ஸ்ரீ சீதாராம பக்த அனுமன்

ஸ்ரீ சீதாராம பக்த அனுமன்

Image Source: https://in.pinterest.com/pin/9148005503639887/

முன்னுரை

திருமால் திருவடிகளில் சரணாகதியையே நெறியாகக் கொண்ட ஸ்ரீ இராமானுசர் தரிசனத்தில், 'சரணாகதி சாத்திரம்' என்று கொண்டாடப்படும் ஸ்ரீமத் இராமாயணத்திற்கு மிக முக்கியமான இடம் அளிக்கப்பட்டுள்ளது. ஆசாரியர் ஸ்ரீ இராமானுசர், தமது ஆசாரியர் ஸ்ரீ பெரிய திருமலை நம்பிகளிடம், திருவேங்கடத்திற்குச் சென்று, 1 ஆண்டு அங்கு தங்கியிருந்து, ஸ்ரீமத் இராமாயணத்தின் இரகசிய ஆழ்பொருள்களைக் கற்றார். ஸ்ரீ இராமானுசரின் புகழ் பாடும் 'ஸ்ரீ இராமானுச நூற்றந்தாதி' என்ற தலைசிறந்த நூல், "படி கொண்ட கீர்த்தி இராமாயணம் என்னும் பத்தி வெள்ளம் குடி கொண்ட கோயில் இராமானுசன்" என ஸ்ரீ இராமானுசரைப் போற்றுகின்றது. ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 37 முன்னர் ஒரு முறை, "ஆழ்வார்களும் ஆசாரியர்களும் போற்றும் ஸ்ரீ அனுமன்" என்ற கட்டுரையில், ஆழ்வார்களின் பாசுரங்கள், ஆசாரியர்களின் உரைகள் ஆகியவற்றுள் ஸ்ரீ அனுமனின் பெருமை எவ்வாறு போற்றப்பட்டுள்ளது என்பதைச் சில எடுத்துக்காட்டுக்களுடன் விண்ணப்பித்திருந்தேன். ஸ்ரீ இராமானுசருடைய திருவடிகளின் இன்னருளால் வாழ்ந்த ஆசாரியர்களான ஸ்ரீ கூரத்தாழ்வான், ஸ்ரீ முதலியாண்டான், ஸ்ரீ பராசர பட்டர், ஸ்ரீ நஞ்சீயர், ஸ்ரீ நம்பிள்ளை, ஸ்ரீ பெரியவாச்சான்பிள்ளை, ஸ்ரீ பிள்ளைலோகாசாரியர் முதலான ஆசாரியர்கள் யாவரும், தாங்கள் அருளிய உரைகளிலும், சுலோகங்களிலும், இரகசிய கிரந்தங்களிலும், பற்பல இடங்களில் ஸ்ரீமத் இராமாயணத்தின் சிறப்பான ஆழ்பொருள்களை வெளியிட்டருளியுள்ளார்கள். அவற்றுள் ஒரு சில அரும்பொருள்களின் தொகுப்பாகவே இக்கட்டுரை வரையப்பட்டுள்ளது. ஸ்ரீ வால்மீகி இராமாயணத்தின் படி, ஸ்ரீ அனுமனின் வாழ்க்கை நிகழ்வுகளை நான்காகப் பிரிக்கலாம்: ஸ்ரீ இராமபிரானைத் தரிசிக்கும் முன் ஸ்ரீ இராமபிரானைத் தரிசித்த பின் அன்னை சீதையின் அருளாசி பெற்ற பின் ஸ்ரீ இராமபிரானால் பேரன்புடன் அணைக்கப் பெற்ற பின் இந்த ஒவ்வொரு கட்டத்திலும், ஸ்ரீ சீதாராமனின் திருவருளால், ஸ்ரீ அனுமனின் நிலை ஆன்மீகப் பாதையில் எவ்வாறு போற்றத்தக்க வகையில் முன்னேறியது என்பதைக் காணலாம். ஸ்ரீ அனுமனின் ஸ்ரீ சீதாராம பக்தி எத்தகைய சிறப்பு வாய்ந்தது என்பதையும் காணலாம்.

---

பாகம் # 1: ஸ்ரீ அனுமன் ஸ்ரீ இராமபிரானைத் தரிசிக்கும் முன்

Image Source: https://in.pinterest.com/pin/326159198017234129/

பலமும், வரமும் பெற்றுத் திகழ்பவர்

ஸ்ரீ அனுமன் வாயுதேவனின் முழு அருளைப் பெற்றுப் பிறந்ததால், தேகபலத்தில் ஒரு குறையும் இல்லை. ஸ்ரீ அனுமன், சிறு குழந்தையாக இருந்தபோது, சூரியனைப் பழம் என எண்ணி, வானில் தாவி ஆதவனை விழுங்க இருந்த நேரம், இந்திரன் வஜ்ராயுதத்தால் ஸ்ரீ அனுமனுடைய தாடையில் அடிக்க, வாயுதேவனின் கோபத்தை ஆற்றுவதற்குத் தேவர்கள் பல அறிய வரங்களை ஸ்ரீ அனுமனுக்கு அருளினர். அதனால், தேக பலத்துடன் வரபலமும் சேர்ந்தது!

இது மற்ற வானரர்கள் வாழ்வில் நடக்காத ஒரு நிகழ்ச்சி. வாயு புத்திரன் பீமனின் வாழ்விலும் நடக்காத ஒரு நிகழ்ச்சி.

குருவிற்கு அருமையான சீடர்

பின்னர், அதே சூரியன் மற்றும் இந்திரனிடமே ஸ்ரீ அனுமன் கல்வி கற்றார்! ஸ்ரீ மங்களகிரி மாகாத்மியம் என்ற நூல், சூரியன் ஆகாயத்தில், தம் கடமையைச் செய்வதற்காக, நில்லாமல் பயணிக்க, ஸ்ரீ அனுமன் கைகளைக் கூப்பி அவருடன் சென்றுகொண்டே, 24 மணி நேரங்களில் அனைத்தையும் கற்றார் என்று பகர்கின்றது! இந்திரனிடம் இலக்கணம் கற்று, அதில் ஸ்ரீ அனுமன் பண்டிதரும் ஆனார்.

இதனால், குரு பக்தி, சுறுசுறுப்பு, புத்திக்கூர்மை, கல்வியில் கவனம், நினைவாற்றல், கசடறக் கற்றல் ஆகிய பண்புகள் ஸ்ரீ அனுமனிடம் குடியிருந்தன என்பது விளங்கும்.

அறம் பக்கமே நிற்பவர், இடுக்கண் களையும் நண்பர்

ஸ்ரீ சுக்கிரீவரை வாலி துரத்தியபோது, மொத்த வானர சேனையும் பலம் மிக்க வாலி பக்கமே நின்றன. நால்வர் மட்டுமே, ஸ்ரீ சுக்கிரீவர் பக்கம் இருக்கும் அறத்தை எண்ணி, அரண்மனைச் சுகங்களைத் துறந்து, காட்டு வாழ்க்கையைத் தேர்ந்தெடுத்து, ஸ்ரீ சுக்கிரீவருடன் சென்றனர். அவர்களுள் ஸ்ரீ அனுமனும் ஒருவர்.

சிறந்த ஆலோசகர்

ஸ்ரீ அனுமனின் புத்திக்கூர்மை, பலம், வேகம், துணிச்சல் ஆகியவற்றை ஸ்ரீ சுக்கிரீவரும், ஸ்ரீ ஜாம்பவானும் மனமாரப் புகழ்கின்றனர்.

வாலியிடமிருந்து தப்பிக்க ரிசியமுக மலைகளில் தங்குவதற்கு ஸ்ரீ சுக்கிரீவருக்கு யோசனை அளித்தவர் ஸ்ரீ அனுமனே. ஸ்ரீ இராமபிரானிடம் ஸ்ரீ சுக்கிரீவர் கொடுத்த வாக்கை ஸ்ரீ சுக்கிரீவருக்கு நினைவூட்டியவரும், கோபத்துடன் தகிக்கும் ஸ்ரீ இலக்குவனைச் சாந்தப்படுத்தக் கைகளைக் கூப்பும்படி ஸ்ரீ சுக்கிரீவருக்கு யோசனை அளித்தவரும் ஸ்ரீ அனுமனே!

---

சின்னஞ்சிறு வயதில், விளையாடும் பருவத்தில், ஸ்ரீ அனுமன் முனிவர்களிடம் குறும்புகள் செய்ய, "உனது பலம் ஒருவர் நினைவூட்டினால் மட்டுமே உனக்கு நினைவு வரும்!" என முனிவர்கள் மென்மையாகச் சபித்தனர். அதனால், ஸ்ரீ அனுமனுடைய நற்பண்புகள் முதலில் வெளிச்சத்திற்கு வரவில்லை. ஆனால், இறையருள் தேடி வந்தது! அன்னை சீதையை அரக்கன் இராவணன் கவர்ந்து செல்லும்போது, அவள் தனது மேலாடையில் ஒரு சிறு பகுதியைக் கிழித்துத் தன்னுடைய அணிகலன்களை வீச, அதை ஸ்ரீ சுக்கிரீவர் ஆகியோர் பத்திரப்படுத்தி வைத்தனர். அப்போது, திருமகளாம் அன்னை சீதையின் அருட்பார்வை அவர்கள் மீது படர்ந்தது! இதுவே ஸ்ரீ சுக்கிரீவருக்குப் பிறகு ஸ்ரீ இராமபிரானின் அருளைப் பெற்றுத் தந்தது. ஸ்ரீ அனுமனுக்கு மிகப் பெரிய ஒரு மாற்றம் வருவதற்கு அடிக்கல் நட்டது!

பாகம் # 2: ஸ்ரீ அனுமன் ஸ்ரீ இராமபிரானைத் தரிசித்த பின்

Image Source: https://in.pinterest.com/pin/599752875369616734/

மங்களாசாசனம்

ஸ்ரீ இராமபிரானை முதலில் சந்தித்த ஸ்ரீ அனுமன், "அணிகலன்களால் அலங்கரிக்கப் படவேண்டிய இத்தோள்கள் ஏன் இப்படி ஏதுமின்றி இருக்கின்றன?" என்று வினவுகின்றார். இதற்கு ஸ்ரீவைணவ ஆசாரியர்கள் கூறிய பொருள்: அவரது திண்தோள் வடிவழகிலும் வலிமையிலும் மயங்கி ‘இதற்கு கண்ணெச்சில் படுமே! இவற்றை அணிகலன்களால் மறைக்கவேண்டுமே!’ என்பது ஸ்ரீ அனுமனின் எண்ணம் என்பதாம்!

இராவணனும் கும்பகரணனும் இதே திருத்தோள்களைக் கண்டனர். திருமகளின் அருட்பார்வையைப் பெறாத அவர்களுக்கு இந்த எண்ணம் வரவில்லை.

சொல்லின் செல்வர்!

முதல் சந்திப்பிலேயே, ஸ்ரீ அனுமனின் வேதம், நாதம், இலக்கணம் ஆகியவற்றைப் பற்றிய அறிவு, பேச்சின் இனிமை, மிதமான வேகம், குரலின் ஏற்ற இறக்கங்கள், உடல் அங்கங்களில் காணும் தெளிவு ஆகியவற்றைப் புகழ்ந்து, "இவனைப் போல ஒரு மந்திரி இருப்பவன் வெற்றியை அடைவான்!" என்று ஸ்ரீ இராமபிரானே மகுடம் சூட்டுகின்றார்!

நாயகர்களின் நம்பிக்கை நட்சத்திரம்!

அன்னை சீதையைத் தேட வானரர்கள் புறப்பட்டபோது, ஸ்ரீ அங்கதன், ஸ்ரீ ஜாம்பவான் ஆகியோரையும் விடுத்து, ஸ்ரீ அனுமனுக்கே ஸ்ரீ இராமபிரான் தமது கணையாழியை அளிக்கின்றார்! ஸ்ரீ சுக்கிரீவரும் ஸ்ரீ அனுமனே இச்செயலைச் செய்து முடிப்பார் என்ற நம்பிக்கையுடன் பேசுகின்றார்.

பெரியோர்களிடம் பணிவும், சக வானரர்களுக்கு உற்சாகமூட்டும் பண்பும்

கடலைத்தாண்ட வானத்தில் தாவும் முன், முதல் செயலாக, வயது சென்ற வானரர்களையும், தமது தந்தையான வாயுதேவனையும் ஸ்ரீ அனுமன் பணிவுடன் வணங்குகின்றார்.

பிறகு, வானரர்களைப் பார்த்து, "நான் இக்காரியத்தை வெற்றியுடன் முடித்தே திரும்புவேன்!" என்று சிம்மநாதம் செய்கின்றார். தற்கொலை எண்ணத்துடன் மனம் சோர்ந்து இருந்த வானரர்களுக்கு, இப்பேச்சு உயிரும், உற்சாகமும் மூட்டுவதாய் அமைந்தது. இதனால், ஸ்ரீ ஜாம்பவானும் இப்பேருதவியைப் பாராட்டுகின்றார்.

தன்னடக்கம்

பிறகு, இதே ஸ்ரீ அனுமன், "தாயே! இது போன்ற செயல்களைச் செய்ய அடியேன் போன்ற சிறியோர்களையே அனுப்புவர். வானர சேனையில் அனைவரும் குறைந்த பட்சம் எனக்குச் சமமானவர் அல்லது என்னைக் காட்டிலும் சிறந்தவர். தாங்கள் கவலையை விடுங்கள்," என்று அன்னை சீதையிடம் பணிவு தோற்றப் பேசுவதையும் காண்கின்றோம். இலங்கையை எரித்துத் திரும்பியபோதும், சக வானரர்களிடம் அவர்களது சிறப்பை மதிப்புடன் பேசி, அவர்களை உற்சாகப்படுத்துவதையும் காண்கின்றோம்.

இதிலிருந்தே, மிக்க திறமைசாலியாக இருந்தபோதும், ஸ்ரீ அனுமன் தற்புகழ்ச்சி பேசுபவர் அல்ல என்பது விளங்கும்.

எவரிடம், எப்போது, எங்கே, எப்படி நடந்துகொள்ளவேண்டும் என்பதில் தெளிவு!

மாகடலைத் தாண்டும்போது எழுந்த மூன்று தடைகளை ஸ்ரீ அனுமன் தகர்த்த விதமே அலாதியானது! மைனாக மலையிடம் மனங்கவரும் அன்புப் பேச்சு, சுரசையிடம் வியத்தகு புத்திக்கூர்மை, சிம்மிகையிடம் பெரும் ஆற்றல் - ஸ்ரீ சுந்தர காண்டம் படிப்போரின் உள்ளங்களைக் கொள்ளைகொள்கின்றார்! அன்னை சீதையைத் தேட எது சரியான நேரம், எது சரியான உருவம் என்பதை அலசி ஆராயும் முறை நமக்கு ஒரு நல்ல படிப்பினை. இலங்கைக்குக் காவல் தெய்வத்தை அலட்சியமாக வெல்வது நமக்கு ஒரு உற்சாகமூட்டும் கட்டம்.

புலனடக்கம் அணி செய்யும் பேராண்மை

இராவணனின் மனைவிகளான அழகிய பெண்கள் தம்மை மறந்து உறங்கும் போது கண்டார். ஆனால், அவரது பிரம்மசரிய விரதம் நெருப்பென மின்ன, அவரது மனம் சற்றேனும் சலனம் அடையவில்லை. அன்னை சீதையைத் தேடுவதொன்றே அவரது உயர்ந்த நோக்கம்.

தியாக மனப்பான்மையும், சுய உற்சாகத்தைப் பெருக்கும் திறனும்

பெருமுயற்சி செய்தும் அன்னை சீதையைக் காணவில்லை என்றதும், "திரும்பச் சென்று, செய்தியைச் சொல்லி, மற்றவரின் உயிர்களைப் பறிப்பதற்குப் பதிலாக, நாமே இறக்கலாம்!" என்று தியாக மனப்பான்மையுடன் எண்ணுகின்றார். பிறகு, தம்மைத் தாமே அற்புதமாக ஊக்கப்படுத்திக்கொள்கின்றார். நமக்கு ஒரு நல்ல படிப்பினை!

தெய்வ நம்பிக்கை

அப்போது, அவருக்கு ஒரு தெய்வீக எண்ணம் உதிக்கின்றது. ‘நான் தேடுகின்றேன்’ என்ற எண்ணத்தை விட்டு, ஸ்ரீ இராமபிரானையும், ஸ்ரீ இலக்குவனையும் வணங்குகின்றார். அன்னை சீதையையும், "தேவீ! உமது திருத்தகப்பனார் ஜனகருக்கு, அவர் செய்த வேள்வியின் போது, உம்மை வெளிப்படுத்தியது போல, நீர் இருக்கும் இடத்தை அடியேனுக்கும் வெளிப்படுத்துவீர்!" என்ற பொருளில் ‘தேவி ஜனகாத்மஜா’ என்ற திருநாமத்தால் வணங்குகின்றார். அடுத்த கணமே அசோக வனத்தைக் கண்டார்!

---

அசோக வனத்துள் நுழைந்த ஸ்ரீ அனுமன், கூர்ந்து கவனிக்கின்றார். சிம்சுபா மரத்தின் அடியில் ஒரு பெண்மணி அமர்ந்திருப்பதைப் பார்த்து, ஸ்ரீ இராமபிரான் தம்மிடம் தெரிவித்தது போலவே உள்ள அவளது தோற்றம், இவர் அவளைக் கண்டபோது அவளது ஆடையின் வண்ணம், அன்று அவள் மேலிருந்து விட்டெறிந்த அணிகலன்கள் இங்கே இல்லாதிருப்பது ஆகிய காரணங்களால், அவளே சீதை என முடிவு செய்கின்றார்!

பாகம் # 3: ஸ்ரீ அனுமன் அன்னை சீதையின் அருளாசி பெற்ற பின்

Image Source: https://in.pinterest.com/pin/599752875369616734/

அன்னை சீதையின் ஆசிகள் பெரும் முன்	அன்னை சீதையின் ஆசிகள் பெற்ற பின்
“ஸ்ரீ இராமபிரான் மாபெரும் வீரராக இருந்தும், ஒரு பெண்பிள்ளையை இழந்து இவ்வளவு வாடுகின்றாரே!” என எண்ணியிருந்தார்.	அன்னை சீதையைக் கண்டவுடன், “இப்படி ஒரு சிறப்பு வாய்ந்த பெண்மணியைப் பிரிந்து ஸ்ரீ இராமபிரான் இன்னும் உயிர் வாழ்கின்றார் என்றால், அது மாபெரும் சாதனை! இவளுக்காக மூன்று உலகங்களையும் தலைகீழாக மாற்றினாலும் தகும்!” என்கின்றார். இந்த மனமாற்றமே ஸ்ரீ அனுமனின் மேன்மைக்கு முதல் படியாம். இதன் பிறகு, அன்னை சீதையைப் பற்றி பேசத் தொடங்கும் போதெல்லாம், அவள் இருக்கும் திக்கு நோக்கி வணங்கிய பின்னரே பேசுகின்றார் என்பதை ஸ்ரீமத் இராமாயணத்தைப் படிக்கும்போது காணலாம். அனுதினமும் இராவணனும் அரக்கியரும் அன்னையைப் பார்த்துக்கொண்டிருந்தனர் - ஒருவருக்காவது இந்த நற்பண்பு ஏற்பட்டதா?
அன்னை சீதையிடம் தம்மை ‘இராமதூதன்’ என அறிமுகம் செய்துகொண்டார்.	ஸ்ரீ அனுமன் அசோக வனத்தை அழிக்கும்போது அவரை எதிர்க்க வந்த அரக்கரிடம் தம்மை ‘இராமதாசன்’ என்று அறிமுகம் செய்துகொண்டார். ஸ்ரீ அனுமன் ஸ்ரீ இராமபிரானின் அடியார்களில் ஒருவர் என்பதைப் பறைசாற்றும் தருணம் இது!
ஸ்ரீ ஜாம்பவானின் தூண்டுதலாலேயே தமது ஆற்றல் நினைவுக்கு வர, மாகடலைத் தாண்டினார்.	இராவணன் சேனையில் மாபெரும் பலம் படைத்த அரக்கரிடம், எவரது தூண்டுதலுமின்றி, அசோக வனத்தில் தாமே பொருதார். திருமகளாம் அன்னை சீதையின் அருட்பார்வையால், அவரது சிறு வயது சாபமும் நீங்கியது!
இராவணன் அசோக வனத்தில் அன்னை சீதையுடன் பேச வந்தபோது, அவனது ஒளியைத் தாங்க முடியாமல், இலைகள் பின் ஒளிந்துகொண்டார்.	எதிரிகளால் சூழப்பட்டபோதும், எவ்விதத் தயக்கமுமின்றி, இராவணன் முன்னே துணிவுடன் நின்று, அவன் கேட்க விரும்பாத உண்மைகளை, அமைதியாகவும், தெளிவாகவும் உரைத்தார்!
அன்னை சீதையைத் தேடியபோது, எந்த வேண்டுதலும் இல்லாமல் செய்து, இலங்கை முழுவதும் தேடி, அதன் பிறகு பிரார்த்தனை செய்தார்.	அவரது வாலில் நெருப்பு வைத்தபோது, அது சுடவில்லை என்றதும், "இது அன்னை சீதையின் இன்னருள்! ஸ்ரீ இராமபிரானின் கருணை! தந்தையார் வாயுதேவன் மீது அக்னி தேவன் வைத்திருக்கும் அன்பு,” என்று உணர்கின்றார்!
இலங்கையின் செல்வத்தைக் கண்டு வியந்தார்.	அன்னை சீதையின் துயர் எனும் நெருப்பையே கொண்டு, அவரது தந்தையான வாயுவும் செய்யத் துணியாததைச் செய்தார் - இலங்கையை எரித்தார். அவரை வீதிகளில் அரக்கர்கள் இழுத்துச் சென்றபோதே, இலங்கையில் உள்ளவற்றை வேவு பார்த்து, மனதில் தேக்கிவைத்து, ஸ்ரீ இராமபிரானிடமும் பிறகு தெரிவித்தார்.
இலங்கையை நோக்கி பயணத்தைத் தொடங்கியபோது, பற்பல தெய்வங்களை வழிபட்டார்.	கடலைத் தாண்டும் முன் அன்னை சீதையை வணங்கி, ஸ்ரீ இராமபிரானையே தம் நினைவில் நிறுத்திப் புறப்படுகின்றார்! அவர்கள் இருவருமே அவருக்குக் கண்கண்ட தெய்வங்கள் ஆகிவிட்டனர்!

ஆசாரியர் ஸ்ரீ முதலியாண்டான் அருளியது: "ஸ்ரீ அனுமன் அன்னை சீதையிடம் ஸ்ரீ இராமபிரானின் கணையாழியைக் கொண்டு சேர்ப்பது ஒரு மிகப் பெரிய ஆன்மீகத் தத்துவத்தையும் குறிக்கின்றது. அன்னை சீதையைப் பரமாத்மாவைப் பிரிந்து வாடும் ஜீவாத்மாவாக உருவகப்படுத்தவேண்டும். ஸ்ரீ இராமபிரானே ஜீவாத்மாவை அடையத் துடிக்கும் பரமாத்மா. ஸ்ரீ இராமபிரானின் திருநாமத்தைக் கொண்ட கணையாழியே அட்டாட்சரத் திருமந்திரம். ஸ்ரீ அனுமனையே ஆசாரியனாக உருவகப்படுத்தவேண்டும். ஆக, ஆசாரியனே அட்டாட்சரத் திருமந்திரத்தை ஜீவாத்மாவிடம் அளித்து, பரமாத்மாவிடமும் ஜீவாத்மாவைப் பற்றி எடுத்துச் சொல்லி, ஜீவாத்மாவையும் பரமாத்மாவையும் சேர்த்துவைப்பவர்." இதனாலேயே, ஸ்ரீமத் இராமாயணத்தில் நடுநாயகமாகத் திகழும் ஸ்ரீமத் சுந்தர காண்டத்தில், ஸ்ரீ அனுமன் அன்னை சீதையிடம் ஸ்ரீ இராமபிரானின் கணையாழியைச் சேர்ப்பிக்கும் பகுதியே நடுநாயகமாகத் திகழ்கின்றது.

---

திருமகளாம் அன்னை சீதையின் பேரருட்பார்வையும் கருணையும் பெற்ற பின்னர், ஸ்ரீ அனுமனுக்குக் கிடைத்த மிகப்பெரிய பரிசு ஸ்ரீ இராமபிரானால் ‘உத்தம சேவகன்’ என்று கொண்டாடப்பட்டு, அவரது திருமேனியால் பேரன்புடன் அணைக்கப்பட்டதே!

பாகம் # 4: ஸ்ரீ அனுமன் ஸ்ரீ இராமபிரானால் பேரன்புடன் அணைக்கப் பெற்ற பின்

Image Source: https://in.pinterest.com/pin/599752875369616734/

ஸ்ரீ இராமபிரானின் திருவுள்ளம் அறிந்த உத்தம சேவகர்

ஸ்ரீ அனுமன் மட்டுமே ஸ்ரீ விபீடணரின் குற்றமற்ற பேச்சு, முக பாவனை ஆகியவற்றைச் சுட்டிக்காட்டி, "அவரை நம்மில் ஒருவராக ஏற்பது சரி," என்று தம் கருத்தை [ஸ்ரீ இராமபிரான் கேட்டதால்] தெரிவிக்கின்றார். இது சரண் அடைந்தோரைத் தவறாமல் காக்கும் ஸ்ரீ இராமபிரானுக்குப் பெரும் மகிழ்ச்சியைத் தந்தது!

நற்குணக்கடலின் நன்மையையே நோக்கும் நற்பண்பாளர்

போர்க்களத்தில் ஸ்ரீ ஜாம்பவான், "நீ ஒருவனே நம் சேனையைக் காக்கக்கூடியவன்," என்று ஸ்ரீ அனுமனைப் புகழ்ந்து, சஞ்சீவனி மூலிகையை எடுத்து வரச்சொல்ல, புகழ்ச்சியிலும் மயங்காமல் பணிவே உருவான ஸ்ரீ அனுமன், ஸ்ரீ ஜாம்பவானின் திருவடிகளைத் தொட்டு வணங்கி, இமயத்தை நோக்கிப் பயணம் செய்கின்றார்.

அங்கே, அம்மூலிகைகள் இவர் வந்திருப்பதை அறிந்து தம்மை மறைத்துக்கொள்ள, "நற்குணக்கடலான ஸ்ரீ இராமபிரானுக்கு உதவ மறுப்பாரும் உளரே!" என்று வெறுத்து, ஸ்ரீ அனுமன் அம்மூலிகை மலையையே பெயர்த்து வருகின்றார்! அப்போதும், ஸ்ரீ இராமபிரானின் நன்மையிலேயே நோக்கம்.

ஸ்ரீ இராமபிரானின் மெய்யடியாருக்கும் மெய்யடியார்

ஸ்ரீ இலக்குவன் போரில் மயங்கி விழுந்தபோது, இராவணன் அவரைத் தூக்கிச் செல்ல முயல, அவ்வரக்கனால் அவரை எள்ளளவும் நகர்த்த முடியாமல், தனது இல்லம் திரும்பினான். ஸ்ரீ அனுமனோ ஸ்ரீ இலக்குவனை ஒரு பறவையின் சிறகை தூக்குவது போலத் தூக்கிவிட்டார். ஸ்ரீ அனுமன் மெய்யடியார் அன்றோ?

தாயாரின் துயர் பொறாத தனயன்

ஸ்ரீ இராமபிரானின் வெற்றிச் செய்தியை அன்னை சீதையிடம் கொண்டு சென்றதும் ஸ்ரீ அனுமனே! அதைக் கேட்ட அன்னை சீதை, உவகை வெள்ளத்தில் மூழ்கி, ஸ்ரீ அனுமனைப் புகழும் வார்த்தைகள் யாவும் ஒவ்வொரு ஸ்ரீ அனுமன் அடியாருக்கும் தேன்வெள்ளமென இனிக்கும்!

ஸ்ரீ அனுமனோ, "தாயே! தங்களது இந்த அன்பு வார்த்தைகளே தாங்கள் அடியேனுக்கு அளித்த பரிசாம். தாங்கள் அடியேனுக்கு ஏதேனும் தரவேண்டும் என எண்ணினால், தங்களைத் துன்புறுத்திய இவ்வரக்கிகளை உதைக்க அனுமதி அளிப்பீர்!” என்று ஒரு நல்ல தனயனுக்கே உரிய அன்புடனும், தாயின் துயர் கண்டு பொறாத கோபத்துடனும் பேசுகின்றார். அப்போதும், தமக்கென எதுவுமே வேண்டவில்லை. “அம்மையும் அப்பனும் நலமாக இருத்தல் வேண்டும்,” என்பதே அவரது குறிக்கோள்.

உயர்ந்தோரை உயிர்ப்பித்த உவமையிலா உத்தமர்

1. அன்னை சீதையை முதலில் சந்திக்கும் முன், ஸ்ரீ இராமபிரான் பெருமைகளை மறைந்திருந்து பேசி, அவளைக் கேட்கச் செய்துவிட்டு, அவளைச் சந்தித்தார்.
2. அன்னை சீதையைக் கண்டுவிட்டதை வானத்திலிருந்தே தமது சிம்மநாதத்தால் மனம் நொந்திருந்த வானரர்களுக்குத் தெரிவித்து, அவர்களைப் புத்துணர்வு பெறச் செய்தார்.
3. ‘கண்டேன் சீதையை’ என்று வினைச்சொல்லை முதலில் சொல்லி, ஸ்ரீ இராமபிரானை உயிர்ப்பித்தார்.
4. ஸ்ரீ இலக்குவனை உயிர்ப்பிக்கச் சஞ்சீவனி மலையையே பெயர்த்தெடுத்து வந்தார்.
5. ஸ்ரீ இராமபிரான் 14 ஆண்டுகள் முடிந்து இன்னும் வரவில்லை என்பதால், தீயில் குதிக்க ஸ்ரீ பரதாழ்வான் தயாரானபோது, "ஸ்ரீ இராமபிரான் திருவயோத்தி திரும்பிவிட்டார்," என்ற செய்தியை ஸ்ரீ பரதாழ்வானுக்கு ஸ்ரீ அனுமன் மெதுமெதுவே எடுத்துச் சொன்னாராம்! ஏனெனில், அவ்வளவு மகிழ்ச்சி தரும் செய்தியைப் பட்டென்று உடைத்தால், ஏங்கியிருக்கும் ஸ்ரீ பரதாழ்வான் உயிரையே விட்டிருப்பாராம். அதற்கேற்ப, ஸ்ரீ அனுமன் மெதுமெதுவே தெரிவித்ததற்கே ஸ்ரீ பரதாழ்வான் மூர்ச்சை ஆகிவிடுகின்றார்.

ஸ்ரீ அனுமனுக்கு இணை ஸ்ரீ அனுமனே!

முத்தான மெய்யடியாருக்கு முத்துமாலை!

ஸ்ரீ இராமபிரானின் பட்டாபிஷேகம் அன்று, அன்னை சீதையும், ஸ்ரீ இராமபிரானும் ஸ்ரீ அனுமனுக்கென்றே ஒரு முத்து ஆரத்தை அணிவிக்கின்றனர். அவரிடமே புத்திக்கூர்மையும், செயல்திறனும், நற்புகழும், பணிவும் குடிகொண்டிருப்பதாக அவர்கள் ஸ்ரீ அனுமனைப் பாராட்டுகின்றனர்! இதைவிடச் சிறப்பும் உண்டோ?

Image Source: https://in.pinterest.com/pin/4714774599458302/

---

ஏன் ஸ்ரீ அனுமனுக்கு மட்டும் இப்பேரருள் கிட்டியது?

Image Source: https://in.pinterest.com/pin/476537204333288463/

மற்ற வானரர்களும் ஸ்ரீ இராமபிரானுக்குத் தொண்டுகள் செய்தனர். ஏன் ஸ்ரீ அனுமனுக்கு மட்டும் இவ்வளவு கௌரவம்? இதற்கு ஸ்ரீ இராமானுசர் தரிசனத்தில் ஆசாரியர்கள் மிக மிக நுட்பமான ஒரு உண்மையைத் தெரிவிக்கின்றனர்:

கிஷ்கிந்தா காண்டத்தில், சர்க்கம் எட்டில், ஒரு கட்டத்தில், ஸ்ரீ சுக்கிரீவர் ஸ்ரீ இராமபிரான் அமர ஒரு மரக்கிளையை முறித்துப் போடுகின்றார். தாமும் அதில் அமர்கின்றார். ஆனால், ஸ்ரீ இலக்குவனுக்கு அவர் எந்த ஆசனமும் அளிக்கவில்லை. ஆனால், ஸ்ரீ அனுமனோ ஸ்ரீ இராமபிரான் அமர்ந்த அதே மரக்கிளையில் ஸ்ரீ இலக்குவனும் சரிசமமாக அமரமாட்டார் என அறிந்து, அவர் ஸ்ரீ இலக்குவனுக்குத் தனியே ஒரு மரக்கிளையை முறித்துப் போடுகின்றார்!

ஸ்ரீ இலக்குவன் அன்னை சீதைக்கும் ஸ்ரீ இராமபிரானுக்கும் தொண்டு புரிவதையே தமது உயிராகக் கொண்டவர். அப்படிப்பட்ட அடியவரைத் தக்கபடி மதித்ததே ஸ்ரீ அனுமனை ஸ்ரீ இராமபிரானின் திருவுள்ளத்தில் உயர்த்தியது. இன்று ஸ்ரீ இராமபிரானுக்கும் இல்லாத புகழ் ஸ்ரீ அனுமனுக்கு இருப்பதற்கு ஸ்ரீ இராமபிரானின் இந்த மகிழ்ச்சியே காரணம்.

திருமாலடியாரைப் பூசிப்பவர்கள் செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புறுவர்!

---

முடிவுரை

ஸ்ரீ கருடாழ்வாரைப் போல, ஸ்ரீ அனுமனும் ஸ்ரீ இராமபிரானைத் தோள்களில் தூக்கியதால், ஸ்ரீ இராமானுசர் தரிசனத்தில் ஸ்ரீ அனுமனைத் “திருவடி” என்றே போற்றுவர்.

இன்றளவும், ஸ்ரீ அனுமன் ஸ்ரீ இராமபிரானின் மகிமையிலேயே மயங்கி, ஸ்ரீ வைகுந்தமும் வேண்டாமென்று, இப்பூவுலகில் எங்கெல்லாம் ஸ்ரீ இராமனின் திருநாமம் பாடப்படுகின்றதோ, எங்கெல்லாம் ஸ்ரீமத் இராமாயணம் படிக்கப்படுகின்றதோ, எங்கெல்லாம் ஸ்ரீ இராமபிரானின் திருக்கல்யாண குணங்கள் போற்றப்படுகின்றதோ, அங்கெல்லாம் சிரத்தின் மேல் கூப்பிய கரங்களுடனும், ஆனந்தக் கண்ணீர் பொழியும் திருக்கண்ங்களுடனும் எழுந்தருளுகின்றார்!

Image Source: https://in.pinterest.com/pin/94012710958049750/

அந்த ஸ்ரீ அனுமனின் திருவடிகளுக்கும், ஸ்ரீ அனுமனின் அடியார்களின் திருவடிகளுக்கும் "போற்றி! போற்றி! போற்றி!" என்று காப்பிடுவோம்.

வாழி எதிராசன்! வாழி எதிராசன்! வாழி எதிராசன்!
மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://www.youtube.com/c/SriYadugiriYathirajaMutt https://velukkudidiscourses.com/ https://velukkudi.tv/stream/ https://www.youtube.com/c/Geethacharyan "Thirukkovalur Sridharan Sudarsan" YouTube Channel பொலிக! பொலிக! பொலிக!

---

பெருப்பெருத்த பெருமையுடைய பெரியாழ்வார்

பெருப்பெருத்த பெருமையுடைய பெரியாழ்வார்

Image Source: https://4krsna.files.wordpress.com/2008/07/dsc00418.jpg

முன்னுரை

ஆழ்வார் திருமகளார் ஆண்டாள் அருளிய திருப்பாவையில் எம்பெருமானின் ஒரு திருநாமத்தை 3 முறை ஓதியுள்ளாள் - "கூடாரை வெல்லும் சீர்க் கோவிந்தா!", "குறை ஒன்றும் இல்லாத கோவிந்தா!", "இற்றைப் பறை கொள்வான் அன்று காண் கோவிந்தா!" என்ற வரிகளை நம்மில் பலரும் அறிந்திருப்பர்.

ஆனால், பெரியாழ்வார் பெற்றெடுத்த பெண்பிள்ளைக்கு "கோவிந்தா" என்ற பகவானின் திருநாமத்தைக் காட்டிலும், அவளுக்கு ஸ்ரீ கோவிந்தனைக் காட்டிக்கொடுத்த அவளுடைய ஆசாரியரான ஸ்ரீ பெரியாழ்வாரின் திருநாமத்தின் மீது அன்பும், மதிப்பும் விஞ்சி இருக்கும்.

இதனைப் பறைசாற்ற ஸ்ரீ மணவாள மாமுனிகளுடைய வாழ்க்கை வரலாற்றில் ஒரு சுவையான நிகழ்ச்சி:

ஸ்ரீ இராமாநுசரின் 74 ஸிம்ஹாஸன அதிபதிகளுள் ஒருவரான ஸ்ரீ நடுவிலாழ்வானுடைய திருவம்சத்தில் திருவவதரித்த ஸ்ரீ கோவிந்த தாசர் என்பவர், ஸ்ரீ மணவாள மாமுனிகளுடைய திருவடிகளில் தஞ்சம் புகுந்தார்.

ஒரு முறை, ஆழ்வார் திருமகளார் ஆண்டாளது தீர்த்தப் பிரசாதத்தை, அணி புதுவையாம் ஸ்ரீவில்லிபுத்தூரிலிருந்து, ஸ்ரீ மணவாள மாமுனிகளுக்கு மிக்க ஆதரத்துடன் ஸ்ரீ கோவிந்த தாசர் கொண்டு வந்தார். இதனால் மிகவும் உகந்த ஸ்ரீ மணவாள மாமுனிகள், பட்டர்பிரான் கோதையின் திருவுள்ள உகப்புக்கு, “பட்டர்பிரான் தாசர்” என்று ஸ்ரீ கோவிந்த தாசருக்குப் புதிய திருநாமம் சூட்டினார்! இவரே துறவறம் ஏற்ற பின் ஸ்ரீ மணவாள மாமுனிகளுடைய 8 தலையாய சீடர்களுள் ஒருவரான “ஸ்ரீ பட்டர்பிரான் ஜீயர்” எனத் திகழ்ந்தார்.

இதனால், பைங்கமலத் தண்தெரியல் பட்டர்பிரான் கோதையின் திருவுள்ளம் உகக்கவேண்டும் என்றால், அவளுடைய ஆசாரியரும், திருத்தகப்பனாரும் ஆகிய ஸ்ரீ பெரியாழ்வாரின் பெருமையைப் பாடவேண்டும் என்று தேறுகின்றது!

மார்கழி மாதம் என்றாலே திருப்பாவை பாடிய செல்வி நம் மனங்களில் கோப்புடைய சீரிய சிங்காதனத்தில் எழுந்தருளிவிடுவாள். அதிலும், இன்று சுவாதி திருநட்சத்திரம். நல்முத்தை நல்கும் சுவாதி திருநட்சத்திரத்திலேயே பட்டர்பிரான் கோதையின் திருத்தகப்பனாராகிய ஸ்ரீ பெரியாழ்வார் [ஆனி மாதத்தில்] தோன்றினார்.

ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 16, 17

அதனால், இந்நன்னாளிலே இடும் இந்தப் பதிவு, விட்டுசித்தன் கோதையின் திருவுள்ளம் பெருமகிழ்ச்சி அடைவதற்காகவே, ஸ்ரீ பெரியாழ்வாரின் ஏற்றத்தை ஓரளவு பேச முற்படுகின்றது. இதைச் சுவைக்கும் ஒவ்வொருவருக்கும் சூடிக்கொடுத்த சுடர்க்கொடியின் திருவருள் முழுவதும் கிட்டட்டும் என வேண்டுகின்றேன்.

---

மங்களாசாசனம் என்றால் என்ன?

Image Source: https://kazhiyurvaradanblog.in/2015/01/13/oh-my-lovely-lord-my-chella-pillaay-please-come-and-sit-on-my-lap/

மங்களம் + ஆசாசனம் = மங்களாசாசனம். ஒருவருக்கு நன்மை நடக்கவேண்டும் என வாழ்த்துவதே "மங்களாசாசனம்" ஆகும்.

நம்மைக் காட்டிலும் ஆன்மீக ஆற்றலில், அறிவில், வயதில், குணத்தில் பெரியவர்கள், "நூறாண்டு வாழ்வாய்," "வரப்புயர" போன்ற சொற்களால் நம்மை வாழ்த்துவது நமக்கு உண்மையிலேயே மங்கலங்களைக் கொடுக்கும் என்று சாத்திரங்கள் முழங்குகின்றன.

"தேர்வில் நல்ல மதிப்பெண்களைப் பெறுவாய்!" என்று ஒருவன் தன் நண்பனை வாழ்த்துவதும், "நம் தலைவன் புகழ் ஓங்கட்டும்!" என்று ஒரு தொண்டன் தன் தலைவனை வாழ்த்துவதும் சராசரி மனிதர்களிடையே கூட நாம் காண்கின்றோம்! இது வாழ்த்துபவரின் நல்ல எண்ணத்தை வெளிப்படுத்தினாலும், அந்த வாழ்த்து மெய்யாகவே பலிக்கும் என்று சொல்லமுடியாது. இருப்பினும், அந்த எண்ணத்தால் எல்லோரும் நெகிழ்கின்றனர்.

இன்னொருவர் நன்றாக வாழவேண்டும் என்று மெய், நா, மனத்தால் வாழ்த்தும் இந்த நல்ல மனப்பான்மையை இறைவனுக்கும், குருமார்களுக்கும், சான்றோர்களுக்கும் நாம் அர்ப்பணித்தால், இந்த நல்ல மனப்பான்மை ஒப்பற்ற நிறம் பெறுகின்றனது. அதனால், நம் ஆன்மா செம்மை அடைகின்றது.

பரமபுருடனுக்கு மெய்யடியார்கள் செய்யும் மங்களாசாசனத்தைத் தமிழ் மொழியில் "பல்லாண்டு பாடுதல்," "வாழ்த்துதல்," "காப்பிடுதல்" என்று கூறுவர்.

தூய மங்களாசாசனம் செய்யும் அடியவரின் மனநிலையும் செய்கையும் - ஒரு எடுத்துக்காட்டு:

ஸ்ரீ இராமானுசர் திருநாராயணபுரம் என்ற மேல்கோட்டையில் 12 ஆண்டுகள் எழுந்தருளியிருந்தார். திருநாராயணன் என்ற மூலவர் பெருமானையும், ஸ்ரீ இராமானுசரின் திருமடியில் ஏறி அமர்ந்த ஸ்ரீ செல்வப்பிள்ளை என்ற உற்சவர் பெருமானையும் திருப்பிரதிஷ்டை செய்தார். பின், திருவரங்கத்தில் சோழனால் ஏற்பட்ட ஆபத்து நீங்கியது என அறிந்தவுடன், திருவரங்கம் நோக்கிப் புறப்பட்டார். அப்போது, திருநாராயணபுரத்தில் வாழும் அடியார்களுக்கு ஸ்ரீ இராமானுசர் ஒரு திருக்கட்டளையிட்டார்: "நம் செல்வப்பிள்ளை கிணற்றின் அருகே விளையாடும் குழந்தை போல இருக்கும். கவனமாகப் பார்த்துக்கொள்ளுங்கள்," என்றார்!

---

பரமபுருடனுக்கு அடியார்கள் மங்களாசாசனம் செய்வது தகுமா?

Image Source: http://www.parabrahmaa.com/lokas.htm

திருமாலுக்கு உள்ள பற்பல திருநாமங்களுள் "பகவான்" என்ற திருநாமம் ஒன்று. "பக" என்பது 6 குணங்கள் - ஞானம், பலம், வீர்யம், சக்தி, தேஜஸ், ஐச்வர்யம். புருஷோத்தமனான திருமால் இந்த 6 குணங்களையும் எல்லையற்ற அளவில், அனைத்து காலங்களிலும் கொண்டிருக்கிறார். இவ்வாறு இருக்கையில்:

1. பிறவிச்சுழலில் போராடிக்கொண்டிருக்கின்ற ஒரு ஜீவன், பரமனுக்கு மங்களாசாசனம் செய்யத் தகுதியுள்ளவரா?
2. ஒரு ஜீவன் முக்தி நிலையை எய்திவிட்டாலும் கூட, அந்த ஜீவன் பரமனுக்கு ஆட்பட்டு, அவனது திருவடி நிழலில் ஒதுங்கும் என்பதே என்றும் மாறாத உண்மையாக இருக்க, பரமனுக்கு மங்களாசாசனம் செய்ய முக்தி அடைந்த ஜீவர்களுக்குத் தகுதியுள்ளதா?
3. பிறவிச்சுழலில் என்றும் சிக்காமல், நித்யசூரியாக எப்போதும் பரமபதத்தில் இருந்தாலும், அவர்களுக்கும் பரமனுக்கு ஆட்பட்டு இருக்கும் தன்மை என்றும் மாறாது ஆகையால், பரமனுக்கு மங்களாசாசனம் செய்ய நித்யசூரிகளுக்கும் தகுமா?

இவ்வினாக்களுக்கு ஸ்ரீ எம்பெருமானார் தரிசனத்து ஆசாரியர்கள், அவர்களுக்கே உரிய தெய்வீகப் பாணியில், தெளிவைப் பிறப்பிக்கிறார்கள்!

---

ஞான தசையும் பிரேம தசையும்!

Image Source: https://in.pinterest.com/pin/365495326021223781/

இறைபக்தியில் ஆழ்ந்திருக்கும் ஒவ்வொரு ஜீவனுக்கும் 2 நிலைகள் உண்டு:

1. ஞான தசை:
   
   இறைவனின் திருக்கல்யாண குணங்களான அனைத்தும் அறியும் தன்மை, எங்கும் நிறைந்திருக்கும் தன்மை, சர்வவல்லமை படைத்த தன்மை ஆகியவற்றை உணர்ந்து, "அவனே என் உயிர்க்காவலன்" என்று இருப்பர்.
   
   
2. பிரேம தசை:
   
   இறைவனுடைய திருமேனியின் எல்லையற்ற வடிவழகு மற்றும் எல்லையற்ற மென்மை ஆகியவற்றால் மூழ்கடிக்கப்பட்டு, "அந்தோ! இவனுக்கு எந்தத் தீமையும் நேரக்கூடாதே!" என்று மிகப் பெரிய அச்ச உணர்வை எய்தி மயங்கியிருப்பர். இந்த நிலையிலேயே, "பரமனே என்னைக் காப்பவன்" என்ற எண்ணம் மாறி, "நாம் பரமனைக் காக்கவேண்டும்!" என்ற எண்ணம் தலையெடுக்கும்!

பிரேம தசையின் சில பண்புகள்:

1. அச்சமோ, சந்தேகமோ ஏற்படக் காரணமே இல்லாத ஒரு மகிழ்ச்சியான சூழ்நிலையில் கூட, பிரேம தசையில் இருப்பவர்களுக்கு "எம்பெருமானுக்கு ஒரு குறையும் நேரக்கூடாதே!" என்ற அச்சம் மேலிடும். "இவன் எம்பெருமானுக்குத் தீங்கு செய்பவனோ??" என்று நல்லோரையும் சந்தேகிக்கும் குணம் கூட சில தருணங்களில் வெளிப்படும்!
   
   
2. பிரேம தசையின் செயல்பாடு எம்பெருமான் எங்கு இருக்கின்றான் என்பதைப் பொருத்து அல்ல:
   
   அதாவது, திருநாடு [எ] வைகுந்தம், திருப்பாற்கடல், திருவயோத்தி, திருவடமதுரை, திருத்துவாரகை, அடியார்களின் இதய கமலம், திருவரங்கம், திருவேங்கடம் என்று எம்பெருமானின் இருப்பிடம் எதுவாயினும், பிரேம தசை மேலிட்டு எம்பெருமானுக்குப் பல்லாண்டு பாடுவது சாலச் சிறந்ததே.
   
   
3. பிரேம தசையின் செயல்பாடு அடியார்களின் நிலையைப் பொருத்து அல்ல:
   
   அதாவது, முக்தி அடையாத அடியாராக இருக்கலாம்; முக்தி அடைந்த அடியாராகவும் இருக்கலாம்; வைகுந்தத்தில் எப்போதும் வசிக்கும் அடியாராகவும் இருக்கலாம் - எந்த நிலையிலும், பிரேம தசை மேலிட்டு எம்பெருமானுக்குப் பல்லாண்டு பாடுவது சாலச் சிறந்ததே.
   
   

ஒரு எடுத்துக்காட்டு:

தெய்வத்தேவகியும், வசுதேவரும் தங்கள் எட்டாவது திருமகன், கஞ்சன் வயிற்றில் நெருப்பென்ன நிற்க வந்திருக்கும் நெடுமால் என அறிந்தும், அவனைக் கண்டவுடன் அதை மறந்தனர். "ஐயனே! கம்சன் வருவதற்குள் திருவாழியை மறைத்துக்கொள்ளுங்கள்!" என்றார் வசுதேவர். "ஐயனே! நான்கு திருத்தோள்களை மறைத்து, இரண்டு திருத்தோள்களுடன் காட்சி அளியுங்கள்!" என்றாள் தேவகி.

பிரேம தசையின் ஒரே குறிக்கோள் எம்பெருமானும், எம்பெருமானின் அடியார்களும் எவ்விதமான குறையும் இன்றி, மிகவும் சுகமாக இருக்க வேண்டும் என்பதேயாம்.

---

புருடோத்தமனுக்கு மங்களாசாசனம் செய்வதன் பயன்

Image Source: https://in.pinterest.com/pin/32721534780924572/

"'பல்லாண்டு பல்லாண்டு' என்று பாடினால் எம்பெருமானுக்கு என்ன பயன்?!" என்றும் கேட்பவர் இருக்கலாம். இதற்கும் விடை அளித்துள்ளனர் செந்தமிழ் வேதியர்களான நம் ஆசாரியர்கள்!

எம்பெருமானுக்குத் திருவிளையாடல்கள் புரிவதென்றால் மிகவும் இன்பம். ['அது சரி' என்கிறீர்களா?] அவனுடன் எதிர்த்துப் போரிடும் அசுரர்களிடம் காரணமின்றி அடி வாங்குவது, திருக்கோயில்களில் அவனுக்கு நடக்கும் அநீதி கண்டும் காணாக்கண்ணிட்டு இருப்பது போன்றவற்றைச் செய்வான். அப்பொழுது மெய் அடியார்கள் அவனுக்குப் பல்லாண்டு பாடினால், அவர்களுக்காகத் தனது திருவிளையாடலை நிறுத்தி, தனது உண்மையான சக்தியை வெளிப்படுத்துவான்!

ஒரு எடுத்துக்காட்டு:

தூய பெருநீர் யமுனையுள், காளியன் மாயனைக் கட்டியபோது, மன்னு வடமதுரை மைந்தனும் ஆடாது அசங்காது இருந்தான். ஏரார்ந்த கண்ணி யசோதையும், நாயகனாய் நின்ற நந்தகோபனும், மற்றுமுள்ள திருவாய்ப்பாடி மக்களும் அழுதனர், அரற்றினார். ஸ்ரீ தேவாதிதேவனுக்குக் காளியனால் எந்த ஆபத்தும் இராது என்பதை நன்கு அறிந்த செம்பொற்கழலடிச் செல்வரான பலதேவர், "மாமாயா! மாதவா! எல்லோரும் கலங்கியுள்ளனர். [நீ இப்படி மெளனமாக இருந்து திருவிளையாடல் செய்தது] போதும். வெளியே வா!" என அழைக்க, செற்றார்க்கு வெப்பம் கொடுக்கும் விமலனும் காளிங்க நர்த்தனக் கண்ணனாகக் காட்சியளித்தான்.

குறிப்பு: திருக்கோயில்களுள் எம்பெருமான் நலமாக இருத்தல் வேண்டும் என விரும்புவோர், பாசுரங்கள், மங்களச் சுலோகங்கள் போன்ற மகான்களின் திருவாக்குகளைக் கொண்டு ஆர்வமுடன் வேண்டினால், நம் வேண்டுகோளை எம்பெருமான் நிச்சயமாக நிறைவேற்றுவான்.

---

பரமனுக்கு மங்களாசாசனம் செய்தவர்கள் - சில எடுத்துக்காட்டுக்கள்

Image Source: https://www.allgodscollections.com/2014/04/sri-sita-rama-kalyanam-live-web.html

கொழுகொம்பு இல்லாத முல்லைக்கொடியைக் கண்ட பாரி மன்னன், தனது தங்கத் தேரினை அதற்கு ஈந்தான். மழைமேகத்தைக் கண்டு தோகையைக் குலுக்கிய மயிலைக் கண்ட பேகன் எனும் அரசன், அதற்குப் போர்வை போர்த்தினான். மேலோட்டமாக இவை அறிவு கலங்கிச் செய்த செயல்களாகத் தோன்றினாலும், இச்செயல்களின் அடிப்படையான கருணையைக் கொண்டே இவர்களைக் கடை எழு வள்ளல்களுள் இருவரெனப் போற்றுகின்றனர்.

இதற்கு ஒப்பான மனநிலையுடன், திருமாமகள் கேள்வனுக்கு நன்மையே நடக்கவேண்டும் என்று வாழ்த்தியவர் பலருண்டு.

மங்களாசாசனம் செய்தவர்	மங்களாசாசனம் செய்த தருணம்
கோசலை [கௌசல்யை]	தாடகை, சுபாகு ஆகிய அரக்கர்களை வென்றது, ஈசனுடைய வில்லை முறித்தது, பரசுராமனின் கர்வத்தை அடக்கியது போன்ற ஸ்ரீ இராமபிரானின் சாகசங்களை அறிந்தும் ஸ்ரீ இராமபிரான் வனத்திற்குப் புறப்பட்டபோது. "உனக்கு எல்லா மங்களங்களும் நடக்கட்டும்!" என்றார்.
தயரதர்	தாடகை, சுபாகு ஆகிய அரக்கர்களை வென்றது, ஈசனுடைய வில்லை முறித்தது போன்ற ஸ்ரீ இராமபிரானின் சாகசங்களை அறிந்தும், பரசுராமனின் எதிர்ப்பு வந்தபோது, "சிறு குழந்தை ஸ்ரீ இராமனுக்கு ஆபத்து நேர்ந்ததே!" என மயங்கி விழுந்தார்.
விசுவாமித்திரர்	"ஸ்ரீ இராமன் யார் என நான் அறிவேன்! அவனுக்கு எந்த ஆபத்தும் நேராது!" என்று தயரதன் சபையில் முழங்கியவர், தாடகை ஸ்ரீ இராமபிரானை எதிர்த்து ஓடி வந்தபோது பதறி, "இராகவா! உனக்கு மங்களம் உண்டாகட்டும்!" என்று ஆசி கூறினார்.
ஜனகர்	ஸ்ரீ இராமபிரானின் வீரச் செயல்களை நன்கு அறிந்தும், தமது திருமகளாரை அவருக்குத் திருமணம் முடித்துக் கொடுக்கும்போது, "உங்களுக்கு மங்களம் உண்டாகட்டும்!" என்று திவ்ய தம்பதியினருக்குக் காப்பிட்டார்.
ஜனகன் பெற்ற அன்னம் [சீதை]	ஸ்ரீ இராமபிரானின் தோள்வலிமையை நன்கு அறிந்தவளாய் இருந்தும், கைகேயியின் அந்தப்புரத்திற்கு ஸ்ரீ இராமபிரான் புறப்பட்டபோது, அவருக்கு மங்களம் பாடிக்கொண்டே பின் சென்றாள்.
குகப் பெருமாள்	ஸ்ரீ இலக்குவன் ஸ்ரீ இராமபிரானைத் தொடர்ந்து கானகம் வந்தனன் என அறிந்தும், "இவனால் ஸ்ரீ இராமபிரானுக்கு ஆபத்து நேருமோ?" என ஐயம் கொண்டார். அவரது வேடக்கூட்டத்தைச் சேர்ந்தவர்களும், "நம் கூட்டத்தின் தலைவரால் ஸ்ரீ இராமபிரானுக்கு ஆபத்து நேருமோ?" என ஐயம் கொண்டனர்!
தண்டகாரண்ய முனிவர்கள்	"ஸ்ரீ இராம! அரக்கர்களிடமிருந்து எங்களைக் காப்பாற்றுவாய்!" என வேண்ட வந்தவர்கள், "ஸ்ரீ இராமபிரானின் வடிவழகில் மிகவும் ஈடுபட்டு, "ஸ்ரீ இராமா! உனக்கு மங்களம் உண்டாகட்டும்!" என வாழ்த்தினர்.
பெரிய உடையார் என்ற ஜடாயு	இராவணனுடன் போரிட்டுத் தம் உயிரை இழக்க இருந்த தருணத்திலும், "ஸ்ரீ இராமா! சீதையை நிச்சயம் திரும்பப் பெறுவாய்! நீண்ட ஆயுளுடன் இருப்பாயாக!" என வாழ்த்தினார்.
திருவடி என்ற அனுமன்	ஸ்ரீ இராமபிரானைக் கண்ட அக்கணமே, "இவர் சுக்கிரீவ மகாராஜனுக்குத் தக்க துணையாக இருப்பார்!" என முடிவு செய்தபோதும், "ஸ்ரீ இராமபிரானின் திருத்தோள்கள் எல்லோரும் காணும்படி இருக்கின்றனவே! அவற்றுக்கு ஒரு கண்ணெச்சில் படாமல் இருக்கவேண்டுமே!" என எண்ணி, "தாங்கள் அணிகலன்களால் தங்களது திருத்தோள்களை ஏன் மறைக்கவில்லை?" என்று வினவினார்.
சுக்கிரீவ மகாராஜர்	ஸ்ரீ இராமபிரானின் ஆற்றலை நேரில் கண்டவர் என்ற போதும், ஸ்ரீ விபீடணன் வந்து அடைந்தபோது, "இவரால் பெருமாளுக்கு ஆபத்து ஏற்படுமோ?" என அஞ்சினார்.
நந்தகோபர்	தமது திருமகனான ஸ்ரீ கண்ணபிரான் பூதனையை முடித்தான் என்று கேள்வியுற்றபோதும், "பகவானே! கோவிந்தா! என் குழந்தைக் கண்ணனைக் காப்பாற்றுவாய்!" என வேண்டினார்.
விதுரர்	பரம்பொருளே ஸ்ரீ கண்ணனாகத் திருவவதரித்தார் என்று அறிந்தபோதும், ஸ்ரீ கண்ணபிரான் தமது குடிலுக்கு எழுந்தருளியபோது, “துரியோதனின் சோற்றை உண்ணும் நான், எம்பெருமானுக்குப் பொய் ஆசனம் இட்டுள்ளேனோ?” என்று தம்மையே சந்தேகித்தாராம்!

மேற்கூறிய ஒவ்வொரு அற்புதமான பக்தரின் ஒவ்வொரு செயலும், எம்பெருமான் மீது அவர்கள் வைத்த மிகத் தூய்மையான அன்பின் வேகத்தால், தங்களை மீறிச் செய்யப்பட்டது.

இவர்கள் வாழ்த்தியதைக் காட்டிலும் எம்பெருமானால் மயர்வற மதிநலம் அருளப்பெற்ற ஆழ்வார்கள் மேலும் உருக்கமாக வாழ்த்துவராம். ஏனெனில், தம் முயற்சியேதும் இல்லாமல், எம்பெருமானது காரணமற்ற கருணையால் சிறப்பான அருள் பெற்றவர்கள் ஆழ்வார்கள் என்பதால், அவர்கள் பெற்ற ஞானமும் குறையற்றதாக இருக்குமாம். அவ்வாழ்வார்களிலும், ஸ்ரீ பெரியாழ்வாரே மங்களாசாசனத்தில் உயர்ந்தவராம். காரணம்? மேலே காண்போம்.

---

பெரியாழ்வாருடைய மங்களாசாசனத்தின் தனிச்சிறப்பு

Image Source: http://tamil.sampspeak.in/2019/07/aani-swathi-aani-garudan-and-sri.html

முதலாழ்வார்கள் காலத்தால் மூத்தவர்கள். ஸ்ரீ நம்மாழ்வார் ஆழ்வார்களின் தலைவர். எனினும், பல்லாண்டு பாடிய ஸ்ரீ விட்டுசித்தருக்கே "பெரிய ஆழ்வார்" என்ற பெயர் ஏற்பட்டது. அதற்கான காரணங்களை ஆசாரியர்கள் விளக்கியுள்ளனர்: ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 18, 20 காரணம் # 1: "எம்பெருமானே! நாங்கள் காண வாராதே!" என்பார்!   மற்றுள்ள ஆழ்வார்கள் ஸ்ரீ பெரியாழ்வார் எம்பெருமானைக் காணவேண்டும் எனத் துடிப்பர். எல்லோரும் காண எம்பெருமான் தானே முன் வந்து நின்றாலும், "அந்தோ! இவனுக்குக் கண்ணெச்சில் பட்டால் என் ஆவது!" என்று துடிப்பார். தாம் எம்பெருமானைக் கண்டு மகிழ்வதைக் காட்டிலும், எம்பெருமான் பாதுகாப்பாக இருப்பதே இவ்வாழ்வாருக்கு இன்றியமையாத பயனாம். எம்பெருமானின் வடிவழகிலும், குணங்களிலும் ஆழ்ந்து மயங்கிவிடுவர். எம்பெருமானின் அழகுக்கடலிலோ குணக்கடலிலோ மூழ்காமல், விழித்திருந்து, எப்போதும் எம்பெருமானுக்குப் பல்லாண்டு பாடுவார். இதனால், அவரது இயற்கையான நிலையான "திருமாலால் காக்கப்படுபவர்" என்பது மாறினாலும், இவ்வாழ்வாருக்கு அது ஒரு பொருட்டு அல்ல. எம்பெருமான் அருகில் இருக்கும்போது அன்புடன் புகழ்ந்து பாடுவர். எம்பெருமான் அருகே வராவிடில், பிரிவு ஆற்றாமையால் எம்பெருமானையும், சில நேரங்களில் அடியார்களையும் ["ஏன் கருடாழ்வாருக்குப் பறக்கத் தெரியவில்லையா?" என்பது போலக்] கோபிப்பர். "பல்லாண்டு பல்லாண்டு", "அடியோமோடும் நின்னோடும் பிரிவின்றி ஆயிரம் பல்லாண்டு" என்று மட்டுமே முழங்குவார். இவர்களை வாழச் செய்பவை: எம்பெருமானைக் காண்பது; தழைக்கச் செய்பவை: எம்பெருமான் வடிவழகையும் குணங்களையும் அனுபவிப்பது, அவனுக்குத் தொண்டு செய்வது, பல்லாண்டு பாடுவது. இவருக்கு வாழ்ச்சி அளிப்பதும், இவரைத் தழைக்கச் செய்வதும் எம்பெருமானுக்குப் பல்லாண்டு பாடுவது மட்டுமே. திருப்பல்லாண்டு முழுவதும் எம்பெருமானுக்குப் பல்லாண்டு பாடுவது மட்டுமே உள்ளது. எம்பெருமானுடைய 1000 திருநாமங்களைக் கூட அவனுக்குப் பல்லாண்டு பாடவே ஓதவேண்டும் என்கிறார் இவ்வாழ்வார்!

காரணம் # 2: காரணமே இல்லாவிடினும் தம் திருக்கண்களையே சந்தேகிப்பார்!

ஸ்ரீ பெரியாழ்வார் - ஸ்ரீ திருப்பல்லாண்டு - பாசுரம் # 1, 2 நற்குணக்கடலான ஸ்ரீ பெரியாழ்வார் எம்பெருமானுக்குப் பல்லாண்டு பாடியபோது, மற்றவர்களின் கண்களை மட்டுமல்ல, தம் திருக்கண்களையே அவர் நம்பவில்லை! "பல்லாண்டு பல்லாண்டு பல்லாயிரத்தாண்டு" என்று தொடங்கி, எம்பெருமானுக்கும், பிராட்டிமார்களுக்கும், திருவாழியாழ்வானுக்கும் பல்லாண்டு பாடி வந்த ஸ்ரீ பெரியாழ்வார், "அந்தோ! நம் கண்ணெச்சில் படுமே!" என்றெண்ணி, தமது திருமுகமண்டலத்தையே திருப்பிக்கொண்டாராம்! அதனாலேயே "இப்பாஞ்சசன்னியம்" என்னாது "அப்பாஞ்சசன்னியம்" என்றாராம்!

காரணம் # 3: அச்சம் தவிர்க்கும் காரணங்களுக்கும் பல்லாண்டு பாடுவார்!

"ஆழ்வீர்! மல்லரை மாட்டிய எமது தோள்களைப் பாரீர்! மங்கலங்களுக்கெல்லாம் தெய்வமான திருமாமகள் பிரியாது வீற்றிருக்கும் எமது திருமார்பைப் பாரீர்! பகைவரை அடக்க அனலை உமிழும் எமது திருவாழியைப் பாரீர்! பகைவரை நடுங்கச் செய்ய முழங்கும் எமது திருச்சங்கைப் பாரீர்! அச்சம் தவிர்ப்பீர்!" என்று ஸ்ரீ பெரியாழ்வாரின் திருவுள்ளத்தை ஆற்ற எம்பெருமான் முயன்றான். ஆனால், ஸ்ரீ பெரியாழ்வாரோ, "மல்லாண்ட திண்தோள் மணிவண்ணா! உன் திருவடிகளுக்குப் பல்லாண்டு! அடியார்களும் நீயும் பிரிவின்றி ஆயிரம் பல்லாண்டு! திருமாமகளுக்கும் [நிலமாமகள், ஆயர்மாமகள் ஆகிய பிராட்டிமார்களுக்கும்] பல்லாண்டு! திருவாழியாழ்வானுக்கும் பல்லாண்டு! அந்தத் திருச்சங்காழ்வானுக்கும் பல்லாண்டு!" என்று எம்பெருமான் "நமக்கு இன்ன காரணங்களால் எந்த ஆபத்தும் ஏற்படாது, ஆழ்வீர்!" என்று சொன்ன அதே காரணங்களுக்கும் சேர்த்தே பல்லாண்டு பாடிவிட்டார்!

காரணம் # 4: வெள்ளம் வடிந்த பின்னும் அணை கட்டுவார்!

என்றோ நடந்த எம்பெருமானின் திருவவதார நிகழ்ச்சிகளுக்கு, ஸ்ரீ பெரியாழ்வார் இன்று வயிறு பிடித்துப் பல்லாண்டு பாடிக் காப்பிடுவர். இத்தன்மையையே ஆசாரியர்கள் "வெள்ளம் வடிந்த பின்னும் அணை கட்டும்" தன்மை என்று போற்றுகின்றனர். ஒரு எடுத்துக்காட்டு: ஸ்ரீ பெரியாழ்வார் - ஸ்ரீ திருப்பல்லாண்டு - பாசுரம் # 6 எம்பெருமான் ஸ்ரீ நரசிம்மமாக வந்து இரணியனின் குடலை அலட்சியமாகக் கிழித்து மாலையாக அணிந்துகொண்டான். இது நடந்தது முதல் யுகமான சத்திய யுகத்தில். இதை நினைத்து ஸ்ரீ பெரியாழ்வார், “திருவோணத் திருவிழவில் அந்தியம்போதில் அரியுருவாகி அரியை அழித்தவனைப் பந்தனை தீரப் பல்லாண்டு பாடுங்கோள்!" என்கின்றார்! ஆழ்வாரின் இச்செயலுக்கு, "பலம் வாய்ந்த பிள்ளையைப் பற்றியே 'இவன் என்ன வம்புக்குப் போவானோ! இவனுக்கு என்ன நேருமோ!' என்று அன்னை அஞ்சுவாள். அதனாலேயே, சிங்கப்பிரானுக்குப் பல்லாண்டு என்கின்றார் ஆழ்வார்," என்று ஆசாரியர் ஸ்ரீ பெரியவாச்சான்பிள்ளை உரை அருளியுள்ளார். என்னே ஸ்ரீ பெரியாழ்வாரின் மாண்பு! "சிங்கப்பிரான் தோன்றியது சுவாதி திருநட்சத்திரம் அன்றோ? பாசுரத்தில் ஸ்ரீ பெரியாழ்வார் 'திருவோணம்' என்றது ஏன்? என்ற கேள்விக்கும் ஆசாரியர் ஸ்ரீ பெரியவாச்சான்பிள்ளை விடையருளுகின்றார்: உண்மையான திருநட்சத்திரத்தைச் சொன்னால் யாரவது ஏவல் பில்லி சூன்யம் செய்துவிடுவார் என்பதால் ஆழ்வார் 'திருவோணம்' என்று மறைத்துச் சொல்கின்றாராம்! நம் போன்றோர் ஏவல் பில்லி சூன்யம் ஆகியவற்றிலிருந்து தப்புவதற்கு ஸ்ரீ சிங்கப்பிரானை வேண்டுவோம். அந்தச் சிங்கப்பிரானுக்கு ஏவல் பில்லி சூன்யம் செய்து விடுவரோ என்று ஸ்ரீ பெரியாழ்வார் அஞ்சுகின்றார். இவ்வாழ்வாரின் பெருமையைப் பேசி முடிக்க முடியுமா?

காரணம் # 5: கண் இமைக்காதவரையும் "உறங்காது எம்பெருமானைக் காப்பீர்!" என்பார்!

சுவர்க்கத்துத் தேவர்களும், ஸ்ரீ ஆதிசேடன், ஸ்ரீ கருடன் போன்ற வைகுந்தத்து அமரர்களும், நம்மைப் போல் கண்களை இமைப்பதில்லை, உறங்குவதும் இல்லை. இவர்களை வணங்கி நன்மையை வேண்டுவதே உலகத்தாரின் இயல்பு. ஆனால், ஸ்ரீ பெரியாழ்வாரோ, 8 திக்பாலர்களையும், வைகுந்தத்து அமரர்களையும், "உறகல்! உறகல்!" என்று பாடி, "விழித்திருந்து எம்பெருமானுக்குக் காப்பு இடுமின்!" என முழங்குவார்: ஸ்ரீ பெரியாழ்வார் - ஸ்ரீ பெரியாழ்வார் திருமொழி - பாசுரம் # 5-2-10

காரணம் # 6: பரமனைக் காக்க, நம் போன்றோரைத் திருத்துவார்!

"பரமபதத்தில் எம்பெருமான் மகிழ்ச்சியுடன் இருப்பதில்லை! மாறாக, எவருடனும் முகம் கொடுத்துப் பேசாமல், ஒரு வெறுமை தோற்ற எழுந்தருளியிருக்கின்றான்," என வேதாந்தம் கூறுகின்றது. காரணம்: அவன் பிள்ளைகளான நம் போன்றோரும் வைகுந்தத்தில் அந்தமில் பேரின்பத்தை அவனுடன் சுவைத்து மகிழ வேண்டியிருக்க, நம் வல்வினையால் இப்பிறவிக்கடலில் அகப்பட்டுத் தவிக்கின்றோம் என்பதே! ஸ்ரீ பெரியாழ்வாரின் முக்கியமான குறிக்கோள்கள்: பல்லாண்டு பாடும் அடியவர்களின் கூட்டத்தை நன்கு வளர்த்து, எம்பெருமானுக்கு இடும் காப்பை நன்கு கனக்கச் செய்வது! எம்பெருமானின் இந்தத் தனிமையைப் போக்கி, அவனது திருமுகமண்டலத்தை மலரச் செய்வது! இதனாலேயே, பல்லாண்டு பாடுவதில் மெய்யான விருப்பம் இல்லாத நம் போன்றோரையும் அழைத்து, "பல்லாண்டு பாடுதுமே!" என்று ஸ்ரீ பெரியாழ்வார் முழங்குகின்றார். தாம் மட்டுமே பல்லாண்டு பாடித் தமது ஆன்மாவை மட்டுமே கடைதேற்றாமல், நமக்கும் அதை ஒரு அருளிச்செயல் வடிவில் கொடுத்து, நம்மையும் பல்லாண்டு பாடவைத்த வள்ளல் ஸ்ரீ பெரியாழ்வார். "ஸ்ரீ பெரியாழ்வாரும், ஸ்ரீ இராமாநுசரும், 'எல்லோரும் வைகுந்தம் செல்லவேண்டும்!' என்று உரைப்பதன் காரணமே, 'பற்பல அடியார்களும் சேர்ந்து பல்லாண்டு பாடினால் எம்பெருமானுக்கு நலம்!' என்று எண்ணுவதாலேயே,” என்று ஆசாரியர்கள் விளக்கியுள்ளனர்!

காரணம் # 7: "பல்லாண்டு பாடுவதன் பயன் என்றென்றும் பல்லாண்டு பாடுவதே," என்பார்!

“பல்லாண்டும் பரமாத்மனைச் சூழ்ந்திருந்தேத்துவர் பல்லாண்டே!” என்று ஸ்ரீ பெரியாழ்வார் திருவாக்கு. "பரமாத்மனைச் சூழ்ந்திருந்து" என்பதன் பொருள் "வைகுந்தத்தில் திருமாமணி மண்டபத்தில் எம்பெருமானுக்குப் பல்லாண்டு பாடப் பெறுவீர்!" என்பதே என ஆசாரியர் ஸ்ரீ பெரியவாச்சான்பிள்ளை விளக்கியுள்ளார். "ஆபத்துக்கள் இருக்கும் இவ்வுலகில் பல்லாண்டு பாடினால், அதில் ஒரு நியாயம் உள்ளது. குறையொன்றுமில்லாத வைகுந்தத்தில் ஏன் பல்லாண்டு பாட வேண்டும்?" - இக்கேள்விக்கும் ஞானப்பெட்டகங்களான நம் ஆசாரியர்கள் விடையருளியுள்ளனர்! பரமபதத்தில் திருவனந்தாழ்வான் [ஸ்ரீ ஆதிசேடன்], அடியார்கள் யாவரும் சேர்ந்து சாம கானம் பாடித் துதிக்கக் கேட்டு, "பலரும் எம்பெருமானைத் தாக்கப் படை திரட்டி வருகின்றனர்!" என அஞ்சி, நஞ்சுப்புகை உமிழ்வராம்! "இது பரமபதம். இங்கே எல்லோரும் மெய்யடியார். தீயோர் நெருங்கமுடியாத இடம்," என எண்ணுவது ஞான தசை. ஆனால், பேரன்பு மடை திறந்த பெருவெள்ளமெனப் பொங்கிவரும் தருணத்தில் ஞானத்திற்கு இடமில்லை - அது பிரேம தசை! எம்பெருமானுக்குப் பல்லாண்டு பாடுவதே வேதப்பயனாம். மறைகளின் சாரமானது திருப்பல்லாண்டு. இதையே ஸ்ரீ மணவாள மாமுனிகளும் அருளியுள்ளார் - வேதத்திற்கு மங்களமான பிரணவம் [ஓம்காரம்] எப்படியோ, அப்படியே ஆழ்வார்களின் அருளிச்செயல்களுக்கு மங்களமானதாம் திருப்பல்லாண்டு என்கின்றார்: ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 19

---

பெரியாழ்வார் பெற்ற பெற்றற்கரிய பெரும்பேறு

Image Source: WhatsApp Forward

இப்படி எம்பெருமானுக்குப் பல்லாண்டு பாடிக்கொண்டே, எம்பெருமான் மிக உகந்த திருத்தொண்டான, திருநந்தவனம் அமைத்து, அதில் திருத்துழாய் வனம் அமைத்து, செண்பகம், இருவாட்சி போன்ற மலர்ச்செடிகளையும் வளர்த்து, எம்பெருமானுக்குப் பூமாலை தொடுத்துக் கொடுக்கும் நற்றவம் செய்து வந்த இவ்வாழ்வாருக்கு, வங்கக்கடல் கடைந்த மாதவன் நாடு புகழும் பரிசாக ஒரு பரிசளித்தான்: திருமாமகளின் நிழலான நிலமாமகளாம் பூமி தேவியே ஸ்ரீ பெரியாழ்வாருக்குத் திருமகளாராக, ஸ்ரீ பெரியாழ்வார் வளர்த்த நாற்றத்துழாய் வனத்திலேயே கிடைக்கச் செய்தான்!

அந்தத் தெய்வக் குழந்தயான கோதை ஆழ்வாரின் திருவளர்ப்பில், அவரைப் போலவே எம்பெருமானுக்கும், அவன் அடியார்களுக்கும் பல்லாண்டு பாடுபவளாய், ஆழ்வார்கள் தம் செயலை விஞ்சி நிற்கும் தன்மையளாய், உயர் அரங்கேற்க்கே கண்ணி உகந்து அளித்தவளாய், உலகம் நிறைந்த புகழால் திகழ, ஸ்ரீ பெரியாழ்வாரும் கோதையால் திருவரங்கம் பெரிய பெருமாளுக்கே மாமனார் ஆகும் பேறு பெற்றார்!

Image Source: Shared on Twitter

---

முடிவுரை

பரமனிடம் கலப்படமற்றதும், ஒப்பற்றதும் ஆகிய பேரன்பைப் பொழிவது எப்படி என்பதற்கு மிகச் சிறந்த முன்மாதிரியாகத் திகழும் ஸ்ரீ பெரியாழ்வாரின் பெருப்பெருத்த பெருமையை ஒரு சிறு கட்டுரையில் அடக்கிவிடமுடியாது. ஆழ்வார் திருமகளார் ஆண்டாளின் திருவுள்ள உகப்பிற்கு ஏதோ ஆன வரை சுவைத்தோம்.

இந்த அற்புதமான ஆழ்வாருக்கும், அவரது அருமையான திருமகளாருக்கும், அவர்களது அடியார்களுக்கும் பல்லாண்டு பாடி நம் நா பெற்ற பயனை அடைவோமாக.


எல்லோரும் இவ்வுலகில் செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புற்று வாழ்ந்து அவ்வுலகில் பல்லாண்டும் பரமாத்மனைச் சூழ்ந்திருந்தேத்த மென்னடை அன்ன வயல் புதுவை ஆண்டாள் அருள் புரிவாளாக.

வாழி எதிராசன்! வாழி எதிராசன்! வாழி எதிராசன்!
மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://www.youtube.com/c/SriYadugiriYathirajaMutt https://velukkudidiscourses.com/ https://velukkudi.tv/stream/ https://www.youtube.com/c/Geethacharyan "Thirukkovalur Sridharan Sudarsan" YouTube Channel பொலிக! பொலிக! பொலிக!

---

நற்கலியன் நவின்ற நவரச நற்றமிழ்

நற்கலியன் நவின்ற நவரச நற்றமிழ்

Image Source: LIFCObooks@twitter

முன்னுரை

ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 8, 9 4 மறைகளுக்குச் சமமாக 4 திவ்யப்பிரபந்தங்களை அருளியவர் வேதம் தமிழ் செய்த மாறன் ஆகிய ஸ்ரீ நம்மாழ்வார். நான்மறைகளுக்கு 6 வேதாங்கங்கள் உள்ளன. அதே போல, ஸ்ரீ நம்மாழ்வார் அருளிய 4 தமிழ் மறைகளுக்கு 6 அங்கங்களாக 6 திவ்யப்பிரபந்தங்களை, கார்த்திகை மாதத்தில் கார்த்திகை நட்சத்திரம் அன்று திருவவதாரம் செய்த ஸ்ரீ திருமங்கையாழ்வார் அருளினார். ஸ்ரீ திருமங்கையாழ்வார் தமது திருவுள்ளத்து உணர்வுகளை மிக அழகாக வெளிப்படுத்தும் பாசுரங்களை அருளியுள்ளார். நமது உணர்வுகளை 9 ரசங்களாகப் பெரியோர் வகுப்பர். ஸ்ரீ திருமங்கையாழ்வாரது திருவவதார உற்சவம் தொடங்கியுள்ள இந்த மங்கலமான காலக்கட்டத்தில், ஒவ்வொரு ரசத்திற்கும் பொருந்தும் பாசுரங்களை, ஆழ்வார் அருளிய 6 அருளிச்செயல்களிலிருந்து சுவைத்து மகிழலாம், வாரீர்! குறிப்பு: ஸ்ரீ திருமங்கையாழ்வார் திருவவதாரம் செய்த கார்த்திக்கை மாதம் கார்த்திகை நடச்சத்திரத்திலிருந்து 'அநத்யயன' காலம் தொடங்கும். அன்றிலிருந்து தை மாதம் ஹஸ்தம் நட்சத்திரம் ஆன்று ஆசாரியர் ஸ்ரீ கூரத்தாழ்வான் திருநட்சத்திரம் கொண்டாடி முடிக்கும் வரை, எந்த ஆழ்வாரின் அருளிச்செயலையும் [ஸ்ரீ இராமானுச நூற்றந்தாதி உட்பட] நம் இல்லங்களில் ஓதக்கூடாது. மார்கழி மாதத்தில் மட்டும் திருப்பள்ளியெழுச்சி, திருப்பாவை ஓதலாம். தை மாதம் ஹஸ்தம் நட்சத்திரம் முடிந்த பின், முன் போல ஓதத் தொடங்கலாம்.

---

ஆனந்த ரசம் [இன்பம்]

ஸ்ரீ திருமங்கையாழ்வார் - திருக்குறுந்தாண்டகம் - பாசுரம் # 13

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

பாசுரத்திற்கு ஆசாரியர் அருளிய உரை: "பழுக்கக் காய்ச்சிய இரும்பு உண்ட நீரும் மறுபடியும் வெளியே நீராக வர இயலும் - இதைக் குறித்துக் கொள்ளுங்கள்! 'இது எப்படி நடக்கும்?!' என்கிறீர்களா? என்னை விட்டுப் பிரிக்க முடியாதபடி, என்னை வாட்டிய கொடுமையான பிணி பாவங்கள் யாவும் அகன்றுவிட்டன! இந்த அதிசயமே நடக்கும் எனில், நான் சொன்ன அதிசயமும் நடக்கலாம்! [முன்பு பயனற்றவையைக் கண்டு களித்து நொந்த என் கண்கள்] வண்டு வாழ் சோலைகளால் சூழப்பட்ட அரங்கமா நகருள் கோயில் கொண்ட கரும்பினை [கரும்பைப் போன்ற மிகவும் இன்பம் பயக்கவல்ல திருவரங்கத்து எம்பெருமானை] என்னுடைய கண்களும் இன்று கண்டு பேரின்ப வெள்ளத்தில் திளைக்கின்றனவே!" என்று ஆழ்வார் மகிழ்ச்சியில் பூரிக்கின்றார்.

---

கருணா ரசம் - முதல் வகை [கருணை, உருக்கம்]

ஸ்ரீ திருமங்கையாழ்வார் - பெரிய திருமொழி - பாசுரம் # 10-4-7

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

ஆசாரியர் ஸ்ரீ பெரியவாச்சான்பிள்ளை உரையில் விளக்குகின்றார்: "பூதனை உன்னைத் 'தன் மகன்' என்று எண்ணி வந்தாள். 'யசோதையே கொடுக்கின்றாள் போலும்!' என்று எண்ணும்படித் தானே தன்னுடைய முலையை உனக்குப் பாலூட்டத் தந்தாள். எனினும், பால் கொடுக்கும் வேடத்தில், மனத்தில் மிகவும் வன்மம் உள்ளவளாய், உனக்கு நஞ்சையே ஊட்டினாள். நீயும் 'இவள் நமது தாயா? அல்லது வேறொருத்தியா?' என்றெல்லாம் ஆராயாமல், 'நஞ்சாகவே ஆகிலும் எனக்குக் கொடுக்கவே வந்தாள்!' என்பதையே பெரிதாக எண்ணி, அந்தப் பிஞ்சுக் குழந்தைப் பருவத்திலும் வலிமை உள்ள மகனாய், அவளது தாய்ப்பாலை மட்டும் அன்றி, அவளது உயிரையே உண்டாய்! இப்படிப்பட்டத் வியக்கவைக்கும் செயல்களைச் செய்து நற்குணங்கள் நிறைந்த நம்பியும் ஆனாய்! உனக்காகவே பிறந்தவளும், ஆயர்க்குலக்கொழுந்தானவளும், 'இயற்கையான பெண்மை' என்ற செல்வத்தை உடையவளும் ஆகிய நப்பின்னைப் பிராட்டிக்குக் கொழுநன் என்ற பெருமை உடையவன் நீ! [குறிஞ்சி, முல்லை, நெய்தல், பாலை ஆகிய] நான்கு வகை நிலங்களுக்கும் அபிமான தேவதை ஆகிய நிலமங்கையாம் பூமிப் பிராட்டிக்கு மணாளன் என்ற பெருமையும் உடையவன் நீ! அதைக் காட்டிலும் ஏற்றம் மிக்கதான பெருமை நீ 'என் மகன்' என்பதே! என்னுடைய தாய்ப்பால் ஆகிய அம்மமே உனக்குக் காவலாக இருக்கும். உனக்குச் சேமம் [நன்மை] விளைவிக்கும். ஆதலால், அம்மம் உண்ண வாராயே!" என்று யசோதைப் பிராட்டியின் மனோபாவத்தில், அன்பும், கருணையும் ததும்பத் ததும்ப, ஸ்ரீ திருமங்கையாழ்வார் கண்ணனை அழைக்கின்றார்.

---

கருணா ரசம் - இரண்டாம் வகை [துயரம்]

ஸ்ரீ திருமங்கையாழ்வார் - பெரிய திருமொழி - பாசுரம் # 4-7-5

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

பாசுர உரையில் ஆசாரியர் அருளியுள்ளவை: "நாடு கொள்ளாத புகழை உடைய வேதம் ஓதுபவர்கள் நிறைந்த ஊர் திருநாங்கூர். அவ்வளவு புகழ் வாய்ந்த வேதியர்கள் யாவரும், நல்ல தருமங்களைத் தாமே செய்து, தங்கள் குறைகளைப் போக்கிக் கொள்வர். அடியேனோ அதுவும் செய்யமுடியாத நிலையில் இருக்கின்றேன். விளக்கு என்பது தன்னைத்தானே காட்டிக்கொடுக்கும். அதுபோல, திருநாங்கூரில் உறையும் நீயே உனது திருமேனி, உனது பெருமைகள், உனது திருநாமங்கள் ஆகியவற்றை [வேதியர்களுக்கு மட்டுமின்றி] வேடர்கள், குரங்குகள், காட்டுமிருகங்கள் ஆகியவற்றுக்கும் காட்டிக்கொடுத்துக்கொண்டு, திருவேங்கடத்தில் எழுந்தருளி இருக்கின்றாய். ஆதலால், தளிர்கள் நிறைந்த பொழில்களால் சூழப்பட்டத் திருவெள்ளக்குளத்தில் உறைபவனே! நின் புகழைப் பாடி வருவேன். உன் திருவுள்ளத்தின் விருப்பப்படியே, உன்னை வெறுக்காமல், அன்புடன் உன் அருகே வருவேன். என்னுடைய வல்வினைகள் யாவற்றையும் உருத்தெரியாமல் அழித்துக் காத்தருளவேண்டும்!" என்று ஸ்ரீ திருமங்கை ஆழ்வார், தமது தாழ்ச்சியை வருத்தத்துடன் விண்ணப்பம் செய்து, திருவெள்ளக்குளத்துள் உறையும் ஸ்ரீ அண்ணன் பெருமாளிடம் உருகுகின்றார்.

---

ரௌத்திர ரசம் [கோபம்]

ஸ்ரீ திருமங்கையாழ்வார் - பெரிய திருமொழி - பாசுரம் # 4-9-4

பின்னணி

ஸ்ரீ திருமங்கையாழ்வார் திருவிந்தளூர் திருத்தலத்திற்கு எழுந்தருளியபோது, திருக்கோயில் நடை சாற்றிவிட்டனர். எம்பெருமானைக் கண்டு, அனுபவித்துப் பாசுரம் பாடப் பேராவலுடன் எழுந்தருளிய ஆழ்வாருக்கு மாபெரும் ஏமாற்றம். அதனால், பொங்கி வந்த கோபத்தில் ஒரு பாசுரம் பாட, தூய அன்பில் தோய்ந்த பாசுரங்களை மேலும் பெறுவதற்கு எம்பெருமானும் ஆழ்வாரின் கோபத்தை மேலும் தூண்டும் வண்ணம் விடைகள் அளிக்க, இந்தப் பதிகம் உருவெடுத்தது. எம்பெருமானின் விடைகளை ஆசாரியரின் உரையில் மட்டுமே கண்டு தெளியமுடியும். பாசுரங்களில் ஆழ்வாரின் அன்புக் கோபம் கொப்பளிக்கும் ரசமான சொற்களே காணமுடியும்.

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

இப்பாசுரம் மிகவும் சுவை வாய்ந்தது. ஆசாரியரின் உரையும் இதற்குத் தகுந்தாற்போல அமைந்துள்ளது. "காசின் ஒளியின் திகழும் வண்ணம் காட்டீர் எம்பெருமான்": உருக்கியதும், மிகத் தூய்மையானதும் ஆகிய பொன்னைக் காட்டிலும் மிகவும் அருமையான திருமேனி வண்ணம் கொண்டவரே! அடியார்களுக்காகவே எடுத்துக்கொண்ட அந்தத் திருமேனியையும், அடியார்களுக்காகவே சாற்றிக்கொண்டிருக்கும் அந்தத் திருவாபரணங்களையும், எம்பெருமானாக [எமக்கு நாதனாக] இருந்தும் நீர் எமக்குக் காட்டவில்லையே! "ஆசை வழுவாது ஏத்தும் எமக்கு இங்கு இழுக்கு ஆய்த்து அடியோர்க்கு": "உம்மைப் போற்றிப் புகழ்ந்து ஏத்தவேண்டும்!" என்ற ஆசை ஒருநாளும் குறையாமல் இருக்கும் உமது அடியார்களான எம் போன்றோருக்கு, நீர் செய்த இந்தச் செயல் மிகவும் இழுக்கு விளைவித்தது காணீர்! எங்களுக்காக நீர் எடுத்துக்கொண்ட திருமேனியை எங்களுக்கே கொடுக்காமல் நீர் மறைத்து வைப்பது என்ன குணம்?! "தேசம் அறிய உமக்கே ஆளாய்த் திரிகின்றோமுக்கு": "எம் போன்றோர் உமக்கே அடிமை" என்கிற உண்மை நம் இருவருக்கு மட்டுமே தெரிந்த ஒரு இரகசியம் அல்ல! இது நாடும் நகரமும் நன்கு அறிந்த உண்மையாகும்! இந்த உண்மையை வாயாரச் சொல்லியே, நாளும் உம்மையே போற்றிக் கொண்டு, நீர் இருக்கும் இடம் எல்லாம் திரிகின்ற எமக்கு நீர் காட்டும் அன்பு இதுதானோ? "வாசி வல்லீர்! இந்தளூரீர்! வாழ்ந்தே போம் நீரே!": நீர் திருவிந்தளூருக்கு வந்ததன் காரணமே எம் போன்ற கடைநிலை அடியாருக்கும் அருள் புரியவே - உமது வடிவழகையும், நற்குணங்களையும் எம் போன்றோரும் ஆழ்ந்து அனுபவிக்கவே! அப்படி இருந்தும், உமது திருமேனியின் பெருமையையும், அடியேனது தாழ்ச்சியையும் கருத்தில் கொண்டு, உமது திருக்கோயில் திருக்கதவை அடைத்துக் கொண்டீரல்லவா? உமது பெருமையையும், எமது சிறுமையையும் கண்டீர் அல்லவா? நீரே உமது வடிவழகைக் கட்டிக்கொண்டு இரும்!

---

அத்புத ரசம் [அற்புதம், வியப்பு]

ஸ்ரீ திருமங்கையாழ்வார் - திருவெழுகூற்றிருக்கை

பின்னணி

இந்த அருளிச்செயலே மிகவும் அற்புதமான ஒரு படைப்பு. இதில் ஸ்ரீ திருமங்கையாழ்வார் எண்களைக் கொண்டு பல சொற்களும் சொற்றொடர்களும் அமைத்துப் பாடியுள்ளார். திருக்குடந்தை என்கிற திருத்தலத்திற்காக இது அருளப்பட்டது. திருக்குடந்தையில் எம்பெருமானின் சந்நிதி ஒரு தேர் போன்ற அமைப்பால் கட்டப்பட்டிருக்கும். இந்த அருளிச்செயலில் ஸ்ரீ திருமங்கையாழ்வார் வரிசையாக அருளியுள்ள எண்களைச் சீராக அமைத்துப் பார்த்தால், இந்த அருளிச்செயலே ஒரு தேர் போன்ற வடிவம் கொண்டது என்பது புலப்படும்! இப்படிப் பாடுவதற்கு 'ரத பந்தம்' என்று பெயர்.

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

'நாலு கவிப் பெருமாள்' என்று புகழ் பெற்ற ஸ்ரீ திருமங்கையாழ்வார் அருளிச்செய்த 'திருவெழுகூற்றிருக்கை' என்ற இந்த அற்புதப் படைப்பில் ஒரு மிகச்சிறிய பகுதியைச் சுவைத்து இன்புறலாம்: ஒப்பற்றதான ஒரு பெரிய திருவுந்தியில் இரு [பெரிதான] தாமரை மலர் ஆசனத்தில் ஒருகால் நான்முகனைப் படைத்தனை ஸ்ரீ இராமபிரானாகத் திருவவதாரம் செய்த ஒரு காலத்தில் சந்திரன் சூரியன் ஆகிய இரு சுடர்கள் வானில் [இராவணனிடம் உள்ள அச்சத்தால்] சஞ்சரிக்க ஒண்ணாததாய் மூன்று மதில்களால் சூழப்பட்டதாய் [விளங்கிய] இலங்கையை இரு நுனிகளும் வளைந்த ஒரு ஒப்பற்ற வில்லாகிய சார்ங்கத்தில் பொருந்தியதும் இரு பற்களை உடையதும் நெருப்பைக் கக்குகின்ற வாயை உடையதுமான அம்பினால் நீறு ஆக்கினை

---

மேல்வரும் பகுதியில் ஸ்ரீ திருமங்கை ஆழ்வார் நாயகி மனோபாவத்தில் பாடியுள்ள பாசுரங்களைக் காண்போம். நாயகி மனோபாவத்தில் ஸ்ரீ திருமங்கை ஆழ்வார் 'பரகால நாயகி' என்று அழைக்கப்படுகின்றார். இந்த மனோபாவத்தில் அவர் தலைவியின் நிலையிலும், தலைவியின் தாயாருடைய நிலையிலும், தலைவியின் தோழியினுடைய நிலையிலும் இருந்து பாசுரங்கள் பாடுவர்.

Image Source: https://pbase.com/svami/image/102841999

சிருங்கார ரசம் [காதல் - தலைவியின் நிலை]

ஸ்ரீ திருமங்கையாழ்வார் - சிறிய திருமடல், பெரிய திருமடல்

பின்னணி

திருநறையூர் திருத்தலத்திற்காக ஸ்ரீ திருமங்கையாழ்வார் அருளிச்செய்த இரண்டு சிறப்பு அருளிச்செயல்களே சிறிய திருமடல் மற்றும் பெரிய திருமடல். திருநறையூர் நம்பி பெருமான் ஸ்ரீ திருமங்கையாழ்வாரின் ஆசாரியர் ஆவார். ஆதலால், இந்தச் சிறப்பு அருளிச்செயல்களை அவருக்காகவே ஆழ்வார் அருளியுள்ளார். திருமடல்கள் இரண்டும் நாயகி மனோபாவத்தில், ஊடல் திறத்தில் பாடப்பட்டவை. ஸ்ரீ பரகால நாயகி என்ற ஸ்ரீ திருமங்கை ஆழ்வார், "என் நிலைமை கண்டு, எம்பெருமான் திருவுள்ளம் இரங்கி, என்னை ஆட்கொள்ளாவிட்டால், 'என்னைக் காதலித்துக் கைவிட்ட கொடியவன் இவனே!' என்று நாடும் நகரமும் நன்கறிய, தெருத் தெருவாக நடந்து, அவனைப் பற்றி எல்லோரும் அறியும்படிச் செய்வேன்!" என்று எம்பெருமானை மிரட்டும் [!] அருளிச்செயல்களே திருமடல்கள்.

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"இவ்வாறு ஒரு பெண்பிள்ளை செய்வது மரபோ?" என்று ஸ்ரீ பரகால நாயகியின் தோழிகளும் அன்னைமார்களும் கேட்க, ஆழ்வார் சிறிய திருமடலில் விடை அளிக்கின்றார்: "வடநாட்டில் வாசவதத்தை என்ற கற்பில் சிறந்த பெண் ஒருத்தி, கால்களில் தளையிட்டுச் சிறைப்படுத்தப்பட்ட வத்சராஜன் என்ற தன் காதலனுடன் சென்றுவிட்டாள். அவளை எல்லோரும் போற்றியே புகழ்ந்தனர். நானும் அவள் வழியே செல்வேன். பதற்றத்தில் இருக்கும் எனக்கு, நீங்கள் யாரும் பொறுமையைக் கற்பிக்காதீர்!" மேலும் பெரிய திருமடலில் தெரிவிக்கின்றார்: "விசுவாமித்திர முனிவர் சொன்னார் என்பதால், தாடகை என்ற பெண்ணைக் கொன்றான். ஸ்ரீமத் இராமாயணம், ஸ்ரீமத் பாகவதம் ஆகிய நூல்களில் இவன் சூர்ப்பணகை என்ற பெண்ணின் மூக்கையும் காதையும் அறுத்த 'பெருமை'யும், பூதனை என்ற பெண்ணின் உயிரைக் குடித்த 'பெருமை'யும் பேசப்பட்டுள்ளன. பெண்களைக் கொடுமைப்படுத்துவதே இவன் 'பெருமை'," என்று தெருத்தெருவாகப் பேசிக்கொண்டு, பனை ஓலையைக் கையில் கொண்டு, மடல் ஊர்வேன். 'இதுவோ இவன் பெருமை!' என்று எல்லோரும் அவனை ஏசும்படிச் செய்வேன்!" என்கிறார்!!

---

சிருங்கார ரசம் [காதல் - தலைவியினுடைய தாயாரின் நிலை]

ஸ்ரீ திருமங்கையாழ்வார் - திருநெடுந்தாண்டகம் - பாசுரம் # 12

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"இவளுக்கு என்ன ஆயிற்று?" என்று வினவும் பெண்டிரிடம், "இந்தப் பெண்பிள்ளையின் மனமானது [எம்பெருமானை நினைத்து] நீர்ப்பண்டமாக உருக, கண்ணீர் பெருகி நிற்கின்றாள். [எம்பெருமானை நினைத்து] மயங்கி விழுகின்றாள். இவள் சோறு உண்ணவில்லை. உறக்கத்தையும் விரும்பவில்லை. 'திருவனந்தாழ்வான் மீது பள்ளி கொண்ட நம்பீ!' என்றும், 'நறுமணம் கமழும் மலர்கள் நிறைந்த கழனிகள் உடைய திருவாலியில் உறையும் இளங்குமரா!' என்றும் அழைக்கின்றாள். அழகிய சிறகுகள் உடைய கருடாழ்வாரைப் போல இவளும் ஆடுகின்றாள்! பாடுகின்றாள். தோழியிடம், 'தோழி! திருவரங்கம் திருக்காவிரியின் படித்துறையில் நாம் நீராடப் பெறுவோமோ?' என்று வினவுகின்றாள். 'அவள் சொற்படி நடவாத ஒரு பெண்பிள்ளையைப் பெற்றாள்!' என்று இம்மாநிலத்தில் ஒப்பற்றதொரு பழியைப் பாவியேன் பெற்றேன்! அந்தோ!" என்று ஸ்ரீ பரகால நாயகியின் தாயார் மனம் இரங்கிக் கூறுகின்றாள். இந்த 'ஒப்பற்றதொரு பழி' மிகவும் போற்றத்தக்கதாம். ஸ்ரீ பரகால நாயகியாகிய பெண்பிள்ளை ஆரோ ஒரு சராசரி ஆடவனுக்குத் தன் மனதைப் பறிகொடுக்கவில்லை. ஸ்ரீ புருடோத்தமன் ஆகிய எம்பெருமானுக்கே தன் மனதைப் பறிகொடுத்துள்ளாள். ஆதலால், "இது ஒப்பற்ற பழியே!" என்று தாய், மேலோட்டமாகப் புலம்புவது போலப் பேசினாலும், உள்ளூர மிக்க பெருமிதத்துடன் கூறுகின்றாள்! சிருங்கார ரசம் [காதல் - தலைவியினுடைய தோழியின் நிலை] ஸ்ரீ திருமங்கையாழ்வார் - பெரிய திருமொழி - பாசுரம் # 11-5-2 பின்னணி   தமது திருவுள்ளத்தில் பெருகும் அனுபவ வெள்ளத்தை ஒருத்தியாக இருந்து பேசமுடியாமல், ஸ்ரீ திருமங்கையாழ்வார் தம் ஒருவரையே இரண்டு தோழிகளாகப் பாவித்துக்கொண்டு பாடிய பாசுரங்கள் நிறைந்த பதிகம் ஆதலால் இந்தப் பதிகம் தோழி நிலையிலும் ஒரு சிறப்பான நிலையாம். இப்பதிகத்தில் இடம் பெற்றுள்ள ஒரு பாசுரத்தைக் காண்போம். ஆசாரியர் ஸ்ரீ பெரியவாச்சான்பிள்ளை உரை - சுருக்கம்   முதல் தோழி கூறுவதாவது: "ஆறு பிள்ளைகளைக் கொடியவனான கம்சனிடம் பறிகொடுத்து, கால்களில் தளைகளுடன் சிறையில் வருந்தும் நங்கள் வசுதேவரின் மனவருத்தத்தைப் போக்கும் வண்ணம் இப்பூவுலகில் தோன்றி, 'நமது இந்தக் குழந்தையையும் கம்சன் கொன்றுவிடுவானோ!' என்று நங்கள் வசுதேவரும், தெய்வத் தேவகியும் அஞ்சாத வண்ணம், அவர்களின் அச்சத்தைப் போக்க, அன்று இரவே திருவாய்ப்பாடிக்குச் சென்று, நாயகனாய் நின்ற நந்தகோபனுடைய திருவம்சத்தை ஏற்றம் பெறச் செய்யும் யசோதை இளஞ்சிங்கமாக வளர்ந்தான், காணேடீ!" இரண்டாம் தோழி கூறுவதாவது: "அப்படி நந்தன் குல மதலையாய் வளர்ந்தவன் யாரெனில் எல்லோரையும் பிறப்பிக்கும் அந்த நான்முகனாரைத் தனது திருத்தாமரை உந்தியில் பிறப்பித்தவன் காண்! அவ்வளவு பெரியவனாக இருந்தும் எனக்குத் தந்தையாய், என்னையும் இந்தப் பிறவிகடலிலிருந்து கைதூக்கி விட, எம்பெருமானாய் இப்பூவுலகில் வந்து பிறந்தான்!" இப்படி ஒரே பாசுரத்தில், ஒரு தோழியின் திருவாயால் எம்பெருமானின் எளிமைக் குணத்தையும், இன்னொரு தோழியின் திருவாயால் எம்பெருமானின் பரமனான தன்மையையும் ஸ்ரீ திருமங்கையாழ்வார் பேசி மகிழ்கின்றார். மகிழ்விக்கின்றார். பய ரசம் [அச்சம்] ஸ்ரீ திருமங்கையாழ்வார் - பெரிய திருமொழி - பாசுரம் # 1-6-3 ஆசாரியர் ஸ்ரீ பெரியவாச்சான்பிள்ளை உரை - சுருக்கம்   நம் போன்றோர் எம்பெருமானின் திருவடிகளில் எப்படிச் சரணடையவேண்டும் என்பதை ஸ்ரீ திருமங்கையாழ்வாரிடமிருந்து கற்கவேண்டும்! நம் குறைகளை விண்ணப்பித்து, எம்பெருமானின் திருக்கல்யாண குணங்களைக் கொண்டாடி, அவன் திருவடிகளில் சரணடையவேண்டும். இப்பதிகத்தில் உள்ள பாசுரங்களில் அதை நமக்கு வெகு அழகாக ஸ்ரீ திருமங்கையாழ்வார் கற்பிக்கின்றார். இப்பாசுரத்திற்கு உரை அருளிய ஆசாரியர் அருளியவற்றுள் சில தேன் துளிகள்: "பகலில் பொருள் ஈட்டுவதற்குச் சூதாட்டத்தில் ஈடுபட்டேன். இரவில் பொருள் ஈட்டுவதற்குப் பகலில் சூதாட்டத்தில் வென்றவனைக் கொள்ளையடித்தேன். சுருண்ட குழல்கள் உடைய பெண்கள் மீது ஆசை கொண்டு, ஈட்டிய பொருள்களைக் கொண்டு அவர்களுக்குச் சேவை செய்தேன். கண்கள் விரும்பிய பொருள்கள் யாவற்றின் பின்னும் சென்றேன். உன்னைத் தொழும் இந்திரன் முதலான தேவர்கள், உன் திருவடிகளில் தொண்டினை வேண்டாமல் வேறு பயனை வேண்டியபோதும், அதைப் பொருட்படுத்தாமல், அவர்களுக்காக ஆமையாய்த் தோன்றி, வெண்ணிற அலைகள் கொண்ட திருப்பாற்கடலைக் கிளர்ந்தெழச் செய்த பெருந்தகவுடையோனே! தேவர்களுக்கு மட்டுமே இல்லாமல், என் போன்றோரும் வந்து அடைய திருநைமிசாரண்யத்தூள் உறையும் அருளாளா! பாவிகளுக்கு யம சேவகர்கள் செய்யும் கொடுமைகளை நினைத்து நடுங்கிக் கைகால் வலுவிழந்து, உன் திருவடிகளில் வந்து சரணடைந்தேன்!" பீபத்ச ரசம் [அருவருப்பு, வெறுப்பு] ஸ்ரீ திருமங்கையாழ்வார் - பெரிய திருமொழி - பாசுரம் # 6-2-1 ஆசாரியர் ஸ்ரீ பெரியவாச்சான்பிள்ளை உரை - சுருக்கம்   இப்பாசுரத்திற்கு ஆசாரியர் அருளிய உரை: பிறர் சொல்லும் தாழ்ந்த சொற்களைப் பொறுத்துக்கொண்டேன். அறம், பொருள், இன்பம், வீடுபேறு என்று இருக்க, அறத்தையும் வீடுபேற்றையும் மறந்து, என்னுடைய ஐம்புலன்கள் "பொருளைக் கொடு! இன்பத்தைக் கொடு!" என்று கடன் கொடுத்தவரைப் போல என்னை விரட்ட, அவைகளுக்குப் பொருளையும் இன்பத்தையும் ஈந்தேன். என் மனத்தின் விருப்பங்களுக்கு ஏற்றவாறு நடப்பவரை "உன் மீதுள்ள விருப்பம் என்றும் மாறாது" என்று வாயினால் கூறி, அதன் படியே ஆர்வத்துடன் நடத்தினேன். என் மனத்தின் விருப்பங்களுக்கு ஏற்றவாறு நடவாதவரை "உன் மீதுள்ள வெறுப்பு என்றும் மாறாது" என்று வாயினால் கூறி, அதன் படியே செற்றத்துடன் நடத்தினேன். இந்த உணர்வுகளை மனதில் அகலமாகப் பதித்துக் கொண்டேன். [காலம் பல சென்ற பின்,] "நான் ஏன் இவ்வாறு எல்லாம் செய்தேன்?" என்று எண்ணி, அவற்றை எல்லாம் துறக்க முயன்றேன். எவ்வளவு முயன்றாலும், என்னால் அவற்றை விட இயலவில்லை. வெறுத்தேன். "என்னால் இவை எதுவும் இயலாது" என்று உணர்ந்து, திருவிண்ணகர் மேயவனே, உன் திருவடிகளை வந்து அடைந்தேன். வீர ரசம் [வீரம், துணிச்சல்] Image Source: https://pbase.com/svami/image/53788700 ஸ்ரீ திருமங்கையாழ்வார் - பெரிய திருமொழி - பாசுரம் # 3-4-10 ஆசாரியர் ஸ்ரீ பெரியவாச்சான்பிள்ளை உரை - சுருக்கம்   பாசுரத்தின் உரையில் உள்ள பொருள்களின் சுருக்கம்: செங்கமலத்தில் உறையும் நான்முகனாருக்குச் சமமான மறையோதும் அந்தணர்கள் வாழும் திருக்காழிச்சீராம விண்ணகரம் என்ற திருத்தலத்தில் உறைகின்ற செங்கண்மாலை அழகிய தாமரை மலர்கள் நிரம்பிய தடாகங்களினாலும், வயல்களாலும் சூழப்பட்ட திருவாலி திருத்தலத்தைச் சேர்ந்தவரும் [ஆலிநாடன்] தமது திருவடிகளை அடைந்தவருக்கு மழைமேகம் போல அருளைப் பொழிந்து தம்மையும், தம் பாசுரங்களையும் அருள்பவரும் [அருள்மாரி] எதிர்த்து வருபவரை எதிர்க்க முடியாதபடி அமுக்குபவரும் [அரட்டமுக்கி] எதிரிகளால் வெல்லமுடியாத சிங்கம் போன்றவரும் [அடையார் சீயம்] கொங்கு மலர்க் குழலியர் [உள்பட எல்லோராலும்] மிகவும் விரும்பத்தக்கக் காமவேள் போன்ற அழகை உடையவரும் [கொங்கு மலர்க் குழலியர் வேள்] திருமங்கை நாட்டின் வேந்தனாகத் திகழ்பவரும் [மங்கை வேந்தன்] அடியார்களைக் காக்க வெற்றி தரும் வேலை ஏந்திக்கொண்டு, எதிரிகளுக்குக் காலன் போல இருப்பவரும் [கொற்றவேல் பரகாலன்] ஆகிய மிடுக்கை உடையவராம் [கலியன்], கூட்டம் கூட்டமாக நற்றமிழை அனுபவிக்க வருவோருக்காகச் சொன்ன இந்தத் தமிழ் மாலையை, இதன் மெய்ப்பொருள்களுடன் கற்க வல்லவர்கள் யாவரோ, அவர்கள் கடல் சூழ்ந்த இவ்வுலகத்தில் தலைவர்களாக விளங்குவார்கள். இது ஸ்ரீ திருமங்கையாழ்வார் தாமே தம் பெருமைகளைத் திருவாய்மலர்ந்தருளிய பாசுரம்! "ஆழ்வார் இப்படிச் செய்யலாமோ?" என்ற கேள்விக்கு, ஒரு சுவையான நிகழ்ச்சியின் வாயிலாக, ஆசாரியர் உரையில் விடை அருளியுள்ளார்: திருவரங்கப் பெருமாள் ஒரு அடியவரிடம், "நம்முடைய ஆழ்வார்களிடம் நீர் ஏதேனும் குற்றம் கண்டதுண்டோ?" என்று வினவினாராம். அப்போது, அந்த அடியவர் இந்தப் பாசுரத்தை விண்ணப்பம் செய்து, "ஆழ்வார் உம்மைப் பாட வந்து, தம்மையே பாடிக்கொண்டுள்ளாரே!" என்றாராம். அதற்குத் திருவரங்கப் பெருமாள் சிரித்துக்கொண்டே, "அப்படி அன்று. 'அடியேனுக்கு ஏற்பட்ட பெருமைகள் யாவும் எம்பெருமான் அருளால் ஏற்பட்டவை. இவை யாவும் அவன் பெருமைகளே!' என்று ஆழ்ந்து, உணர்ந்து ஆழ்வார் பாடினார். ஆதலால், இதுவும் நம்மையே பாடியதாம்!" என்று அருளினாராம். சாந்த ரசம் [அமைதி] ஸ்ரீ திருமங்கையாழ்வார் - பெரிய திருமொழி - பாசுரம் # 8-10-3 ஆசாரியர் ஸ்ரீ பெரியவாச்சான்பிள்ளை உரை - சுருக்கம்   "திருக்கண்ணபுரத்தில் உறையும் அம்மானே! 'திருவெட்டெழுத்து' என்று புகழ் பெற்ற உனது அஷ்டாக்ஷர மந்திரத்தின் பொருளாக மற்ற பல பொருள்களையும் நீ உரைத்தாலும், நீ உரைத்ததின் சாரமான பொருளாக நான் கற்றது என்னவெனில்: 'வேறு தெய்வங்களைப் பற்றியிருப்போரை விட்டு, உன் ஒருவனையே தெய்வமாகக் கொண்டு, உன் திருவடிகளையே பற்றி இருக்கும் அடியாருக்கு அடியேன் அடியவன் ஆவேன்,' என்பதேயாம்!" என்கிறார் ஆழ்வார். "நலம் தரும் சொல்லை நான் கண்டு கொண்டேன் நாராயணா என்னும் நாமம்" என்று முதலில் முழங்கியவர், "அந்தத் திருநாரணன் தாளிணைகளைக் காலம்பெறச் சிந்தித்து உய்ந்தவர்களின் திருவடிகளே தமக்குப் பேறு," என்று இறுதியில் எம்பெருமானிடம் அறுதியிடுகின்றார்! இதுவே ஸ்ரீ திருமங்கையாழ்வார் அடைந்த ஞானத்தின் உச்சநிலை. இதை உணர்ந்த பின்னரே ஆழ்வார் அமைதி கண்டார். Image Source: Sri Parakala Ramanujadasan, Sri Koil Annan Thirumaaligai Shishyar ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 2 ஆசாரியர் ஸ்ரீ மணவாள மாமுனிகள் உரை - சுருக்கம்   திருக்குறையலூர் என்ற திருத்தலத்தில் ஸ்ரீ திருமங்கையாழ்வார் திருவவதரித்தார். அதனால், அவருக்கு "குறையல் பிரான்" என்ற திருநாமமும் உண்டு. "அந்தக் குறையல் பிரான் திருவடிக்கீழ் மாறாத அன்பினை உடையவர் ஸ்ரீ இராமானுசர். அந்த ஸ்ரீ இராமானுசரின் அளவில்லாத பெருமைகளைத் தவிர வேறு எதையும் அடியேனது உள்ளம் நினைக்காது. இதுவே அடியேனுக்கு ஏற்பட்ட மிகப்பெரிய நல்ல குணம்!" என்று ஸ்ரீ திருவரங்கத்து அமுதனார் முழங்குகின்றார். குறிப்பு: ஸ்ரீ திருமங்கையாழ்வாருடைய திருவவதார திருத்தலத்தில், அவரது திருவடியின் கீழே ஸ்ரீ இராமானுசரின் சிறிய திருமேனி நமக்கு அருள் பாலிப்பதை இன்றும் கண்டு வணங்கலாம். முடிவுரை   1000-கும் மேற்பட்ட பாசுரங்கள் பாடிய ஸ்ரீ திருமங்கையாழ்வார், 80-கும் மேற்பட்ட திருத்தலங்களை மங்களாசாசனம் செய்துள்ளார். இவர் மட்டுமே மங்களாசாசனம் செய்த திருத்தலங்கள் 40-கும் மேற்பட்டவை! இவ்வளவு பெருமைகள் வாய்ந்த இவ்வாழ்வாரின் கடல் போன்ற அருளிச்செயல்களில், ஸ்ரீ இராமானுசரின் இன்னருளால், ஒரு சில முத்துக்களை மட்டுமே சுவைத்தோம். பொங்கு புகழ் மங்கையர்கோன் ஈந்த மறை ஆயிரம் அனைத்தும் தங்கு மனம் பெற ஸ்ரீ இராமானுச முனியின் திருவடி பணிவோமாக. வாழி எதிராசன்! வாழி எதிராசன்! வாழி எதிராசன்! மணவாள மாமுனியே இன்னுமொரு நூற்றாண்டிரும்! நன்றிகள் பல!   பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://www.youtube.com/c/SriYadugiriYathirajaMutt https://velukkudidiscourses.com/ https://velukkudi.tv/stream/ https://www.youtube.com/c/Geethacharyan "Thirukkovalur Sridharan Sudarsan" YouTube Channel பொலிக! பொலிக! பொலிக! Subscribe to: Posts (Atom) நாய்ச்சியார் திருமொழியில் நவ வித பக்தி நாய்ச்சியார் திருமொழியில் நவ வித பக்தி ... திருமாமகள் பெருமை ஆழ்வார்களும் ஆசாரியர்களும் போற்றும் திருமாமகள் ... Sri Varadhacharya & Srimathi Lakshmi Sri Varadhacharya & Srimathi Lakshmi Image Credit: http://www.mudaliandan.com/rama... குரு பக்தியில் 8 பக்தி இலக்கணங்கள் குரு பக்தியில் 8 பக்தி இலக்கணங்கள் ... ஆசாரம் என்பது அந்தணரின் ஆணவமா? முன்னுரை சில நாள்களுக்கு முன் ஒருவர் “நான் ஒரு பார்ப்பனர் வீட்டுக்குச் சென்றபோது அவர்கள் எனக்குத் தேனீர் விருந்து அளித்தனர். ஆனால் நான... Sri Vaduga Nambigal Sri Vaduga Nambigal Image Credit: https://guruparamparai.wordpress.com This... Labels * Invocation * * Table of Contents * 01. திருமாலவன் ஏற்றம் 02. நாய்ச்சியார் பெருமை 03. திருமாலடியார் பெருமை 04. இராமானுசர் தரிசன ஆசாரியர்கள் பெருமை 05. ஆழ்வார் பாசுரங்களுக்கு இராமானுசர் தரிசன ஆசாரியர்களின் உரைகளே சரியானவை 06. இராமானுசர் தரிசன ஆசாரியர்கள் அருளிய உரைகளின் ஏற்றம் 07. ஆழ்வார்கள் அருளிய அருளிச்செயல்களில் பொருட்சுவை 10. இராமானுச நூற்றந்தாதி 99. 'தமிழை ஆண்டாள்' கட்டுரை ஆதரவாளர்களுக்கு எதிர்வினைகள் 99. 'தமிழை ஆண்டாள்' கட்டுரை எழுதியவருக்கு எதிர்வினை 99. சனாதன தருமம் E-01. Bhagavad Vaibhavam E-02. Sri Mahalakshmi Vaibhavam E-03. Bhaagavatha Vaibhavam E-04. Acharya Vaibhavam E-05. Acharya Vyakhyana Vaibhavam E-06. Srimad Ramayanam E-08. Shathrughna Padi Picture Window theme. Powered by Blogger.