நான் செய்த பாவங்களும் உன்னைப் பொருட்டுச் செய்திருந்தால் அவை புண்ணியங்கள் ஆகியிருக்கும். எடுத்துக்காட்டு: கண்ணணை விரட்டி ஓடிக்கொண்டிருந்த யசோதை, ததிபாண்டன் என்பவரிடம், "கண்ணன் இங்கே வந்தானோ?" என்று வினவ, கண்ணனைப் தம்முடைய பானைக்குள் ஒளித்துவைத்திருந்த ததிபாண்டன், ஒரு கணமும் தயங்காமல், "இல்லை" என்று யசோதையிடம் பொய் சொல்லி, தமக்கும் தம் பானைக்கும் வைகுந்தம் பெற்றார்! பொய் சொல்வது பாவம். எனினும், கண்ணனைக் காக்கப் பாவம் செய்து புண்ணியவானாகி வைகுந்தம் சென்றார். நான் அப்படி எதுவும் செய்யவில்லை. பாவமே செய்து பாவியானேன்.
இருப்பினும், அணுவளவும் அச்சமின்றி உன் முன்னால் வந்து நிற்கின்றேன்! ஏனென்றால், நீ எங்கள் மாதவன்!"
வடமொழியில் “மா” என்றால் திருமகள். "தவ:" என்றால் கணவன். “மாதவன்” என்றால் திருமாமகள் கேள்வன். “பாவமே செய்து பாவியாகியும் உன் திருவடிகளை அடைய இவ்வளவு துணிச்சலுடன் வந்தேன்! ஏனெனில் நீ யார்? எங்களுக்காக உன்னிடம் பரிந்துரை செய்யும் திருமாமகளின் கேள்வன் அன்றோ?” என்று ஆழ்வார் அருளுகின்றார்.
"திருவேங்கடவா! புகல் அடைந்தவர்களுக்கு மட்டுமே புகல் அளிக்கும் உனது வாத்சல்யத்தைக் காட்டிலும் புகல் அடையாதவர்களுக்கும் புகல் அளிக்கும் திருமாமகளின் வாத்சல்யம் மொழியைக் கடக்கும் பெரும் புகழ் வாய்ந்ததன்றோ?
"இவ்வுலகத்திற்கே தாயானவளும், எல்லையற்ற கருணையின் அழகுருவமாகத் திகழ்பவளும் ஆகிய எங்கள் திருமாமகளான அலர்மேல் மங்கை 'அகலகில்லேன் இறையும்' என்று அறுதியிட்டு உன் திருமார்பில் எப்போதும் பிரியாது வீற்றிருக்க, நாங்கள் எங்கள் பாவங்களை எண்ணி மனம் தளரத் தேவையே இல்லை! எங்களுக்காக அவள் உன்னிடம் பரிந்துரை செய்வாள். உன்னை எங்களுக்கு அருள் புரியும்படிச் செய்வாள். ஆதலால், அற்றேன் வந்தடைந்தேன்! அடியேனை ஆட்கொண்டருளே!" என்கிறார் ஆழ்வார்.
ஆழ்வார்களும் ஆசாரியர்களும் திருவேங்கடமுடையானின் அடியார்கள் மற்றும் அடியார்க்கு அடியார்களின் பெருஞ்சிறப்பையும் வெளியிட்டருளியுள்ளனர்!
|
|
ஸ்ரீ திருமழிசை ஆழ்வார் - நான்முகன் திருவந்தாதி - பாசுரம் # 41, # 90
|
|
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
முதல் பாசுரத்தின் உரையில் ஆசாரியர் அருளியவை:
திருவேங்கடவா! உனக்கு இரண்டு மாபெரும் செல்வங்கள். அவை:
1. முத்துக்களை உதிர்க்கும் குளிர் அருவிகள் நிறைந்த திருவேங்கடமாமலை
2. திருவோணத் திருவிழாவில் உன் திருநாமங்களைப் பாடி, ஆடி, உனக்குப் பல்லாண்டு உரைக்கும் உன் அடியார்களின் முழக்கங்கள்
அவற்றையும் விட்டு, நீ என் உள்ளத்தில் புகுகின்றாய்! இப்படிப்பட்ட உன்னை, உன் மாபெரும் செல்வங்களுடன் நீ வீற்றிருக்கும் திருவேங்கடத்திலேயே நான் வந்து காண விழைகின்றேன்.
இரண்டாம் பாசுரத்தின் உரையில் ஆசாரியர் அருளியவை:
வீற்றிருந்து வைகுந்தத்தை ஆள விரும்புபவர்கள், திருவேங்கடத்தான் திருவடிகளில் பல விதமான மலர்களை அளிப்பவரே ஆவர்.
"அவர்களைக் காட்டிலும் சிறப்பாக வாழ்பவர்கள் எவர்?" எனில், எம்பெருமான் திருவுள்ளத்தை நன்கு அறிந்து அவனுக்கே அடிமைப்பட்டிருக்கும் அடியவர்களின் அடியவர்களே!
|
ஸ்ரீ குலசேகராழ்வார் - பெருமாள் திருமொழி - பாசுரம் # 4-9
|
|
|
|
ஆசாரியர் ஸ்ரீ பெரியவாச்சான்பிள்ளை உரை - சுருக்கம்
|
| |
"திருமகளின் மீது மையல் கொண்டிருக்கும் திருவேங்கடவா! செடி போல அடர்ந்திருக்கும் வல்வினைகளை [உன்னை அடைந்தவர்க்குத்] தீர்ப்பவனே! உனது திருக்கோயிலுடைய கருவறையின் வாசலில் அடியார்கள், மற்ற வானவர்கள், அப்சரப் பெண்டிர் என்று பலரும் உன்னைக் காணக் கூடுவர். [திருவேங்கடவனின் அருளைப் பெற அவர்கள் வந்ததுவே காரணமாக] அக்குழாங்களுடன் இருக்கும் வண்ணம், உனது திருக்கோயிலுடைய கருவறையின் ஒரு படியாகிய ஜடப்பொருளாய் அடியேன் இருக்க அருள் புரிவாய்! அந்த ஞானமற்ற அஃறிணை நிலையிலும் ஒரே ஒரு ஞானம் மட்டும் அடியேனுக்கு இருக்கவேண்டும் - உன் பவள வாயைக் காணும் அருள் வேண்டும், பெரியோனே!"
குறிப்பு: இன்றும், திருமாலின் திருக்கோயில்களில் உள்ள கருவறை வாசற்படிகள் யாவும் "குலசேகரப் படி" என்றே அழைக்கப்படுகின்றனர்.
|
தீதில் சீர்த் திருவேங்கடத்தானின் அருளையும் விஞ்சும் ஸ்ரீ இராமானுசரின் பேரருள்!
|
|
ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 106
|
|
|
|
ஆசாரியர் ஸ்ரீ மணவாள மாமுனிகள் உரை - சுருக்கம்
|
| |
"திருமால் வசிக்கும் இடம் வைகுந்தம், திருவேங்கடம், திருமாலிருஞ்சோலை என்று ஞானிகளான நல்லோர்கள் கூறுவர். திருமால் மீதும் திருமால் உறையும் திருத்தலங்களின் மீதும் எல்லையற்ற அன்பு உடைய ஸ்ரீ இராமானுசரின் தூய பெரும் திருவுள்ளத்தைத் திருமால் மிக விரும்புகின்றான். ஸ்ரீ இராமானுசர் மிக விரும்பும் அந்தத் திருத்தலங்களுடன் சேர்ந்தே ஸ்ரீ இராமானுசரின் ஒப்பற்ற திருவுள்ளத்தில் திருமால் வசிக்கின்றான்!
ஸ்ரீ இராமானுசரோ கருணையில் திருமாலைக் காட்டிலும் அறப்பெரியவர் என்பதால் வறண்டதும், பொலிவற்றதும், குற்றமுள்ளதும் ஆகிய அடியேன் மனத்திலும் இன்புற்று எழுந்தருளுகின்றார்!" என்று ஸ்ரீ இராமானுசரின் திருநாமங்களைச் சொல்வதிலேயே ஊற்றமுடைய திருவரங்கத்தமுதனார் உள்ளம் உருகிப் பூரிக்கின்றார்.
|
|
திருவேங்கடவனைப் போற்றும் துதிகள் - சில தகவல்கள்
|
| |
ஸ்ரீ மணவாள மாமுனிகளின் 8 முக்கிய சீடர்களுள் ஒருவரான ஸ்ரீ பிரதிவாதி பயங்கரம் அண்ணா, தமது அற்புதமான படைப்பான "ஸ்ரீ வேங்கடேச சுப்ரபாதம், ஸ்தோத்திரம், பிரபத்தி, மங்களம்" என்ற துதிகளின் தொகுப்பில், ஆழ்வார்களும் ஸ்ரீவைஷ்ணவ ஆசாரியர்களும் மொழிந்த இரகிசயங்களையே அனைவரும் பயன்பெறும் வண்ணம் சுலோக வடிவில் அருளியுள்ளார். இந்த அருமையான துதியைத் தினமும் படிப்பவர்கள் ஆழ்வார்களும் ஆசாரியர்களும் அருளிய இரகசியங்களைக் கொண்டே 20 நிமிடங்களில் திருவேங்கடவனைத் துதிக்கும் மிகப் பெரிய பேற்றைப் பெறுகிறார்கள்.
திருவேங்கடவனின் திருநாமங்களில் ஈடுபாடு உடையவர்களுக்கு:
திருவேங்கடவனுக்கு என்று குறிப்பிட்ட 1000 திருநாமங்கள் உண்டு. "ஸ்ரீ வேங்கடேச சகஸ்ரநாமம்" என்று ஸ்ரீ நாரத முனிவர் ஸ்ரீ வசிட்ட முனிவருக்கு உபதேசித்துள்ளார். மிக அருமையான இத்திருநாமங்களுள் சிலவற்றை ஸ்ரீ இராமானுசரும் "திருவேங்கடத்தில் உறைபவன் திருமாலே" என்பதை எடுத்துரைக்க மேற்கோள் காட்டியருளியதை "ஸ்ரீ வேங்கடேச இதிகாச மாலா" என்ற நூலில் ஸ்ரீ திருமலை அனந்தாண்பிள்ளை குறிப்பிட்டுள்ளார்.
"ஸ்ரீ வேங்கடேச சகஸ்ரநாமம்" துதியைத் தினமும் கேட்க விரும்புபவர்கள் இக்காணொளியைப் பயன்படுத்தலாம். இதனைத் தினமும் படிக்க விரும்புபவர்கள் தமிழில் அல்லது வடமொழியில் அல்லது ஆங்கிலத்தில் படித்துப் பயன்பெறலாம்.
"ஸ்ரீ வேங்கடேச சகஸ்ரநாமம்" துதியைத் முடியாதவர்கள், "திருவேங்கடவா! திருமகள் கேள்வா! கோவிந்தா!" என்று தினமும் 1008 முறை சொல்லி வரலாம்.
|
முடிவுரை
|
| |
கொடிய கல்நெஞ்சும் கரையும் வண்ணம் ஆழ்வார்களும் ஆசாரியர்களும் திருவேங்கடவனைப் போற்றியுள்ளனர் என்பதை ஓரளவு சுவைக்கப் பெற்றோம்!
நாமும் திருவேங்கடவனின் பெருமைகளையும், திருநாமங்களையும் பாடுவோம். மற்றவருக்கும் இச்சுவையைப் பகிர்ந்தளிப்போம்.
எல்லோரும் செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புற ஸ்ரீ பட்டர்பிரான் கோதை இன்னருள் புரிவாள்!
வாழி எதிராசன்! வாழி எதிராசன்! வாழி எதிராசன்!
மணவாள மாமுனியே இன்னுமொரு நூற்றாண்டிரும்!
|
|
நன்றிகள் பல!
|
| |
பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்!
பொலிக! பொலிக! பொலிக!
|
-
நாய்ச்சியார் திருமொழியில் நவ வித பக்தி ...
-
ஆழ்வார்களும் ஆசாரியர்களும் போற்றும் திருமாமகள் ...
-
Sri Varadhacharya & Srimathi Lakshmi Image Credit: http://www.mudaliandan.com/rama...
-
குரு பக்தியில் 8 பக்தி இலக்கணங்கள் ...
-
முன்னுரை சில நாள்களுக்கு முன் ஒருவர் “நான் ஒரு பார்ப்பனர் வீட்டுக்குச் சென்றபோது அவர்கள் எனக்குத் தேனீர் விருந்து அளித்தனர். ஆனால் நான...
-
Sri Vaduga Nambigal Image Credit: https://guruparamparai.wordpress.com This...
| | | | | |
