கோதா சதுச்லோகி

கோதா சதுச்லோகி

Image Source: https://www.tamilbrahmins.com

முன்னுரை

ஸ்ரீ இராமானுசரின் முக்கிய சீடர்களுள் ஒருவரான ஸ்ரீ திருமலை அனந்தாண்பிள்ளை என்ற மிகச்சிறந்த அடியவர், ஸ்ரீ ஆழ்வார் திருமகளார் ஆண்டாளின் திருவடிகள் மீது மிகுந்த பக்தி கொண்டவர்.

ஸ்ரீ திருமலை அனந்தாண்பிள்ள ஒரு முறை ஸ்ரீவில்லிபுத்தூர் எழுந்தருளியிருந்தபோது, "திருமுக்குளம்" என்ற திருக்கோயில் திருக்குளத்தில் ஆழ்ந்து மூழ்கி எதையோ தேடிக் கொண்டிருந்தாராம். வெகு நேரம் அவர் தேடிக் கொண்டிருந்ததைக் கண்டு, உடன் இருந்தவர்கள், "என்ன தேடுகிறீர்?" என்று கேட்க, "முன்னொரு காலம் அன்னை கோதை இங்கே நீராடியிருப்பள். அவள் பயன்படுத்தி மிகுந்த மஞ்சள் கிழங்கு ஏதேனும் பிரசாதமாகக் கிடைக்குமா என்று தேடுகின்றேன்," என்று பதில் உரைத்தாராம்!

ஸ்ரீ இராமானுசரின் திருவுள்ளம் உகக்கவேண்டும் என்ற ஒரே குறிக்கோளுடன் திருவேங்கடவனின் திருத்தொண்டில் ஈடுபட்டிருந்த ஸ்ரீ திருமலை அனந்தாண்பிள்ள, வைகுந்தம் எழுந்தருளிய நாளும் ஸ்ரீ ஆழ்வார் திருமகளார் ஆண்டாளின் திரு அவதார தினமான திருவடிப்பூரமே ஆகும்!

ஸ்ரீ திருமலை அனந்தாண்பிள்ள தமது பெருமதிப்பிற்குறிய ஆசாரியரான ஸ்ரீ இராமானுசரின் பெருமைகளைப் பாடும் "ஸ்ரீ இராமானுஜ சதுச்லோகி" என்ற நூலையும், ஸ்ரீ ஆழ்வார் திருமகளார் ஆண்டாளின் பெருமைகளைப் பாடும் "ஸ்ரீ கோதா சதுச்லோகி" என்ற நூலையும் அருளியுள்ளார்.

"ஸ்ரீ கோதா சதுச்லோகி" என்ற நூலில் உள்ள சுலோகங்களின் பொருள்களைச் சுவைப்பதே இச்சிறு கட்டுரையின் நோக்கம்.

---

Image Source: https://in.pinterest.com/pin/3237030970653837/

கோதா சதுச்லோகி - சுலோகம் # 1

நிஸ்ஸம	[எந்தக் கோதை மாமகளின்] ஒப்பற்றதும்
உத்துங்க	உயர்ந்ததும் ஆகிய
வார்த்தா	வார்த்தை
நிகம சிரஸாம்	தமிழ் மறைகளின் [மற்றும் வேதாந்தங்களின்] சிரத்தை
நித்யா பூஷா	எப்போதும் அணி செய்கின்றதோ
காந்தோ யஸ்யா:	[எந்தக் கோதை மாமகளின்] திருவுள்ளத்திற்கு இனியவன்
கச விலுலுதை:	அவள் திருக்குழற்கற்றையிலிருந்து களைந்ததால்
மால்ய ரத்னை:	இரத்தினத்தைப் போன்று விலைமதிப்பற்றதும், ஒளியுடன் கூடியதும் ஆகிய மாலையை
காமுகோ	மிகவும் விரும்புகின்றானோ
ஸூக்த்யா யஸ்யா:	[எந்தக் கோதை மாமகளின்] திருவாக்குகள் என்கிற
ஶ்ருதி ஸுபகயா	இனிமையான மறைகளால்
தரித்ரீ	உலகத்துக்கே
ஸுப்ரபாதா	நல்விடிவு ஏற்படுகின்றதோ
ஸைஷா [ஸ + ஏஷா]	அப்படிப்பட்ட
தேவீ	தெய்வீகமான [ஸ்ரீ கோதை மாமகளே!]
ஸகல ஜனனீ	எங்கள் எல்லோருக்கும் திருத்தாயானவளே!
அபாங்கை:	உன் திருக்கடைக்கண்களுடைய உயர்ந்த பார்வையை
மாம்	அடியேன் மீது
ஸிஞ்சதாம்	பொழிந்து அருளவேண்டும்!

சுலோகம் # 1 - பொழிப்புரை

[எந்தக் கோதை மாமகளின்] ஒப்பற்றதும் உயர்ந்ததும் ஆகிய வார்த்தை தமிழ் மறைகளின் [மற்றும் வேதாந்தங்களின்] சிரத்தை எப்போதும் அணி செய்கின்றதோ
[எந்தக் கோதை மாமகளின்] திருவுள்ளத்திற்கு இனியவன் அவள் திருக்குழற்கற்றையிலிருந்து களைந்ததால் இரத்தினத்தைப் போன்று விலைமதிப்பற்றதும், ஒளியுடன் கூடியதும் ஆகிய மாலையை மிகவும் விரும்புகின்றானோ
[எந்தக் கோதை மாமகளின்] திருவாக்குகள் என்கிற இனிமையான மறைகளால் உலகத்துக்கே நல்விடிவு ஏற்படுகின்றதோ
அப்படிப்பட்ட தெய்வீகமான [ஸ்ரீ கோதை மாமகளே!]
எங்கள் எல்லோருக்கும் திருத்தாயானவளே!
உன் திருக்கடைக்கண்களுடைய உயர்ந்த பார்வையை அடியேன் மீது பொழிந்து அருளவேண்டும்!

---

Image Source: https://in.pinterest.com/pin/63191201013495594/

கோதா சதுச்லோகி - சுலோகம் # 2

மாதா சேத் துலஸீ	[எந்தக் கோதை மாமகளின்] திருத்தாயார் முளைக்கும் போதே நறுமணம் வீசும் நாற்றத் திருத்துழாயோ
பிதா யதி தவ ஸ்ரீ விஷ்ணுசித்தோ மஹாந்	[எந்தக் கோதை மாமகளின்] திருத்தகப்பனார் எம்பெருமானுக்கே பொங்கும் பரிவால் பல்லாண்டு பாடும் பெரியாழ்வாராம் விட்டுசித்தரோ
ப்ராதா சேத் யதிஶேகர:	[எந்தக் கோதை மாமகளின்] திருத்தமையனார் ஆசாரிய பரம்பரையின் சிகரமானவரும், எதிகட்கு இறைவரும் ஆகிய ஏராரும் எதிராசரோ
ப்ரியதம: ஸ்ரீரங்கதாமா யதி	[எந்தக் கோதை மாமகளின்] மனத்துக்கினியான் பரமபதம் உள்ளிட்ட 108 திவ்யதேசத்து எம்பெருமான்களுள் முதன்மையானவனான செங்கோல் உடைய திருவரங்கச் செல்வனாரோ
தனயா:	[எந்தக் கோதை மாமகளின்] திருமகனார்கள்
ஸ்தன்யேன	அவளது பக்தி என்கின்ற திருமுலைத்தடங்களில் பெருகுகின்ற
த்வதுக்தி ஸரஸ	[திருப்பாவை மற்றும் நாய்ச்சியார் திருமொழி ஆகிய] திருவாக்குகளாம் அமுதமன்ன தாய்ப்பாலைப் பருகி
ஜ்ஞாதார: ஸம்வர்த்திதா:	அறப்பெரிய ஞானிகளாக வளர்ந்தவர்களோ [அதாவது, ஸ்ரீ இராமானுசர் தரிசனத்தின் ஆசாரியர்கள்]
கோதா தேவி	[அப்படிப்பட்ட] கோதா தேவியே!
கதம் த்வம்	எப்படி [இவ்வளவு பெருப்பெருத்த பெருமைகளையுடைய] நீர்
அந்ய	மற்றவர்களுக்கு
ஸுலபா ஸாதாரணா	மிக மிக எளிதாக
ஸ்ரீரஸி	உமது திருவருளை அடையும்படி எழுந்தருளியிருக்கின்றீர்?

சுலோகம் # 2 - பொழிப்புரை

[எந்தக் கோதை மாமகளின்] திருத்தாயார் முளைக்கும் போதே நறுமணம் வீசும் நாற்றத் திருத்துழாயோ
[எந்தக் கோதை மாமகளின்] திருத்தகப்பனார் எம்பெருமானுக்கே பொங்கும் பரிவால் பல்லாண்டு பாடும் பெரியாழ்வாராம் விட்டுசித்தரோ
[எந்தக் கோதை மாமகளின்] திருத்தமையனார் ஆசாரிய பரம்பரையின் சிகரமானவரும், எதிகட்கு இறைவரும் ஆகிய [ஸ்ரீ இராமானுசராம்] ஏராரும் எதிராசரோ
[எந்தக் கோதை மாமகளின்] மனத்துக்கினியான் பரமபதம் உள்ளிட்ட 108 திவ்யதேசத்து எம்பெருமான்களுள் முதன்மையானவனான செங்கோல் உடைய திருவரங்கச் செல்வனாரோ
[எந்தக் கோதை மாமகளின்] திருமகனார்கள் அவளது பக்தி என்கின்ற திருமுலைத்தடங்களில் பெருகுகின்ற [திருப்பாவை மற்றும் நாய்ச்சியார் திருமொழி ஆகிய] திருவாக்குகளாம் அமுதமன்ன தாய்ப்பாலைப் பருகி அறப்பெரிய ஞானிகளாக வளர்ந்தவர்களோ [அதாவது, ஸ்ரீ இராமானுசர் தரிசனத்தின் ஆசாரியர்கள் என உயர்ந்தவர்களோ]
[அப்படிப்பட்ட] கோதா தேவியே!
[இவ்வளவு பெருப்பெருத்த பெருமைகளையுடைய] நீர் எப்படி மற்றவர்களுக்கு மிக மிக எளிதாக உமது திருவருளை அடையும்படி எழுந்தருளியிருக்கின்றீர்?

---

Image Source: https://www.tamilbrahmins.com/threads/srivilliputhur-sri-andal-sri-rengamannar-pushpa-yagam.54769/

கோதா சதுச்லோகி - சுலோகம் # 3

கல்பாதௌ	இந்தச் சுவேதவராக கல்பத்தின் தொடக்கத்தில்
ஹரிணா ஸ்வயம்	அரியாகிற எம்பெருமான் [ஸ்ரீ பூவராகப் பெருமாளாகத் தோன்றி] தாமே
ஜன ஹிதம் த்ருஷ்ட்வைவ ஸர்வாத்மநாம்	[பூமிப் பிராட்டியின் திருவுள்ள உகப்புக்காக அவளது குழந்தைகளான] இவ்வுலகத்தோரின் இதத்தை வேண்டி
ப்ரோக்தம் ஸ்வஸ்ய ச	[ஸ்ரீ கைசிக புராணத்தைத் தன்னகத்தே கொண்ட ஸ்ரீ வராகப் புராணத்தில் மேல்வரும் விஷயங்களைத்] திருவாய் மலர்ந்து அருளினான்:
கீர்த்தனம் பிரபதனம் ஸ்வஸ்மை பிரஸூநார்ப்பணம்	என் திருநாமங்களை வாயினால் பாடி, என்னையே வழியாக மனத்தினால் சிந்தித்து, என்னைத் தூமலர் தூவித் தொழவேண்டும்
ஸர்வேஷாம் ப்ரகடம் விதாதுமனிஶம்	[பிறவிக்கடலைக் கடக்க எம்பெருமான் உபதேசித்த இந்த எளிமையான வழியை] இவ்வுலகத்தோர் யாவருக்கும் தெளிவாக அறிவிக்க [எமக்காக வைகுந்தவான் போகம் தன்னை இகழ்ந்து]
வைதிக விஷ்ணுசித்த தநயாம்	வேண்டிய வேதங்கள் ஓதி விரைந்து கிழியறுத்தவரும், எம்பெருமானுக்குப் பல்லாண்டு பாடியவரும் ஆகிய ஸ்ரீ பட்டர்பிரான் விட்டுசித்தரின் திருமகளாராக
ஸ்ரீதந்விநவ்யேபுரே ஜாதாம்	ஸ்ரீவில்லிபுத்தூரில் திருவவதாரம் செய்தவளை
கோதாம்	கோதா தேவியை
உதாராம்	இன்னிசையால் நற்பாமாலை பாடிக்கொடுத்த வள்ளலை
ஸ்தும:	அடியேன் துதிக்கின்றேன்!

சுலோகம் # 3 - பொழிப்புரை

இந்தச் சுவேதவராக கல்பத்தின் தொடக்கத்தில் அரியாகிற எம்பெருமான் [ஸ்ரீ பூவராகப் பெருமாளாகத் தோன்றி], தாமே [பூமிப் பிராட்டியின் திருவுள்ள உகப்புக்காக அவளது குழந்தைகளான] இவ்வுலகத்தோரின் இதத்தை வேண்டி, [ஸ்ரீ கைசிக புராணத்தைத் தன்னகத்தே கொண்ட ஸ்ரீ வராகப் புராணத்தில்] மேல்வரும் விஷயங்களைத் திருவாய் மலர்ந்து அருளினான்: "என் திருநாமங்களை வாயினால் பாடி, என்னையே வழியாக மனத்தினால் சிந்தித்து, என்னைத் தூமலர் தூவித் தொழவேண்டும்!"

[பிறவிக்கடலைக் கடக்க எம்பெருமான் உபதேசித்த இந்த எளிமையான வழியை] இவ்வுலகத்தோர் யாவருக்கும் தெளிவாக அறிவிக்க [எமக்காக வைகுந்தவான் போகம் தன்னை இகழ்ந்து], வேண்டிய வேதங்கள் ஓதி விரைந்து கிழியறுத்தவரும், எம்பெருமானுக்குப் பல்லாண்டு பாடியவரும் ஆகிய ஸ்ரீ பட்டர்பிரான் விட்டுசித்தரின் திருமகளாராக, ஸ்ரீவில்லிபுத்தூரில் திருவவதாரம் செய்தவளை, கோதா தேவியை, இன்னிசையால் நற்பாமாலை பாடிக்கொடுத்த வள்ளலை அடியேன் துதிக்கின்றேன்!

---

Image Source: https://www.tamilbrahmins.com/threads/srivilliputhur-sri-kodhai-nachiar-neerattu-utsavam.53358/

கோதா சதுச்லோகி - சுலோகம் # 4

ஆராம	விரையார் பொழில்
ஶைலேஶிது:	வேங்கடவன்
ஆகூதஸ்ய	திருவுள்ளத்தை
பரிஷ்க்ரியாம்	அலங்கரிப்பவளை
அநுபமாம்	ஒப்பற்றவளை
சக்ஷூஷோ:	எல்லோர் கண்களுக்கும்
ஆஸேசனம்	மிகவும் இனிமையானவளை
ஆனந்தஸ்ய பரம்பராம் அநுகுணாம்	எம்பெருமானுடைய திருவுள்ளத்திற்கு ஏற்றார் போல் [அடியார்களிடம் போர கருணையுடன்] நடப்பவளாகையால் அவனது மகிழ்ச்சிக்குக் காரணமாக இருப்பவளை
தத் தோர்மத்ய	எம்பெருமானுடைய திருமார்பிலும்
கிரீடகோடி	திருவபிஷேகத்தின் உச்சியிலும்
ஸ்வோச்சிஷ்ட மால்யா	அவளது திருக்குழற்கற்றையில் அவள் சூடிக் களைந்த மாலையின்
கடித	[விலைமதிப்பற்ற, உயர்ந்த] தொடர்பால்
கஸ்தூரிகா	மிக்க நறுமணம் கமழ்வதால்
மோத	எம்பெருமானின் திருவுள்ள உகப்பை
ஸமேதிதாத்ம	பன்மடங்கு பெருக்கும்
விபவாம்	பெருமை உடையவளை
கோதாம்	கோதா தேவியை
உதாராம்	எம்பெருமானுக்குப் பூமாலை சூடிக்கொடுத்து அவனையும் உகப்பித்த வள்ளலை
ஸ்தும:	அடியேன் துதிக்கின்றேன்

சுலோகம் # 4 - பொழிப்புரை

• விரையார் பொழில் வேங்கடவன் திருவுள்ளத்தை அலங்கரிப்பவளை
• ஒப்பற்றவளை
• எல்லோர் கண்களுக்கும் மிகவும் இனிமையானவளை
• எம்பெருமானுடைய திருவுள்ளத்திற்கு ஏற்றார் போல் [அடியார்களிடம் போர கருணையுடன்] நடப்பவளாகையால் அவனது மகிழ்ச்சிக்குக் காரணமாக இருப்பவளை
• எம்பெருமானுடைய திருமார்பிலும், திருவபிஷேகத்தின் [மகுடத்தின்] உச்சியிலும் அவளது திருக்குழற்கற்றையில் அவள் சூடிக் களைந்த மாலையின் [விலைமதிப்பற்ற, உயர்ந்த] தொடர்பால் மிக்க நறுமணம் கமழ்வதால், எம்பெருமானின் திருவுள்ள உகப்பை பன்மடங்கு பெருக்கும் பெருமை உடையவளை
• கோதா தேவியை
• எம்பெருமானுக்குப் பூமாலை சூடிக்கொடுத்து அவனையும் உகப்பித்த வள்ளலை

அடியேன் துதிக்கின்றேன்!

---

Image Source: https://www.tamilbrahmins.com/threads/srivilliputhur-sri-kodhai-nachiar-in-sesha-vahanam.54698/

முடிவுரை

எல்லோருக்கும் இனிய மார்கழி உதிக்கட்டும். எல்லோரும் செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புறட்டும். ஆழ்வார் திருமகளார் ஆண்டாள் திருவடிகளே சரணம்.

---

வாழி எதிராசன்! வாழி எதிராசன்! வாழி எதிராசன்!
மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://www.youtube.com/c/SriYadugiriYathirajaMutt https://velukkudidiscourses.com/ https://velukkudi.tv/stream/ https://www.youtube.com/c/Geethacharyan "Thirukkovalur Sridharan Sudarsan" YouTube Channel பொலிக! பொலிக! பொலிக!

---

அஞ்சுக்குடிக்கு ஒரு சந்ததியாம் ஆண்டாள்

அஞ்சுக்குடிக்கு ஒரு சந்ததியாம் ஆண்டாள்

Image Source: https://in.pinterest.com/pin/9148005503639887/

முன்னுரை

ஸ்ரீ மணவாள மாமுனிகள், "அஞ்சுக்குடிக்கு ஒரு சந்ததி" என்று ஸ்ரீ ஆண்டாளைப் போற்றுகின்றார். தமிழில் "அஞ்சு" என்ற சொல் 5 என்ற எண்ணைக் குறிக்கும் அல்லது அச்ச உணர்ச்சியைக் குறிக்கும்: ஸ்ரீ ஆண்டாளுக்கு முன் 5 ஆழ்வார்கள் திருவவதாரம் செய்தார்கள். ஸ்ரீமுதலாழ்வார்கள் பிரிக்கமுடியாதவர்கள் என்பதால் அவர்களை ஒன்றாகக் கணக்கிட்டால், ஸ்ரீ ஆண்டாள் 5 ஆழ்வார்களின் ஞான வாரிசு. அவர்களின் பக்தி, ஞானம் அனைத்தையும் அவள் பிறந்த வீட்டுச் சீராக ஒரு சேரப் பெற்றாள். மேலும், திருமாலுக்கு ஏதாவது ஆபத்து வந்துவிடுமோ என்ற அச்சத்தில் எப்போதும் திருமாலுக்குப் பல்லாண்டு பாடி வருபவர் ஸ்ரீ பெரியாழ்வார். அத்தகைய புகழ்பெற்ற திருவம்சத்தின் வாரிசு ஸ்ரீ ஆண்டாள். ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 24 "பெருப்பெருத்த பெருமையுடைய பெரியாழ்வார்" என்ற கட்டுரையில் மங்களாசாசனத்தைப் பற்றியும், ஸ்ரீ பெரியாழ்வாருடைய மங்களாசாசனத்தின் தனிச்சிறப்பைப் பற்றியும் ஆசாரியர்கள் அருளியவற்றைப் பகிர்ந்துகொண்டேன். இக்கட்டுரையை அக்கட்டுரையின் ஒரு தொடர்ச்சி என்றே கொள்ளலாம். மாதவனுக்கு மங்கலமே மொழிந்த மாதகவோராகிய ஸ்ரீ பெரியாழ்வாருக்குத் திருமகளாரான ஆண்டாளின் திருவாக்கிலும் திருப்பல்லாண்டின் மங்கல நாதம் ஒலிக்கும். இதற்குத் திருப்பாவையில் சான்றுகள் உள்ளன. அவற்றுள் மிகவும் தெள்ளத் தெளிவான சான்று திருப்பாவை பாடிய செல்வி அருளிய 24-ம் பாசுரமான "அன்று இவ்வுலகம் அளந்தாய் அடி போற்றி" பாசுர வரிகள். "வாழி," "போற்றி," "பொலிக," ஆகிய சொற்களும் "பல்லாண்டு" என்பதையே பொருளாகக் கொண்ட சொற்கள். திருப்பாவை 24-ம் பாசுரத்தில் 6 வரிகள் "போற்றி" என்று எம்பெருமானுக்குப் பல்லாண்டு பாடும் வரிகள். இவற்றுள் திருப்பல்லாண்டின் பிரணவ நாதம் ஒலிக்கின்றது. இதைச் சுவைப்பதே இக்கட்டுரையின் நோக்கமாம். இக்கட்டுரையில் பாசுர விளக்கங்கள் யாவும், திருப்பாவைக்கு ஆசாரியர் ஸ்ரீ பெரியவாச்சான்பிள்ளை அருளிய 6000 படி என்ற உரையையும், ஆசாரியர் ஸ்ரீ அழகிய மணவாளப் பெருமாள் நாயனார் அருளிய 3000 படி என்ற உரையையும் அடிப்படையாகக் கொண்டே வழங்கப்பெற்றுள்ளன.

---

1. "அன்று இவ்வுலகம் அளந்தாய் அடி போற்றி"

Image Source: https://in.pinterest.com/pin/602708362644892603/

ஸ்ரீ பெரியாழ்வாரைப் போலவே, அன்று நடந்த திருவவதார நிகழ்ச்சிகளுக்குத் தென்புதுவை வேயர் பயந்த விளக்காம் ஆண்டாள் இன்று பல்லாண்டு பாடுகின்றாள். ஸ்ரீ பெரியாழ்வார் "உன் சேவடிச் செவ்வித் திருக்காப்பு" என்றே திருப்பல்லாண்டைத் துவங்கியருளினார். பெரியாழ்வார் பெற்றெடுத்த பெண்பிள்ளையும் "அடி போற்றி" என்று திருவடிக்குப் பல்லாண்டு பாடியே பாசுரத்தைத் துவங்குகின்றாள். "எம்பெருமான் அன்று உலகளந்தபோது, இந்திரன் அவன் கேட்டதைப் பெற்றுப்போனான். மகாபலியோ 'மாபெரும் வள்ளல்' என்று பெயர் பெற்றான். ஆனால், எம்பெருமானுக்கு அருகே இருந்து ஒருவரும் பல்லாண்டு பாடிக் காப்பிடவில்லையே!" என்று ஸ்ரீ ஆழ்வார் திருமகளார் ஆண்டாள் வயிறு பிடித்துக் காப்பிடுகின்றாள். "பிராட்டிமார்கள் தங்களுடைய செந்தாமரைக்கைகளால் தொட்டாலும் கன்றிப் போகும் மிக மென்மையான திருவடிகளை உடைய எம்பெருமான், காடும் மேடும் நிறைந்ததும், வேண்டுவோர் வேண்டாதார் என்று அனைவராலும் நிரம்பப் பெற்றதும் ஆகிய இந்த உலகத்தை அளந்தானே!" என்று ஸ்ரீ ஆழ்வார் திருமகளார் ஆண்டாள் வருந்துகின்றாள். "உலகளந்த களைப்பு நீங்கட்டும்! அன்று பாடமுடியாமல், இன்று பாடுகின்றோம்!" என்று பல்லாண்டு பாடுகின்றாள்.

---

2. "சென்றங்கு தென்னிலங்கை செற்றாய் திறல் போற்றி"

Image Source: https://in.pinterest.com/pin/1049198044412314999/

ஸ்ரீ பெரியாழ்வார் திருப்பல்லாண்டு 3-ம் பாசுரத்தில் "இலங்கை பாழாளாகப் படை பொருதானுக்குப் பல்லாண்டு" என முழங்கினார். அதே போல, ஆழ்வார் திருமகளார் ஆண்டாளும் ஸ்ரீ இராமபிரான் இலங்கையைப் பொடிப்பொடியாக்கியதற்குப் பல்லாண்டு பாடுகின்றாள். "ஆழ்வீர்! துயர் தீர்வீர்! எனக்குத் தீங்கு ஏதும் வராது!" என்று எம்பெருமான் திண்டோள்களைக் காட்ட, ஸ்ரீ பெரியாழ்வார், "மல்லாண்ட திண்டோள் மணிவண்ணா! உனக்குப் பல்லாண்டு" என்றார் அன்றோ? அதே பாதையை அவரது திருமகளாரும் பின்பற்றுகின்றாள். "மனத்துக்கினியானே! சீதைப் பிராட்டியையும், உன்னையும் பிரித்த அக்கயவன் இருக்கும் ஊருக்கோ சென்றாய்? கொட்டும் கொடிய குளவிகள் எல்லாம் கூட்டாக உறைவது போல, கொடிய அரக்கர்கள் கூட்டாக வாழும் ஊருக்குச் சென்றாயே! உன்னுடைய மென்மையான திருவடிகளைக் கொண்டு திருவயோத்தியிலிருந்து நடந்து, நடந்து தென்னிலங்கை வரை சென்றாயே!" என்று பட்டர்பிரான் கோதை வயிறு பிடிக்கின்றாள். எம்பெருமானும் தனது திருத்தோள்களின் திறல் தன்னை ஆழ்வார் திருமகளார் ஆண்டாளுக்குக் காட்டிக்கொடுக்க, "எம்பெருமானைக் காத்த அத்திறலுக்கு என் வருமோ?" என மேலும் அஞ்சி, மதிளுக்கு மதிள் கட்டுவார் போல, அஞ்சுக்குடிக்கு ஒரு சந்ததியான கோதை அந்தத் திருத்தோள்களின் திறலுக்குப் பல்லாண்டு பாடுகின்றாள். ஸ்ரீ இராமபிரான் குழந்தைப் பருவத்திலேயே அத்திர சத்திரங்களை நன்கு கற்றுத் தேர்ந்து, அரக்கர்களை வீழ்த்தி, சிவதனுசையும் முறித்தவன். இதற்கெல்லாம் பல ஆண்டுகள் கழித்தே இராவண வதம் நடந்தேறியது. சூடிக்கொடுத்த சுடர்கொடி பேரன்பு வெள்ளத்தில் இதனை மறந்தனள்.

---

3. "பொன்றச் சகடம் உதைத்தாய் புகழ் போற்றி"

Image Source: https://in.pinterest.com/pin/813814595153129991/

ஸ்ரீ இராமபிரானைக் காட்டிலும் ஸ்ரீ கண்ணபிரான் எதிர்கொண்ட ஆபத்துக்கள் அதிகம். போர்த்தொழில் அறியாத பெற்றோரிடம், சேனைகள் எதுவும் இல்லாத திருவாய்ப்பாடியில் வளர்ந்தான். தாய்வேடம் [பூதனை] உள்பட வெவ்வேறு வேடத்தில் அவனைத் தாக்க வந்த கொடிய அரக்கர்களைச் சந்திக்கும் ஆபத்தான சூழ்நிலையில் ஸ்ரீ கண்ணபிரான் வளர்ந்தான். ஸ்ரீ பெரியாழ்வார் திருப்பல்லாண்டு 7-ம் பாசுரத்தில் "மாயப் பொருபடை வாணனை ஆயிரம் தோளும் பொழி குருதி பாய சுழற்றிய ஆழிவல்லானுக்குப் பல்லாண்டு" என்றும், 10-ம் பாசுரத்தில் "ஐந்தலைய பைந்நாகத்தலைப் பாய்ந்தவனே உன்னைப் பல்லாண்டு கூறுதுமே" என்றும் ஸ்ரீ கண்ணபிரானுக்குப் பல்லாண்டு பாடினார். ஸ்ரீ பெரியாழ்வார் திருமொழியில் பற்பல இடங்களில் பாடியுள்ளார். அவ்வழியே சென்று, பட்டர்பிரான் கோதையும் ஸ்ரீ கண்ணபிரானுக்கு இப்பாசுரத்தில் 4 வரிகளில் பல்லாண்டு பாடியுள்ளாள். இராவணன் தான் ஒரு எதிரி என்பதை வெளிப்படுத்தினான். ஆனால், கள்ளச் சகடமோ தன் தீமையை மறைத்து, ஒரு சகடம் போலவே காட்சி அளித்தான். அந்தத் தருணத்தில் ஸ்ரீ கண்ணபிரானைக் காக்க அன்னை யசோதையும் அருகே இல்லை. எனினும், ஸ்ரீ கண்ணபிரான் அந்தக் கள்ளச் சகடம் கலக்கழிய காலோச்சினான். பொதுவாக, ஸ்ரீ கண்ணபிரானின் இச்செயலைப் பற்றிக் கேட்கும் பெண்பிள்ளைகள் எம்பெருமானின் மிடுக்கிற்கும், வீரத்திற்கும் மயங்குவார்கள். ஆனால், பெரியாழ்வார் பெற்றெடுத்த பெண்பிள்ளையோ விழிப்புடன் அவனுக்குக் காப்பிடுகின்றாள்!

---

4. "கன்று குணிலாய் எறிந்தாய் கழல் போற்றி"

Image Source: https://www.amarchitrakatha.com/wp-content/uploads/2020/08/Bhagwat_KrishnaVatsasura.jpg

"அந்தோ! 'கள்ளச் சகடமே ஒரு படி மேல்!' என்னலாம் படி அன்றோ இரு கொடியோர்கள் கன்றுக்குட்டியின் வடிவத்திலும், விளாங்கனியின் உருவத்திலும் வந்தனர்! இருவரும் சேர்ந்து நம் கண்ணன் மீது பாய்ந்திருந்தால் என்னவாகியிருக்கும்!" என்று பூமாலை சூடிக்கொடுத்தாள் அஞ்சுகின்றாள். ஸ்ரீ கண்ணபிரான் கன்றின் வடிவில் வந்த வத்சாசுரனை விளாங்கனியின் வடிவில் இருந்த அசுரன் மீது எறிந்து, ஒரே அடியில் இருவரையும் வீழ்த்தினான். அவனுக்கே உரிய பாணியில், ஒரு திருவடியை வளைத்து வெற்றியுடன் நின்றான். அந்த வளைத்தத் திருவடிக்கும், அந்தக் கழலின் செம்மையான நிறத்திற்கும் விட்டுசித்தன் கோதை காப்பு இடுகின்றாள்!

---

5. "குன்று குடையாய் எடுத்தாய் குணம் போற்றி"

Image Source: https://in.pinterest.com/pin/850687817121973899/

மேற்கூறிய யாவரும் அசுரர்கள். ஆனால், எம்பெருமான் திருவருளால் பற்பல திருவவதாரங்களில் [ஸ்ரீ கண்ணபிரான் திருவவதாரம் உள்பட!] நன்மையே பெற்றுப்போன இந்திரன், ஓயாமல் திருவாய்ப்பாடியை மூழ்கடிக்கக் கல்மழை பொழிந்தான். திருவாய்ப்பாடியில் வாழும் அனைவருக்கும் [பசுக்கள், கன்றுகள் உள்பட], தனது சிறு விரலால் கோவர்த்தன மலையை ஏழு நாள்கள் கருணையுடன் தாங்கிப்பிடித்து, குறை ஒன்றும் இல்லாத கோவிந்தன் காத்தருளினான். இந்திரனையும் கருணையுடன் ஒன்றும் செய்யாது மன்னித்துவிட்டான். இந்தக் கருணைக்குத் தோற்று, அக்கருணைக்குப் பெரியாழ்வாரின் திருக்குமாரத்தி பல்லாண்டு பாடுகின்றாள்.

---

6. "வென்று பகை கெடுக்கும் நின் கையில் வேல் போற்றி"

Image Source: https://in.pinterest.com/pin/1118440888683606068/

ஸ்ரீ பெரியாழ்வார் "சுடராழியும் பல்லாண்டு" என்றும், "அப்பாஞ்சசன்னியமும் பல்லாண்டே" என்றும் திருவாயுத ஆழ்வார்களுக்குக் காப்பிட்டார். அதே பாதையில் விட்டுசித்தன் கோதையும் பயணிக்கின்றாள். கூர்வேல் கொடுந்தொழிலன் ஆகிய ஸ்ரீ நந்தகோபர் வேல் பிடித்திருப்பதால், ஸ்ரீ கண்ணபிரானும் வேல் பிடித்திருக்கின்றான். எம்பெருமான் செய்தருளின மாயச் செயல்களைக் குறிப்பிட்டு, அவற்றுக்குப் பல்லாண்டு பாடினால், அதனாலாயே அவனுக்குக் கண்ணெச்சில் ஏற்படக்கூடும் என அஞ்சி, "அவன் கையில் இருக்கும் வேலே அவன் வெற்றிகளுக்குக் காரணம்," என்று சொல்லி, ஸ்ரீ கண்ணபிரானைக் காக்க முற்படுகின்றாள். அது மட்டுமின்றி, கையில் வேல் பிடித்த ஸ்ரீ கண்ணபிரானின் திருக்கோலத்தின் ஒப்பற்ற பேரெழிலுக்கும் காப்பிடுகின்றாள். அந்த வேலுக்கும் காப்பிடுகின்றாள்.

---

முடிவுரை

ஸ்ரீ பெரியாழ்வாரின் திருப்பல்லாண்டை அடியொற்றியே இப்பாசுரத்தைத் திருவாய் மலர்ந்தருளிய அன்ன வயல் புதுவை ஆண்டாள், "என்றென்றுன் சேவகமே ஏத்திப் பறை கொள்வான்" ["உன்னுடைய வெற்றிகளைப் பாடுவதன் பயன் உன்னுடைய வெற்றிகளைப் பாடுவதே"] என்றே பாசுரத்தைத் தலைக்கட்டுகின்றாள். நாமும் ஸ்ரீ பெரியாழ்வாரின் திருவடிகளுக்கும், வண்புதுவைநகர்க் கோதையின் மலர்ப்பதங்களுக்கும், அவர்களின் அடியார்களின் திருவடிகளுக்கும் "போற்றி! போற்றி! போற்றி!" என்று எப்போதும் காப்பிடுவோம். வாழி எதிராசன்! வாழி எதிராசன்! வாழி எதிராசன்! மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://www.youtube.com/c/SriYadugiriYathirajaMutt https://velukkudidiscourses.com/ https://velukkudi.tv/stream/ https://www.youtube.com/c/Geethacharyan "Thirukkovalur Sridharan Sudarsan" YouTube Channel பொலிக! பொலிக! பொலிக!

---

நிலமாமகள் [பூமிப் பிராட்டி] பெருமை

ஆழ்வார்களும் ஆசாரியர்களும் போற்றும் நிலமாமகள் [பூமிப் பிராட்டி]

Image Source: https://in.pinterest.com/

முன்னுரை

திருமாலின் தேவிமார்கள் மூவர்: திருமாமகள் ஆகிய ஸ்ரீதேவி: பெரிய பிராட்டியார் என்று போற்றப்படும் இம்மலர்மங்கையைப் பற்றி "ஆழ்வார்களும் ஆசாரியர்களும் போற்றிய திருமாமகள்" என்ற கட்டுரையில் விண்ணப்பித்திருந்தேன். நிலமாமகள் ஆகிய பூதேவி / பூமிதேவி ஆயர்மாமகள் ஆகிய நீளாதேவி: நப்பின்னை என்று போற்றப்படும் இப்புலமங்கையைப் பற்றி "ஆழ்வார்களும் ஆசாரியர்களும் போற்றிய ஆயர்மாமகள் [நப்பின்னைப் பிராட்டி]" என்ற கட்டுரையில் விண்ணப்பித்திருந்தேன். ஸ்ரீ நிலமாமகள் ஆகிய ஸ்ரீ பூதேவி குறித்து, "நாய்ச்சியார் திருமொழியில் நவ வித பக்தி" என்ற கட்டுரையில், எம்பெருமான் மீது ஸ்ரீ பூதேவி கொண்டிருக்கும் ஈடு இணையற்ற பக்தி, அவள் ஸ்ரீ ஆண்டாளாகத் திருவவதாரம் செய்தபோது பாசுரங்கள் வாயிலாக வெளிவந்தது என்பதைப் பார்த்தோம். ஆதலால், இக்கட்டுரையில்: ஸ்ரீ பூவராகப் பெருமானின் பட்டத்து அரசியாக விளங்கும் ஸ்ரீ பூமிதேவியின் பெருமைகளையும் எம்பெருமான் ஸ்ரீ பூமிதேவியின் மீது கொண்டிருக்கும் பெருங்காதலையும் ஸ்ரீ பூமிதேவியின் திருவவதாரங்களான: ஸ்ரீ சத்தியபாமைப் பிராட்டியார் திருவவதாரம் ஸ்ரீ ஆண்டாள் நாய்ச்சியார் திருவவதாரம் ஆகிய திருவவதாரங்களின் பெருமைகளையும் ஆழ்வார்களின் பாசுரங்கள் மற்றும் ஆசாரியர்களின் உரைகள் ஆகிய திருவிளக்குகளைக் கொண்டு சுவைப்போம், வாரீர்.

---

ஸ்ரீ நிலமாமகள் நாய்ச்சியார் ஆகிய ஸ்ரீ பூமிப் பிராட்டியார்

Image Source: https://in.pinterest.com/pin/32721534783783169/

பொறுமையே ஸ்ரீ பூமிப் பிராட்டியாரின் தலையாய திருக்கல்யாண குணம்

ஸ்ரீ திருமங்கையாழ்வார் - பெரிய திருமொழி - பாசுரம் # 2-6-2

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"பார் வண்ண மட மங்கை" என்பதற்கு ஆசாரியர் அருளிய உரை: இந்தப் பூவுலகிற்கு நாயக தேவதையாக விளங்குபவள் "ஞாலப் பொன் மாது" என்று சான்றோர்களால் போற்றப்படும் ஸ்ரீ நிலமாமகள் ஆகிய ஸ்ரீ பூமிப் பிராட்டியார். இவள் பொறுமையின் எல்லை நிலம். நாம், எவ்விதமான குற்ற உணர்வும் இன்றி, இவளிடத்தில் எண்ணற்ற குற்றங்களைப் புரிகின்றோம். நம் கால்களால் இவளை மிதிக்கின்றோம். ஆகிலும், இவள் தனது பொறுமையை இழப்பதில்லை. இவள் எம்பெருமானுக்கும் பொறுமையைக் கற்பிப்பவள். இவளும் திருமாமகளும் எம்பெருமானுக்கு இருபுறமும் திகழ்கையில், நாம் அவனைக் கிட்டி, அவன் திருவருளைப் பெறுவது நிச்சயம்.

---

எம்பெருமான் பார் வண்ண மட மங்கைக்குப் பக்தர் என்று ஸ்ரீ திருமங்கையாழ்வார் அருளியுள்ளார்!

ஸ்ரீ திருமங்கையாழ்வார் - திருநெடுந்தாண்டகம் - பாசுரம் # 18

"பக்தர்" என்னும் அளவிற்கு ஸ்ரீ நிலமாமகளுக்காக எம்பெருமான் என்ன செய்தான்? காண்போம்.

ஸ்ரீ திருமங்கையாழ்வார் - பெரிய திருமொழி - பாசுரம் # 4-4-8

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

இப்பாசுரத்தில் ஸ்ரீ பூமிப் பிராட்டியின் பொருட்டு எம்பெருமான் மிகப்பெரிய காட்டுப் பன்றி உருவம் எடுத்தது பற்றிப் பேசப்படுகிறது. எம்பெருமான் திருக்குளம்பில் உள்ள சிலம்பில், பரல்கள் போல், பெரிய மேரு மலை சிக்கி, "கண கண" என்று ஒலியெழுப்பியது; திருமகள் உறையும் ஆகாரம் [திருமேனி] குலுங்கியது; பூமியை இடந்து, பூமிப்பிராட்டியைத் தழுவி, தனது தந்தத்தின் மேல் கருநீல மணியை வைத்தது போல் பூமியை வைத்து, ஸ்ரீ கோலவராகப் பெருமான் அருளினான்.

---

"ஏன் பன்றி உருவம் எடுத்துக் கொள்ளவேண்டும்?!" என்ற கேள்விக்கும் பாசுரங்களில் விடை!

ஸ்ரீ நம்மாழ்வார் - திருவாய்மொழி - பாசுரம் # 4-2-6

ஆசாரியர் ஸ்ரீ நம்பிள்ளை உரை - சுருக்கம்

இப்பாசுரச் சொற்றொடர்களுக்கான உரைகளைப் பாரீர்: "மாதர் மா மண்மடந்தை": அன்பும், இனிமையும் நிறைந்த மடந்தையான ஸ்ரீ பூமிப் பிராட்டியார் மாதர்களுள் மிகச் சிறந்தவள். "பொருட்டு ஏனமாய்": இரணியாட்சன் என்ற அரக்கன் ஸ்ரீ நிலமாமகளை ஆவரணக்கடல் நீருக்கடியில் ஒளித்துவைத்தான். ஸ்ரீ பூமிப் பிராட்டியார் கடல் பாசியில் துன்புற்று இருந்தாள். அன்புக்குரிய தலைவி பாசியில் துவண்டு போயிருக்க, அவளது உயிரின் தலைவன், எவ்விதமான சலனமும் இன்றி, எந்த அழுக்கும் உடலில் ஒட்டாமல் இருப்பது அத்தலைவனுக்கு அழகாமோ? இதனாலேயே, ஸ்ரீ பூமிப் பிராட்டியின் பொருட்டு, நீரையும், பாசியையும், சேற்றையும் கண்டு விலகாத உயிரினமான பன்றியின் உருவத்தை எம்பெருமான் எடுத்துக்கொண்டான்! "அம் காலத்து": ஏனமாய் எம்பெருமான் தோன்றியபோது அவன் மிகவும் அழகாக இருந்தான். இதனாலேயே ஆழ்வார்கள் ஸ்ரீ வராகப் பெருமானைக் "கோல வராகம்" என்று அழைப்பர். ஆதலால், ஸ்ரீ ஆழ்வார் ஸ்ரீ கோல வராகம் திருவவதாரம் செய்த அந்தக் காலத்தை மிகவும் "அழகான காலம்" எனப் போற்றுகின்றார். குறிப்பு: ஸ்ரீ பூவராகப் பெருமான் திருவவதாரம் செய்தருளியபோது, முனிவர்களும், "செம்பெரும்தாமரைக்கண்ணா! நீ இவ்வுருவம் எடுத்து வந்தாலும், உன் திருக்கண்கள் நீ யார் என்பதைத் தெள்ளத் தெளிவாகக் காட்டிக்கொடுத்துவிட்டன! உன் திருமேனி யக்ஞங்கள் செய்யப் பயன்படும் மங்கலப் பொருட்களின் வடிவமாகவே உள்ளது!" என்று போற்றினர். இதனால், ஸ்ரீ யக்ஞவராகன் என்றும் இப்பெருமான் அழைக்கப்படுகின்றார்.

---

ஸ்ரீ திருமங்கையாழ்வார் - பெரிய திருமொழி - பாசுரம் # 2-6-3

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"ஏனத்தின் உருவாகி நிலமங்கை எழில் கொண்டான்" என்பதற்கு ஆசாரியர் அருளிய உரை: மனத்துக்கு இனியவர்களின் விருப்பத்திற்கு ஏற்ப ஒருவர் தம்மை அலங்கரித்துக் கொள்வது போல், ஸ்ரீ பூமிப்பிராட்டியாரின் திருவுள்ள உகப்புக்கு ஏற்ப, தன்னை ஏனத்தின் உருவத்தால் எம்பெருமான் அலங்கரித்துக் கொண்டான். ஸ்ரீ கோலவராகப் பெருமான், ஸ்ரீ பூமிப்பிராட்டியாரின் எழில் கலையாத வண்ணம், அவளை மிகவும் மென்மையாக மீட்டெடுத்தார். "வைகுந்தத்து அமரர்களுக்குத் தலைவராக இருப்பவர், நம் பொருட்டு இப்படி ஒரு உருவம் எடுத்துக் கொண்டாரே!" என்று நெகிழ்ந்த ஸ்ரீ நிலமாமகள், தம்முடைய எழிலை அவ்வெம்பெருமானுக்கே அளித்தனளாம்.

---

மேற்கூறியவற்றை ஸ்ரீ நிலமாமகளே ஸ்ரீ ஆண்டாளாகத் திருவாய்மலர்ந்து அருளினாள்

ஆழ்வார் திருமகளார் ஆண்டாள் - நாய்ச்சியார் திருமொழி - பாசுரம் # 11-8

ஆசாரியர் ஸ்ரீ பெரியவாச்சான் பிள்ளை உரை - சுருக்கம்

இந்தப் பாசுரத்தில் உள்ள பல சொற்றொடர்களுக்கு மிகவும் அழகான உரைகள் வரையப்பட்டுள்ளன: "பாசி தூர்த்துக் கிடந்த பார்மகட்கு": ஆவரண நீரில் பல நாள் கிடந்த இப்பூவுலகம் பாசி தூர்த்துக் கிடந்தது. இதனால், இப்பூவுலகின் நாயக தேவதையான பார்மகளாம் பூமிப்பிராட்டியார் மிக்க வருத்தமுற்றாள். "மாசுடம்பில் நீர் வாரா": இதைக் கண்ட எம்பெருமான், "என் மனத்துக்கினியாள் அழுக்குப் படிந்திருக்க, நான் பார்த்திருப்பேனோ?" என்றெண்ணி, ஏனத்தின் உருவெடுத்தான். திருமேனியில் சேற்று நீருடனும், அழுக்குடனும் காட்சியளித்தான். "மானமிலா": தான் வைகுந்தத்து அமரர்கள் அதிபதி என்பதை அவன் எள்ளளவும் பொருட்படுத்தவில்லை! பன்றியாம்: கோரைக்கிழங்குகளை உண்டான். நிலத்தில் திரியும் சராசரிப் பன்றிகளும் அவனை வேறாக நினைக்கமுடியாத வண்ணம் அவன் திருமேனி விளங்கியது. தேசுடைய தேவர்: அடியார்களுக்காக எந்த எல்லைக்கும் சென்று காத்தருளும் இந்த அற்புதமான திருக்கல்யாண குணத்தால், இந்தக் கோல வராகப் பெருமான் தேசு [ஒளி] உடையவனானான்.

---

ஸ்ரீ நிலமாமகளுக்காகவே மிக்க புகழ் பெற்ற மற்றொரு திருவவதாரமும் எடுத்தான்!

துவாபர யுகத்தில் ஸ்ரீ சத்தியபாமைப் பிராட்டி

Image Source: https://in.pinterest.com/pin/180214422576558957/

ஸ்ரீ கண்ணன் திருவவதாரம் பூமியின் சுமையை நீக்கவே!

ஸ்ரீ நம்மாழ்வார் - திருவாய்மொழி - பாசுரம் # 9-1-10

ஆசாரியர் ஸ்ரீ நம்பிள்ளை உரை - சுருக்கம்

"மண்ணின் பாரம் நீக்குதற்கே வடமதுரைப் பிறந்தான்" என்பதற்கு ஆசாரியர் உரை: அகழ்வாரையும் தாங்கும் ஸ்ரீ பூமிதேவியும் பொறுக்க முடியாதபடி, எம்பெருமானுக்குத் துரோகம் செய்பவர் மிகவும் மலிந்து போக, அவளே எம்பெருமானைக் காக்கும்படி வேண்ட, ஸ்ரீ கண்ணனாக வந்து பிறந்தான். [பிறந்த சில நாள்களிலிருந்து தொடங்கி, திருவவதாரம் முடித்துக்கொள்ளும் வரையில், ஸ்ரீ பூமிக்குச் சுமையாகத் திரிந்த எண்ணற்ற அசுரக் குணத்தோரை வேட்டையாடிக் கொன்றான்.]

---

ஸ்ரீ சத்தியபாமை பிராட்டியின் சிறப்பு

ஸ்ரீ திருமங்கையாழ்வார் - பெரிய திருமொழி - பாசுரம் # 3-4-8

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

எம்பெருமான் ஸ்ரீ கண்ணனாகப் பிறந்தபோது, அவனுக்கென்றே ஸ்ரீ பூமிதேவியும் ஸ்ரீ சத்தியபாமையாகத் திருவவதாரம் செய்தனள். அவளது திருமேனி எழிலை இப்பாசுரம் போற்றுகின்றது: "அழகிய சிற்றிடையும், பவளம் போன்ற செம்மையான உதடுகளும், மூங்கில் போன்ற தோள்களும், பெண் மான் போன்ற அழகிய, நீண்ட கண்களும், பால் போன்ற இனிய சொல்லும், அவள் கூந்தலைத் தொட்டதால் மலர்ந்த மொட்டுக்களில் தேனும், நறுமணமும் நிறைந்திருக்கும் பெருமை உடைய ஸ்ரீ சத்தியபாமைப் பிராட்டிக்குத் தேவர்களின் தலைவனான இந்திரனின் தோட்டத்திலுள்ள கற்பகத் தருவைத் திருத்துவாரகைக்கு ஸ்ரீ கண்ணன் கொண்டுவந்தான். அவனே திருத்தெற்றியம்பலம் என்ற திருத்தலத்தில் செங்கண்மாலாக அருள் புரிகின்றான்," என்கிறார் ஆழ்வார்.

---

ஸ்ரீ திருமங்கையாழ்வார் - பெரிய திருமொழி - பாசுரம் # 4-6-8

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

ஸ்ரீ கண்ணன் எம்பெருமானும், ஸ்ரீ சத்தியபாமையும் நரகாசுரனை முடித்த பின், இந்திரனிடம் நரகாசுரன் பறித்த செல்வங்களை இந்திரனுக்கே மீண்டும் அருள, இந்திரலோகம் சென்றனர். அங்கே, இந்திரனின் பொழிலில் திருப்பாற்கடலில் உதித்த கற்பகத்தரு இருந்தது. அதன் மலர்களைக் கண்டு மகிழ்ந்த ஸ்ரீ சத்தியபாமை, இந்திரனின் மனைவியான சசியிடம் அம்மலர்களைத் தரும்படி கேட்டாள். சசியோ, அவர்கள் அப்பொழுது செய்திருந்த உதவியையும் மறந்து, "இவையெல்லாம் மானிடருக்குத் தகுந்தவை அல்ல," என்று கூறிவிட்டாள். இதனால் மனம் நொந்த ஸ்ரீ சத்தியபாமை, அம்மலர்களைக் கொண்டு வரும்படி ஸ்ரீ கண்ணன் எம்பெருமானிடம் கேட்டாள். ஸ்ரீ கண்ணன் எம்பெருமானும் இந்திரனைப் போரில் எளிதில் வென்று, கற்பக மரத்தை ஸ்ரீ சத்தியபாமையின் அரண்மனைத் தோட்டத்தில் நட்டான். இந்நிகழ்வை ஆழ்வார் பாடுகின்றார். இப்பாசுரத்தில், ஆசாரியர் "ஏவிளம்" என்ற சொற்றொடரை "ஏவு இளம்" என்றும், "ஏவ இளம்" என்றும் இரு வகையாகப் பிரித்து, அதற்கேற்ப பொருள்களும் அருளியுள்ளார்: "ஏவு" என்றால் "போர்" என்று ஒரு பொருள்: "போரில் இந்திரனை வென்று கற்பகத் தருவை ஸ்ரீ கண்ணன் கொண்டு வந்தான்," என்று பொருள். "ஏவ" என்றால் "ஸ்ரீ சத்தியபாமை ஸ்ரீ கண்ணன் எம்பெருமானை ஏவ" என்று இன்னொரு பொருள் கிடைக்கும்: "எனக்காக இதைச் செய்வீர்!" என்று ஸ்ரீ சத்தியபாமை ஏவினால், "இச்சிறப்பான பெண்மணிக்காக எதையும் செய்யலாம்!" என்றே ஒருவருக்குத் தோன்றுமாம். அவ்வளவு பெருமை உடையவளாம் ஸ்ரீ சத்தியபாமைப் பிராட்டி. அதனால், ஸ்ரீ கண்ணன் எம்பெருமான் அவளுக்காகக் கற்பகத்தருவைக் கொண்டு வந்தான் என்று பொருள்.

---

கலியுகத்தில் ஸ்ரீ ஆழ்வார் திருமகளார் ஆண்டாள்

Image Source: @vishnuprabhanc

ஸ்ரீ ஆண்டாள் திருவவதாரத்தின் குறிக்கோள்

திருமால் ஸ்ரீ கோல வராகமாகத் தோன்றி இரணியாட்சன் என்ற அசுரனைக் கொன்று ஸ்ரீ பூமிதேவியை மீட்டார் என்று அறிவோம். அப்பொழுது எம்பருமானுக்கும் பிராட்டிக்கும் நிகழ்ந்த உரையாடல் ஸ்ரீ வராகப் புராணமாக வடிவம் பெற்றது.

ஸ்ரீ நிலமாமகள் நாச்சியார் ஸ்ரீ ஞானப்பிரான் என்ற திருநாமம் உடைய ஸ்ரீ வராகப் பெருமானிடம், "பூமியில் வாழும் நம் குழந்தைகள் உம்மை அடைய ஒரு எளிய வழியை அருள்வீர்" என்று வேண்ட, "என் பெயர்களைப் பாடினால், என்னை மனத்தினால் சிந்தித்தால், என்னைத் தூய மலர்களால் அர்ச்சித்தால் என்னை அடையலாம்," என்று திருமால் அருளினார். இதை நமக்கு வெளியிடுவதே ஸ்ரீ நிலமாமகளின் திருவவதாரமான ஸ்ரீ ஆண்டாளின் குறிக்கோள்.

இந்த இரகசியத்தை ஸ்ரீ இராமானுசரின் முக்கியமான சீடர்களுள் ஒருவரான ஸ்ரீ திருமலை அனந்தான்பிள்ளை என்பவர் தம்முடைய "ஸ்ரீ கோதா சதுசுலோகி" என்ற துதி நூலில் அருளியுள்ளார்.

ஸ்ரீ வராகப்பெருமானின் மூன்று அறிவுரைகளையும் ஸ்ரீ ஆண்டாள் தெள்ளத்தெளிவாக அருளினாள்.

ஸ்ரீ ஆழ்வார் திருமகளார் ஆண்டாள் - திருப்பாவை - பாசுரம் # 5

---

திருமால் பெயர்களைப் பாடச் சொன்னதன் பின்னணி

திருப்பாவையில் "ஓங்கி உலகளந்த உத்தமன் பேர் பாடி," "வாயினால் பாடி," "உன் மைத்துனன் பேர் பாட" என்று பல இடங்களிலும் பெயர்களைப் பாடுவதைக் குறித்து நம் கோதை அருளியது ஏன்? இதற்கு ஸ்ரீ இராமானுசரின் வாரிசான ஸ்ரீ பராசர பட்டரின் விளக்கம் ஒன்று உண்டு.

ஸ்ரீ வராகப் புராணத்தின் ஒரு பகுதி ஸ்ரீ கைசிக புராணம். இந்தப் புராணம் திருமால் உகந்த ஏகாதசி திதி அன்று, இரவு முழுவதும் திருமால் பெருமையைப் பாடி வந்த "ஸ்ரீ நம்பாடுவான்" என்ற ஒரு அற்புதமான திருமாலடியார் [சண்டாளர் குலத்தில் உதித்தவர்] பற்றி இயம்பும்.

ஒரு கார்த்திகை மாத வளர்பிறை ஏகாதசி அன்று இரவு, ஸ்ரீ நம்பாடுவானைப் பசியில் வாடிய ஒரு பிரம்மராட்சதன் கொல்ல முயல, “திருமாலைப் பாடிய பின் உனக்கு உணவாகின்றேன்!” என்று ஸ்ரீ நம்பாடுவான் 18 சபதங்கள் செய்து, பிரம்மராட்சதனிடம் விடைபெற்று, இரவு முழுவதும் திருமால் பெருமையைப் பாடி, மனித உருவில் வந்த இறைவன், “உயிர் தப்ப வாக்கினைத் தவறுவது குற்றமாகாது!” என்று அறிவுறுத்தியும் அதை மறுத்து, தாம் அளித்த வாக்கினை மெய்ப்பிக்க பிரம்மராட்சதன் இருக்கும் இடம் நோக்கி விரைந்தார்.

சொன்ன சொல் தவறாமல் மீண்டும் வந்த ஸ்ரீ நம்பாடுவானைக் கண்டு வியந்த பிரம்மராட்சதன், “நீ பாடிய பாடல்களின் நற்பயனை எனக்கு அளித்தால் உன்னை விடுவேன்,” என்று பல முறை நயமாகப் பேசியும், ஸ்ரீ நம்பாடுவான் தாம் செய்த இறைச்சேவையைத் தம் உயிருக்கு விலை பேசவில்லை. அதிர்ந்த பிரம்மராட்சதன், ஸ்ரீ நம்பாடுவானின் அடி பணிந்து, “இக்கொடிய பிரம்மராட்சதப் பிறவியிலிருந்து எனக்கு முக்தி அளிப்பீர்” என்று கெஞ்ச, ஸ்ரீ நம்பாடுவானும் கருணையுடன் தாம் பாடிய கைசிகப் பண்ணில் அமைந்த பாடலின் நற்பயனை அளித்தார். பிரம்மராட்சதனும் நற்குடியில் ஒரு அடியாராகப் பிறந்து இறுதியில் மோட்சத்தை அடைந்தார்.

திருமால் ஸ்ரீ நம்பாடுவானுக்கு இந்திரலோகத்துச் சுகங்களை அளித்தபோதும், அவர் சுவர்க்கத்திலும் எம்பெருமானின் பெருமையையே பாடி இருந்தார். மற்ற தேவர்களையும் பாட்டு கேட்கும் படிச் செய்தார்!

தன்னலம் அற்றதும், எள்ளளவும் பிசகாததும் ஆகிய ஸ்ரீ நம்பாடுவானின் பக்தியைக் கண்டு மிகவும் உகந்த திருமால், ஸ்ரீ நம்பாடுவான் பரமபதத்தை அலங்கரிக்கச் செய்தார்.

"ஸ்ரீ கைசிக புராணத்தை என் சந்நிதியில் வாசிப்பவனும் கேட்பவனும் என்னை வந்தடைகின்றான்," என்று ஸ்ரீ வராகப் பெருமான் அருள, இச்சரித்திரத்தை மிகவும் விரும்பித் திருச்செவியுற்ற ஸ்ரீ நிலமாமகள் நாய்ச்சியார் பெருமகிழ்ச்சி எய்தியதாக இப்புராணம் கூறுகின்றது.

இதுவே ஸ்ரீ ஆண்டாள், "இறைவனின் பெயர்களைப் பாடவேண்டும்," என்று அருளியதன் இரகசியம் என்று ஸ்ரீ பராசர பட்டர் விளக்கியுள்ளார்.

---

ஸ்ரீ ஆண்டாள் திருவவதாரத்தின் ஒப்பற்ற சிறப்பு

ஸ்ரீ மணவாள மாமுனிகள் - ஸ்ரீ உபதேசரத்தினமாலை - பாசுரம் # 22, 23, 24

ஆசாரியர் ஸ்ரீ பிள்ளைலோகம் ஜீயர் உரை - சுருக்கம்

"எமக்காக அன்றோ இங்கு ஆண்டாள் அவதரித்தாள்" மன்னருக்குச் சொந்தமான மென்மையான மஞ்சத்தின் வசதிகளைத் துய்க்க அரசிக்கு உரிமை இருந்தாலும், அவள் அந்தச் சுகபோகங்களைப் புறக்கணித்துவிட்டு, தன் குழந்தை கிடக்கும் தொட்டிலுக்குப் பக்கத்தில் அன்றோ இருப்பாள்? ஆழ்கிணற்றுள் தன் குழந்தை போராடும் போது, எந்தத் தாயும் இன்பத்தைச் சுவைப்பாளோ? குழந்தையைக் காப்பாற்ற அக்கிணற்றுக்குள் குதிப்பாள் அன்றோ? அதேபோல், பூமித்தாயான ஸ்ரீ ஆண்டாள் பரமபதம் [ஸ்ரீ வைகுண்ட லோகம்] வழங்கிய சுகபோகங்களைப் புறக்கணித்து, அவளை நாயக தேவதையாக உடைய இப்பூவுலகில், பட்டர்பிரான் கோதையாக, கலியுகத்தில், நமக்காகவே அவதரித்தாள். "பெரியாழ்வார் பெற்றெடுத்த பெண்பிள்ளை" ஸ்ரீ பெரியாழ்வாரின் திருத்தேவியார் ஸ்ரீ விரஜா ஸ்ரீ ஆண்டாள் ஆகிய குழவியைத் தம் கைகளில் தாங்கியபோது, அவருடைய திருமுலைத்தடங்கள் தாய்ப்பாலால் நிறைந்தன. இது பெற்றெடுத்த தாய்க்கு மட்டுமே நடக்கும்! இதனால், ஸ்ரீ ஆண்டாள் "பெரியாழ்வார் பெற்றெடுத்த பெண்பிள்ளை" என்றே கொண்டாடப்படுகிறாள். இந்த விலைமதிப்பற்ற உறவைத் திருத்தகப்பனாரும் திருமகளாரும் கொண்டாடியுள்ளனர். ஸ்ரீ ஆண்டாள் தான் பாடிய ஒவ்வொரு பிரபந்தத்திலும், தன்னை ஸ்ரீ பெரியாழ்வாரின் திருமகளாராகவும், சிஷ்யையாகவுமே அறிவிக்கின்றாள். "பட்டர்பிரான் கோதை" என்றாள் அன்றோ? அவள் ஸ்ரீ கண்ணன் எம்பெருமானிடம் கொண்ட பெருங்காதலுக்குக் காரணமே, ஸ்ரீ கண்ணன் எம்பெருமான் ஸ்ரீ பெரியாழ்வார் திருவுள்ளம் உகந்த தெய்வம் என்பதேயாம். ஸ்ரீ பெரியாழ்வார் - ஸ்ரீ பெரியாழ்வார் திருமொழி - பாசுரம் # 3-8-4 "அஞ்சுக்குடிக்கு ஒரு சந்ததி" தமிழில் "அஞ்சு" என்ற சொல் 5 என்ற எண்ணைக் குறிக்கும் அல்லது அச்ச உணர்ச்சியைக் குறிக்கும்: ஸ்ரீ ஆண்டாளுக்கு முன் 5 ஆழ்வார்கள் திருவவதாரம் செய்தார்கள். ஸ்ரீமுதலாழ்வார்கள் பிரிக்கமுடியாதவர்கள் என்பதால் அவர்களை ஒன்றாக கணக்கிட்டால், ஸ்ரீ ஆண்டாள் 5 ஆழ்வார்களின் ஞான வாரிசு. அவர்களின் பக்தி, ஞானம் அனைத்தையும் அவள் பிறந்த வீட்டுச் சீராக ஒரு சேரப் பெற்றாள். மேலும், திருமாலுக்கு ஏதாவது ஆபத்து வந்துவிடுமோ என்ற அச்சத்தில் எப்போதும் திருமாலுக்குப் பல்லாண்டு பாடி வருபவர் ஸ்ரீ பெரியாழ்வார். அத்தகைய புகழ்பெற்ற திருவம்சத்தின் வாரிசு ஸ்ரீ ஆண்டாள். "ஆழ்வார்கள் தம் செயலை விஞ்சி நிற்கும் தன்மையள்" அவள் பாசுரங்கள் யாவும் எம்பெருமானின் மணவாட்டி என்ற மனோபாவத்தில் மட்டுமே பாடினாள். அனைத்து அடியார்களையும் [பாசுரம் 1-15] எழுப்பியே அவள் திருப்பாவையைத் தொடங்குகிறாள். பின், ஆசாரியர்களையும் நித்யசூரிகளையும் துயிலெழுப்புகின்றாள் [பாசுரம் 16-17]. அதன் பின், திருமாமகளைத் துயிலெழுப்புகின்றாள் [பாசுரம் 18 - 20]. அதற்குப் பிறகே திருமாலைத் துயிலெழுப்புகின்றாள். இது திருமாலின் அருளைப் பெறுவதற்குக் கடைபிடிக்க வேண்டிய நெறிமுறை பற்றிய ஞானம் மட்டுமல்ல. திருமாலடியார்களின் பெருமை பற்றிய ஞானம் மற்றும் திருமாலைக் காட்டிலும் அவர்களுக்கு முன்னுரிமை கொடுத்து மதித்தல் வேண்டும் என்பது பற்றிய ஞானமும் ஆகும். மற்ற ஆழ்வார்கள் இந்த ஞானத்தை காலப்போக்கில் மட்டுமே அடைந்தனர். "சரணாகதி" பாதையில் செல்லும் பிரப்பன்னர்கள் ஆகிய ஸ்ரீவைஷ்ணவர்கள், தம் முயற்சியால் இறைவனின் திருவடிகளை அடையும் "பக்தி உபாசனை" பாதையில் செல்லக்கூடாது. இது மட்டுமின்றி, சரணாகதி செய்யும்போது, தங்கள் ஆன்மாவைத் திருமாலுக்கு மணவாட்டியாகத் தந்துவிட்டதால், திருமாலைத் தவிர வேறு எந்தத் தெய்வத்தையும் வணங்கவும் கூடாது. இப்படி இருக்க, திருமாலின் திருவடிகளை விரைவில் அடைய வேண்டும் என்ற துடிதுடிப்பால், மன்மதனை உபாசனை மார்க்கத்தில் வணங்கும் அளவிற்குச் சென்றாள் ஸ்ரீ கோதை. "பிஞ்சாய்ப் பழுத்தாள்" ஒரு மலர் முதலில் பிஞ்சாகி, பின் காயாகி, இறுதியில் பழமாகும். அதேபோல், ஒரு ஜீவாத்மா முதலில் பரபக்தி என்ற நிலையை அடைந்து, பின் பரஞானம் என்ற நிலையை அடைந்து, இறுதியில் பரமபக்தி என்ற நிலையை அடையும். பரமபக்தியின் முதல் படி திருமாலுக்கு அடிபணிவது. பரமபக்தியின் எல்லைநிலமே திருமால் அடியார்களுக்கு அடிபணிதல் என்பதாம். காலம் கனிந்தபோது மற்ற ஆழ்வார்கள் அந்நிலையை அடைந்தார்கள். ஆனால், ஸ்ரீ ஆண்டாளோ ஐந்து வயதிலேயே அந்நிலையை அடைந்து திருப்பாவையைத் திருவாய்மலர்ந்தருளினாள்.

---

Image Source: https://in.pinterest.com/pin/853572935625097146/

ஸ்ரீ சூடிக் கொடுத்த சுடர்க்கொடி

ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 16

ஆசாரியர் ஸ்ரீ மணவாள மாமுனிகள் உரை - சுருக்கம்

ஸ்ரீ ஆண்டாள் சூடிக் களைந்த மாலையை, அதன் ஈடற்ற இனிமைக்கும், நறுமணத்திற்கும் தோற்று, ஸ்ரீவில்லிப்புத்தூர் எம்பெருமானாகிய ஸ்ரீ வடபெருங்கோயிலுடையான், "நமக்கு அதுவே மிக்க இனியது காணீர்! தினமும் கொண்டுவருவீர்!" என்று ஸ்ரீ பெரியாழ்வாரிடம் வேண்டிப் பெற்றுக்கொண்டான். திருவரங்கத்திற்கு மற்ற ஒவ்வொரு திவ்வியதேசமும் ஒரு தோட்டம் போலே. திருவரங்கமே முக்கிய திவ்வியதேசம். ஸ்ரீ ஆண்டாள் கைபிடித்ததும் திருவரங்கத்து எம்பெருமானையே. அதனால், ஸ்ரீ ஆண்டாள் அம்மாலையைத் திருவரங்கனுக்கே கொடுத்தாள் எனத் தட்டில்லை. அது மட்டுமின்றி, இன்றும், ஸ்ரீ நம்பெருமாள் ஸ்ரீ ஆண்டாள் சூடிக் களைந்த மாலையை அவரது தை, மாசி, சித்திரை பிரம்மோற்சவங்களின் 6-ம் திருநாள் அன்று காத்திருந்து சூடிக் கொள்வது கண்கூடு. ஆதலால், "அரங்கர் மௌலி சூழ்கின்ற மாலையைச் சூடிக்கொடுத்தவள்" என்றும், "செழுங்குழல் மேல் மாலைத் தொடை தென்னரங்கருக்கு ஈயும் மதிப்புடைய சோலைக்கிளி" என்றும் ஆசாரியர்களால் ஸ்ரீ ஆண்டாள் போற்றப்படுகின்றாள்.

---

முடிவுரை

ஆழ்வார்களும் ஆசாரியர்களும் ஸ்ரீ பூமி தேவியாகிய ஸ்ரீ நிலமாமகள் பெருமைகளை எவ்வளவு அழகாக எடுத்துரைத்துள்ளனர் என்பதை ஓரளவு கண்டோம். திருப்பாவையையும், நாய்ச்சியார் திருமொழியையும் கற்றோர்களிடமிருந்து கற்போம், கல்வி தன்னில் ஆசை உள்ளோருக்குக் கற்பிப்போம். செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புறுவோம்! ஸ்ரீ மணவாள மாமுனிகளின் சீடரான ஸ்ரீ அப்பிள்ளை அருளிய ஸ்ரீ ஆண்டாள் வாழித்திருநாமம் வாழி எதிராசன்! வாழி எதிராசன்! வாழி எதிராசன்! மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://velukkudidiscourses.com/ https://velukkudi.tv/stream/ பொலிக! பொலிக! பொலிக!

---

ஆயர்மாமகள் [நப்பின்னைப் பிராட்டி] பெருமை

ஆழ்வார்களும் ஆசாரியர்களும் போற்றும் ஆயர்மாமகள் [நப்பின்னைப் பிராட்டி]

Image Credit: https://anudinam.org/2011/12/25/nappinnai-piratti/

முன்னுரை

ஸ்ரீ எம்பெருமானார் தரிசனம் என்ற ஸ்ரீவைஷ்ணவத்தில், திருமாலின் பெருமைகளை நான்மறைகள் "புருஷ சூக்தம்" என்கிற பகுதியில் பறைசாற்றுவதாகப் பெரியோர் பணிப்பர். நான்மறைகளுள் திருமாமகளின் பெருமைகளைப் பறைசாற்றும் பகுதி "ஸ்ரீ சூக்தம்" என்றும், நிலமாமகளின் பெருமைகளைப் பறைசாற்றும் பகுதி "பூ சூக்தம்" என்றும் அழைக்கப்படுகின்றன. புருஷ சூக்தத்தில் "ஹ்ரீச் ச லக்ஷ்மீச் ச பத்ந்யௌ" என்று எம்பெருமானின் தேவிமார்கள் விவரிக்கப்படுகின்றனர். "ஹ்ரீ" என்ற சப்தம் நிலமாமகளைக் குறிக்கும். "லக்ஷ்மீ" என்கிற சப்தம் திருமாமகளைக் குறிக்கும். இங்கே "ச" என்ற சொல் பயன்படுத்தப்பட்டுள்ளது - இதன் பொருள் "மற்றும்" என்பதாகும். இரண்டு தேவிமார்களின் திருநாமங்கள் ஓதப்பட்டுள்ளன. எனினும், "மற்றும்" என்ற சொல் இருமுறை பயன்படுத்தப்பட்டுள்ளது. ஆகையால், மூன்றாவதாக ஒரு தேவியாரின் திருநாமம் மறைமுகமாக உணர்த்தப்படுகிறது. அவளே நீளா தேவி. திருமாமகளின் வள்ளல் தன்மையும், நீர்மையும் சேர்ந்து நீளா தேவி என்ற வடிவெடுத்து வந்தது. ஆழ்வார்களும் ஆசாரியர்களும் நீளா தேவியாகிய நப்பின்னைப் பிராட்டியை எவ்வாறு போற்றியுள்ளனர் என்பதை ஒரு சில பாசுரங்களைக் கொண்டு சுவைப்பதே இக்கட்டுரையின் நோக்கம்.

---

ஸ்ரீ நீளா தேவி என்கிற நப்பின்னைப் பிராட்டி

நீளா தேவியின் பெருமைகளை "நீளா சூக்தம்" என்ற வேதப் பகுதி முழங்குகின்றது: ஜீவாத்மாவிற்கு ஒரு நல்வழியைக் காட்டுபவள் பரமாத்மாவையும் ஜீவாத்மாவையும் ஒன்று சேர்ப்பவள் எம்பெருமானுக்கும் ஜீவர்களான நமக்கும் நெருக்கத்தை ஏற்படுத்துபவள் பசும்நெய், பசும்பால் ஆகிய அருட்கொடைகளை நமக்கு அருள்பவள் நமது இகபர நல்லாசைகள் யாவும் நிறைவேற அருள்பவள் இவளுக்குத் தேவகுரு என்கிற பிருகசுபதியும், வாயுவும் அடியவர்கள் என்று இந்த சூக்தம் முழங்குவதாகப் பெரியோர் விளக்கியுள்ளனர். இந்த நீளா தேவியே நப்பின்னையாக ஆயர் குலத்தில் திருவவதாரம் செய்து, கண்ணனைக் கைப்பிடித்தாள். ஆதலால், ஆழ்வார்கள் இவளை ஆயர்மாமகள் எனக் கொண்டாடுவர். ஏரார்ந்த கண்ணி யசோதையின் சகோதரரான கும்பர் என்பவருக்கும், அவரது மனைவியார் தர்மதை என்பவளுக்கும் பிறந்த பெண்பிள்ளையே பின்னை. நற்குணங்கள் நிறைந்த நங்கை ஆதலால், இவளை நல் + பின்னை = நற்பின்னை என்கிற நப்பின்னை என வழங்கலாயிற்று. நப்பின்னைப் பிராட்டி தனது ஒப்பற்ற திருமேனி எழிலாலும், குறையொன்றுமில்லாத நற்குணங்களாலும் எம்பெருமானின் புலன்களுக்கே கூட மிக்க மகிழ்ச்சி அளிக்கின்றாள். நமக்குப் பசும்பால் மற்றும் பசும்நெய் வளத்தை அருளும் நம் அன்னையான இவள், நமக்கு ஆயுள், உடல்நலம் போன்ற செல்வங்களை அருள்வதால், நம்முடைய ஐம்புலன்களுக்கும் மகிழ்ச்சியை அருள்கின்றாள். இதனால், இவளுக்கு ஆழ்வார்கள் அருளிய "புலமங்கை" என்ற திருநாமமும் உண்டு. Image Credit: http://anudinam.org

---

நப்பின்னைப் பிராட்டியின் பெருஞ்சிறப்பு

ஸ்ரீ திருமழிசை ஆழ்வார் - திருச்சந்தவிருத்தம் - பாசுரம் # 41

ஆசாரியர் ஸ்ரீ நம்பிள்ளை உரை - சுருக்கம்

"ஆயர் மங்கை வேய தோள் விரும்பினாய்" என்ற சொற்றொடருக்கு உரையில் உள்ள விளக்கம் பாரீர்: இங்கே, "மங்கை" என்ற சொல்லுக்கு "நித்ய நவ யௌவனம்" என்று ஆசாரியர் பொருள் உரைத்துள்ளார்! அதாவது, "ஒவ்வொரு நாளும் புதிதாக தோன்றுவதும், என்றென்றும் மாறாததுமாகிய இளமை உடையவளாம் நப்பின்னைப் பிராட்டி! நாள்தோறும், அவளுக்கு 16 வயது முடிந்து, 17வது பிறந்த நாள் பிறக்குமாம்! "வேய தோள்" என்ற சொற்றொடருக்கு உள்ள உரை: "மூங்கில் போன்றதும், மெல்லியதும், உயர்ந்ததும், இளமையானதும், மிகவும் விரும்பத்தக்கதும் ஆகிய தோள் உடைய நப்பின்னைப் பிராட்டி" என்பதாம். "கண்ணனைத் தவிர வேறு ஒன்றையுமே பயனாகக் கருதாத நப்பின்னைப் பிராட்டியை, ஏழு காளைகளை அடக்கி, கண்ணன் காத்தமை, '[அவளைப் போலவே] கண்ணனையே பயனாகக் கருதும் அடியவர்களைக் காப்பவன் கண்ணன்,' என்பதைக் காட்டும்," என்று ஆசாரியர் உரையில் குறிப்பிட்டுள்ளார்.

---

நப்பின்னைப் பிராட்டி கண்ணன் எம்பெருமான் மீது கொண்டிருக்கும் மெய்க்காதல்

ஸ்ரீ திருமங்கையாழ்வார் - பெரிய திருமொழி - பாசுரம் # 2-3-5

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"தன் துணை ஆயர் பாவை நப்பின்னை தனக்கு இறை" என்பதற்கு ஆசாரியர் அருளிய உரை: "எந்த மாவீரன் நான் காட்டும் ஏழு முரட்டுக் காளைகளை அடக்கி வெல்கின்றானோ, அவனுக்கே நப்பின்னையைத் திருமணம் செய்து கொடுப்பேன்!" என்று கும்பர் அறிவித்துவிட்டார். இதனால், கண்ணனும் நப்பின்னையும் ஒருவரை ஒருவர் காதலித்த போதும், போட்டியின் முடிவைக் கொண்டே திருமணம் நிச்சயிக்கப்படும் நிலை. "என் உடலும் உயிரும் கண்ணனுக்கே. வேறொருவருக்குப் பேச்சுப்படில் வாழகில்லேன்!" என்ற நிலையில் இருந்த நப்பின்னை, "கண்ணனே வெல்லவேண்டும்!" என்று ஆவலுடன் காத்திருந்தாள். கண்ணனைத் தவிர வேறு ஒரு துணையை நினைத்தும் பாராதவள் நப்பின்னை என்பதால் ஆழ்வார் "தன் துணை ஆயர் பாவை நப்பின்னை தனக்கு இறை" என்று கண்ணனைப் போற்றுகின்றார்.

---

கண்ணன் எம்பெருமான் நப்பின்னைப் பிராட்டி மீது கொண்டிருக்கும் பெருங்காதல்

ஸ்ரீ திருமழிசை ஆழ்வார் - நான்முகன் திருவந்தாதி - பாசுரம் # 33

ஆசாரியர் ஸ்ரீ நம்பிள்ளை உரை - சுருக்கம்

"வடிப்பவள வாய்ப் பின்னைத் தோளிக்கா வல்லேற்று எருத்திறுத்து" என்ற சொற்றொடருக்கு உரையில் உள்ள விளக்கம்: திருவடியால் சகடாசுரனையும், காளிங்கனையும் வென்றான். திருக்கையால் குவலயாபீடம் என்ற யானையை வென்றான். திருவாயால் பூதனையை முடித்தான். அவதாரங்கள் முடிந்த பின்னும், தன் நினைவாலேயே அடியார்களின் எதிரிகளைப் போக்குவான். எதிரியை எப்படியும் மிக எளிதாக அழிக்கக்கூடியவன். அப்படிப்பட்டவன், பவளம் போன்ற சிவந்த திருவாயை உடையவளும், மிகவும் அழகான தோள்களை உடையவளும் ஆகிய நப்பின்னைக்காக, "அவளது நிகரற்ற பெருமைக்குத் தக்கவாறு பெருமுயற்சி எடுத்து வெல்லவேண்டும்!" என்று எண்ணி, தன்னுடைய திருமேனி முழுவதையும் பயன்படுத்தினான்! அவளுடைய தோள்களைத் தழுவவேண்டும் என்ற ஆசையினால், பாய்ந்து சென்று, மிக்க வலிமை கொண்ட ஏழு காளைகளைத் தன் திருமேனியால் தழுவினான்!

---

தெய்வத் திருமணம் இனிதே நிறைவேறியது!

ஸ்ரீ பேயாழ்வார் - மூன்றாம் திருவந்தாதி - பாசுரம் # 85

ஆசாரியர் ஸ்ரீ நம்பிள்ளை உரை - சுருக்கம்

"பின்னைக்கா ஏற்றுயிரை அட்டான் எழில்" மற்றும் "புவியினார் போற்றி உரைக்கப் பொலியுமே" என்பவைக்கு உரை: "நப்பின்னைப் பிராட்டியுடன் கூடுவதற்குத் தடையாக இருந்த ஏழு காளைகளைக் கண்ணன் எம்பெருமான் அடக்கிய அந்தப் பேரெழிலையும், அதன் பின், நப்பின்னைப் பிராட்டியை அவன் கடிமணம் புரிந்த அந்தப் பேரெழிலையும் பற்றிப் பேசவும் முடியுமோ?" என்று ஆழ்வார் ஈடுபட்டு வியக்கின்றார்.

---

"சரி, கண்ணன் எம்பெருமானும் நப்பின்னைப் பிராட்டியும் ஒருவரை ஒருவர் காதலித்துக் கடி மணம் புரிந்தனர். இதில் நமக்கு என்ன நன்மை?" என்ற கேள்விக்கு விடை:

ஸ்ரீ பெரியாழ்வார் - பெரியாழ்வார் திருமொழி - பாசுரம் # 2-5-1

ஆசாரியர் ஸ்ரீ மணவாள மாமுனிகள் உரை - சுருக்கம்

"பின்னை மணாளனை பேரில் கிடந்தானை" என்பதற்கு ஆசாரியர் அருளும் உரை: கண்ணன் எம்பெருமானின் திருவடிகளைப் பற்ற விரும்புவோருக்கு நப்பின்னை பிராட்டியே முதன்மையான எம்பெருமாட்டியாம். அவளை முன்னிட்டுக்கொண்டே கண்ணன் எம்பெருமானின் திருவடிகளைப் பற்றவேண்டும். எம்பெருமானின் மேன்மையைக் கோடிட்டுக் காட்டுவது அவன் திருமாமகள் கொழுனன் என்பதாம். அது போல, எம்பெருமானின் நீர்மையைக் [எளிமையைக்] கோடிட்டுக் காட்டுவது, அவன் ஆயர்மாமகளான நப்பின்னைப் பிராட்டியின் மணாளன் என்பதாம். நாம் எல்லோரும் எளிதாக சென்று அவனை அடையும்படி, [ஆழ்வார்களின் பாடல் பெற்ற 108 திருத்தலங்களில் ஒன்றான] திருப்பேர் நகர் [கோவிலடி] என்கிற திருத்தலத்தில், அவன் எழுந்தருளியிருப்பதன் வேர்க்காரணமே அவன் நப்பின்னை மணாளன் என்பதாம். குறிப்பு: எம்பெருமான் இயல்பாகவே வள்ளல் தன்மை உடையவன். எனினும், அவ்வள்ளல் தன்மையை அவனது விருப்பப்படி அவன் நடக்கும் சுதந்திரத் தன்மை மறைக்கின்றது. இதனால், நம் குற்றங்களைக் கண்டு நம்மைத் தள்ளிவிட வாய்ப்புள்ளது. பிராட்டி எம்பெருமானுக்கு மிகவும் இனிமையானவள் என்பதால் அவள் சொல்வதை அவன் கேட்பான். அவளுடைய குழந்தைகள் ஆகிய நாம் அவளிடம் சென்று முறையிட்டால், அவள் எம்பெருமானின் சுந்தந்திரத் தன்மையைக் குலைத்து, அவனது வள்ளல் தன்மையை மேலெழச் செய்கின்றாள். இதனைப் புருடகாரம் [புருஷகாரம்] என்பர். இதைச் செய்வதே பிராட்டிமார்களின் இயற்கைத் தன்மையாகும். ஸ்ரீதேவி நாய்ச்சியார் சீதா தேவியாக அரசர் குலத்தில் திருவவதாரம் செய்தருளினாள். இது பெருஞ்சிறப்பு. கருணையின் இலக்கணமான இவள், "குற்றம் செய்யாதவர் எவர்? மன்னிப்பதே பெரியோரின் குணம்," என்று கூறுவாள்! பூதேவி நாய்ச்சியார் பட்டர்பிரான் கோதையாக அந்தணர் குலத்தில் திருவவதாரம் செய்தருளி, திருவாய்ப்பாடி மங்கைகளுள் ஒருத்தியாக தன்னைப் பாவித்துக்கொண்டு வாழ்ந்தருளினாள். இது தனிச்சிறப்பு. பொறுமையின் இலக்கணமான இவள், "குற்றம் செய்தவர் எவர்? [எவருமில்லை!]" என்று கூறிவிடுவாள்!! நீளா தேவி நாய்ச்சியார் திருவாய்ப்பாடி மங்கைகளுள் ஒருத்தியாயான நப்பின்னையாக ஆயர் குலத்தில் திருவவதாரம் செய்தருளினாள். இது தனிப்பெருஞ்சிறப்பு. வண்மை மற்றும் நீர்மையின் இலக்கணமான இவள், "குற்றம் என்றால் என்ன?" என்று கேட்டுவிடுவாள்!!! எனவே, என்றுமே பிராட்டியை முன்னிட்டுக்கொண்டே எம்பெருமானைப் பற்றவேண்டும் என்று பெரியோர்கள் காட்டுகின்றனர். ஸ்ரீ இராமபிரானின் அருளைப் பெற, சீதா தேவியின் திருவடிகளில் விண்ணப்பிக்கவேண்டும். ஸ்ரீ வராகப் பெருமானின் அருளைப் பெற, பூமா தேவியின் திருவடிகளில் விண்ணப்பிக்கவேண்டும். ஸ்ரீ கண்ணன் எம்பெருமானின் அருளைப் பெற, நப்பின்னைப் பிராட்டியின் திருவடிகளில் விண்ணப்பிக்கவேண்டும்.

---

நப்பின்னைப் பிராட்டியுடன் எழுந்தருளியுள்ள கண்ணன் எம்பெருமானின் ஊர் - திருநறையூர்!

ஸ்ரீ திருமங்கையாழ்வார் - பெரிய திருமொழி - பாசுரம் # 6-5-4

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"வெறியார் கூந்தல் பின்னை பொருட்டு ஆன் வென்றான் ஊர்" என்பதற்கு ஆசாரியர் அருளிய உரை: "நறுமணம் மிக்க கூந்தலை உடைய நப்பின்னை பிரட்டிக்காக 7 எருதுகளை வென்ற கண்ணன் எம்பெருமான் உறையும் ஊர் திருநறையூரே," என்று ஆழ்வார் நமக்கு அடையாளம் காட்டுகின்றார். குறிப்பு: "நாய்ச்சியார் கோயில்" என்று பெயர் பெற்ற இவ்வூரில் நப்பின்னை பிராட்டியே 'வஞ்சுளவல்லி' என்ற திருநாமத்துடன் எழுந்தருளியுள்ளாள். இங்கே, அவளுக்கே முதன்மையான இடம் வழங்கப்படுகின்றது. "நம்பிக்கை நாய்ச்சியார்" என்று கொண்டாடப்படும் வஞ்சுளவல்லி நாய்ச்சியார், அவளது சிற்றிடையில் சாவிக்கொத்து தொங்க, ஆசாரியர்கள் விளக்கி அருளிய அந்த நித்ய நவ யௌவனத்துடன், பேரெழில் கொஞ்சும் திருமுகமண்டலத்தில் மடப்பமும் புன்முறுவலும் தவழ எழுந்தருளியுள்ளாள். Image Credit: https://www.pinterest.com/pin/453808099947283462/

---

"சரி, திருநறையூர் சென்ற பின், நப்பின்னைப் பிராட்டியை முன்னிட்டுக்கொண்டு கண்ணனை எப்படிப் பற்றவேண்டும்?" - இக்கேள்விக்குப் பெரியாழ்வார் பெற்றெடுத்த பெண்பிள்ளை அற்புதமான விடைகளைத் திருப்பாவையில் அருளியுளாள்!

ஆழ்வார் திருமகளார் ஆண்டாள் - திருப்பாவை - பாசுரம் # 18

ஆசாரியர் ஸ்ரீ பெரியவாச்சான் பிள்ளை உரை - சுருக்கம்

இந்தப் பாசுரத்தில் உள்ள பல சொற்றொடர்களுக்கு மிகவும் அழகான உரைகள் வரையப்பட்டுள்ளன: நந்தகோபாலன் மருமகளே நப்பின்னாய்: "ஐயர் ஸ்ரீ நந்தகோபனார் பார்த்து நம் கண்ணனுடன் திருமணம் செய்து வைத்தார்" என்ற பெருமிதம் கொண்டவளாம் நப்பின்னைப் பிராட்டி! கந்தம் கமழும் குழலி: நப்பின்னைப் பிராட்டியின் கூந்தலின் நறுமணம் எம்பெருமானுக்கே நறுமணத்தைத் தரக்கூடியதாம். இது நாசி என்ற புலனுடைய இன்பத்திற்குக் காரணமாகும். கடை திறவாய்: நப்பின்னைப் பிராட்டியின் அருளும், எழிலும் திகழும் தெய்வத் திருமேனியைக் காண்பதே கண் பெற்ற பயனாம். பந்தார் விரலி: பந்து என்பது உயிரினங்கள் மற்றும் உணர்வற்ற பொருள்கள் ஆகியவற்றுடன் கூடிய இந்த உலகத்தைக் குறிக்கும். ஒரு கையில் அவளது பிள்ளைகளான நம்மையும், மறு கையில் கண்ணன் எம்பெருமானையும் தமது திருக்கையால் பற்றி இருப்பவள் நப்பின்னைப் பிராட்டி. உன் மைத்துனன் பேர் பாட: கண்ணன் எம்பெருமான் நப்பின்னைப் பிராட்டியிடம் பந்து விளையாட்டில் தோற்றதைப் பாடி, நா பெற்ற பயன் பெற வேண்டும் என்று ஆழ்வார் திருமகளார் ஆண்டாள் வேண்டுகின்றாள். சீரார் வளை ஒலிப்ப: நப்பின்னைப் பிராட்டி என்றுமே கண்ணன் எம்பெருமானைப் பிரியாதவள். எனவே, அவளது திருக்கைகளில் ஒரு நாளும் வளைகள் கழன்று விழுந்ததில்லை! அவளது திருக்கைகளில் உள்ள வளையல்களின் ஓசையைக் கேட்பது செவிச்செல்வத்தின் பயனாம். செந்தாமரைக்கை: "எவரைக் கண்டும் அஞ்சேல்!" என்று எம்பெருமானின் தாமரைக்கை அருளும். நப்பின்னைப் பிராட்டியின் செந்தாமரைக்கை "மாயக் கண்ணனையும் கண்டு அஞ்சேல்!" என்று நமக்கு அருள் பாலிக்கும்!

---

ஆழ்வார் திருமகளார் ஆண்டாள் - திருப்பாவை - பாசுரம் # 19

ஆசாரியர் ஸ்ரீ பெரியவாச்சான் பிள்ளை உரை - சுருக்கம்

கம்சன் ஏவிய குவலையாபீடம் என்ற யானையின் தந்தம் கொண்டு செய்த கட்டிலில் உறங்கும் வீரனின் மணவாட்டி ஆகிய நப்பின்னைப் பிராட்டி, கண்ணன் எம்பெருமானைக் குத்துவிளக்கொளியில் சேவிக்கும் பேறு பெற்றவளாம். "கண்ணனை விட்டுப் பிரிவது" என்ற குற்றம் இல்லாதவள் ஆகையால், அவள் திருக்கண்களில் மையிட்டுள்ளாள். கூந்தலில் மலர்களைச் சூடி உள்ளாள். அவள் தொட்டதாலேயே, பூங்கொத்து அலர்ந்ததாம்; கண்ணனின் மார்பும் மலர்ந்ததாம். அவ்வளவு சிறப்பு வாய்ந்தவளாம் நப்பின்னைப் பிராட்டி. "நம்மை வந்தடைந்தவர்களுக்கு யார் முதலில் அருள் செய்பவர் பார்ப்போம்!" என்று நப்பின்னையும் கண்ணனும் போட்டி போட்டுக்கொண்டு அருள் செய்வராம். "நப்பின்னைப் பிராட்டியே! நீ எங்களுக்கு அருள் செய்வதில் காலம் தாழ்த்துவது, உனது இயற்கைத் தன்மைக்கும், உன் இன்னருளுக்கும் பொருந்தாதல்லவோ?" என்று ஆழ்வார் திருமகளார் ஆண்டாள் வினவுகின்றாள்.

---

ஆழ்வார் திருமகளார் ஆண்டாள் - திருப்பாவை - பாசுரம் # 20

ஆசாரியர் ஸ்ரீ பெரியவாச்சான் பிள்ளை உரை - சுருக்கம்

இது நப்பின்னைப் பிராட்டியின் பெருமைகளை மிகவும் அழகாகத் தெரிவிக்கும் பாசுரம். "செப்பென்ன மென்முலை," "செவ்வாய்," "சிறுமருங்குல்" ஆகிய சொற்களால் நப்பின்னைப் பிராட்டியின் ஒப்பற்ற திருமேனி எழில் கொண்டாடப்படுகின்றன. இதனால், நப்பின்னைப் பிராட்டி கண்ணன் எம்பெருமானுக்கு மிகவும் இனியவளாக இருக்கின்றாள். அது மட்டுமே இன்றி, "செப்பென்ன மென்முலை" என்பது செழுமையான பக்தியைக் குறிக்கும். "செவ்வாய்" என்பது கனிந்த ஞானத்தைக் குறிக்கும். "சிறுமருங்குல்" என்பது வைராக்கியம் என்ற உலகியல் பற்றற்ற தன்மையைக் குறிக்கும். நங்காய்: "நற்குணங்கள் யாவும் நிறைந்த நப்பின்னை" என்று கொண்டாடப்படுகின்றாள். இதனால், நப்பின்னைப் பிராட்டி கண்ணன் எம்பெருமானுக்கு மிகவும் பொருத்தமானவளாகவும் இருக்கின்றாள். திருவே: எம்பெருமானுக்கே பெருஞ்செல்வமாகத் திகழ்பவள்; எம்பெருமானையே தனக்குப் பெருஞ்செல்வமாகப் பெற்றவள்! உன் மணாளன்: உன் வடிவழகுக்கும் நற்குணங்களுக்கும் தோற்று உனக்கு அடங்கி இருப்பவன்! நீராட்டு: உன் பரிந்துரையாலேயே நாங்கள் அவனைப் பெறவேண்டும். “நப்பின்னை பார்த்து எங்களுக்குக் கொடுத்த கண்ணன்” என்று இருத்தல் வேண்டும். நாங்களாக அவனைக் கிட்டியதாக இருத்தல் கூடாது.

---

"சரி, நப்பின்னைப் பிராட்டியை முன்னிட்டுக்கொண்டு கண்ணனைப் பற்றிய பின் என்ன செய்யவேண்டும்?" - இதற்கும் விடைகளை ஆழ்வார்கள் அருளியுள்ளனர்:

ஸ்ரீ நம்மாழ்வார் - திருவாய்மொழி - பாசுரம் # 9-10-4

ஆசாரியர் ஸ்ரீ நம்பிள்ளை உரை - சுருக்கம்

"மான்களைக் கூட நாணச் செய்யும் மிக அழகிய திருக்கண்களை உடையவளும், மடப்பம் நிறைந்தவளும் ஆகிய நப்பின்னை தன் கேள்வன், அடியார்களுடன் கலந்து பழக, உறையும் ஊர் திருக்கண்ணபுரம். அந்தத் திருக்கண்ணபுரத்து எம்பெருமானே நுமக்குச் சரண் ஆகும். தேன் சிந்தும் வாடாமலர்களை இட்டு நீர் அவனை இறைஞ்சுமின்!" என்று ஆழ்வார் நம்மை அழைக்கின்றார்.

---

ஸ்ரீ திருமங்கையாழ்வார் - பெரிய திருமொழி - பாசுரம் # 5-9-8

ஆசாரியர் ஸ்ரீ பெரியவாச்சான்பிள்ளை உரை - சுருக்கம்

"ஏழு உலகங்களும் அறியும்படி, அன்று திருவாய்ப்பாடியில், வஞ்சிக்கொம்பு போன்ற சிறுத்த இடை உடைய நப்பின்னைப் பிராட்டியை அணைவதற்காக, ஏழு எருதுகளைப் பொருதவன் திருப்பேர் நகரில் உறைகின்றான். அவனது திருநாமங்களை ஏத்தி நான் உய்ந்து போனேன் காணீர்!" என்கிறார் ஆழ்வார்.

---

"நப்பின்னைப் பிராட்டியை முன்னிட்டுக்கொண்டு கண்ணனின் பாதம் நண்ணிய எம் ஐயன் இராமானுசனின் புகழை மட்டுமே என் வாய் ஓதும்!" என்கிறார் ஒருவர்:

ஸ்ரீ திருவரங்கத்தமுதனார் - ஸ்ரீ இராமானுச நூற்றந்தாதி - பாசுரம் # 28

ஆசாரியர் ஸ்ரீ மணவாள மாமுனிகள் உரை - சுருக்கம்

இங்கே, "பஞ்சு போன்ற மென்மையான திருவடிகளை உடைய எங்கள் நப்பின்னைப் பிராட்டியின் காதலன் கண்ணன் எம்பெருமான். அந்தக் கண்ணனுடைய பாதம் நண்ணா வஞ்சர்க்கு அரியவர்" என்று ஸ்ரீ இராமானுசர் போற்றப்படுகின்றார். ஸ்ரீ இராமானுசர் துறவறம் ஏற்ற பின், மாதுகரம் ஏற்று உண்ட காலத்தில், பட்டர்பிரான் கோதை அருளிய திருப்பாவையை மனத்துள் தியானித்துக்கொண்டே மாதுகரம் ஏற்கச் செல்வராம். ஒரு நாள், அவரது ஆசாரியர் ஸ்ரீ பெரிய நம்பிகளின் திருமாளிகையின் திருவாசலில் பிட்சை ஏற்க நின்றபோது, [நாம் இக்கட்டுரையில் முன்னமே சுவைத்த] "உந்து மதகளிற்றன்" என்ற திருப்பாவை 18-ம் பாசுரத்தைத் தியானித்துக்கொண்டிருந்தார். அவர் "வந்து திறவாய் மகிழ்ந்தேலோரெம்பாவாய்" என்ற வரியைத் தியானிக்க, அப்போது சரியாக அவரது ஆசாரியருடைய திருமகளான அத்துழாய் கதவைத் திறக்க, "நப்பின்னைப் பிராட்டியே கதவைத் திறந்தாள்!" என்று எண்ணி ஸ்ரீ இராமானுசர் மயங்கி விழுந்துவிட்டார்! அத்துழாய் உள்ளே ஓடிச் சென்று, ஸ்ரீ பெரிய நம்பிகளிடம், "ஐயா! ஜீயர் மயங்கி விழுந்தார்!" என்று விண்ணப்பித்து, அவரை அழைத்து வந்தாள். அவரோ, புன்முறுவல் செய்துகொண்டே, மெதுவாக ஸ்ரீ இராமானுசரை எழுப்பி, "உந்து மதகளிற்றன் பாசுர அனுசந்தானம் செய்தீரோ, திருப்பாவை ஜீயரே?" என்றாராம்! அன்றிலிருந்து, ஸ்ரீ இராமானுசருக்குத் "திருப்பாவை ஜீயர்" என்ற சிறப்புத் திருநாமம் ஏற்பட்டது. இதனால், ஸ்ரீ இராமானுசர் நப்பின்னைப் பிராட்டியின் திருவடிகளுக்கு மிகவும் அன்பு பூண்டவர் என்று விளங்குகின்றது அல்லவா? "அப்படிப்பட்ட ஸ்ரீ இராமானுசருடைய புகழையே என் வாய் ஓதும்! என்னே நான் பெற்ற வாழ்ச்சி!" என்று திருவரங்கத்து அமுதனார் பூரிக்கின்றார்.

---

முடிவுரை

ஆழ்வார்களும் ஆசாரியர்களும் நீளா தேவியாகிய நப்பின்னைப் பிராட்டியின் பெருமைகளை எவ்வளவு அழகாக எடுத்துரைத்துள்ளனர் என்பதை ஓரளவு கண்டோம். நாமும் திருப்பாவை ஜீயரின் திருவடி நிழலில் ஒதுங்கி, திருப்பாவையைத் தினமும் ஓதுவோம்! நப்பின்னைப் பிராட்டியின் புகழைப் பாடி, செங்கண் திருமுகத்துச் செல்வத் திருமாலால் எங்கும் திருவருள் பெற்று இன்புறுவோம்! வாழி எதிராசன்! வாழி எதிராசன்! வாழி எதிராசன்! மணவாள மாமுனியே இன்னுமொரு நூற்றாண்டிரும்!

---

நன்றிகள் பல!

பின்வரும் வலைத்தளங்கள் உயர்ந்த தகவல்களின் பெட்டகங்கள்! அவற்றின் மதிப்பிற்குரிய உரிமையாளர்களுக்கு அடியேனின் மனமார்ந்த நன்றிகள்! http://koyil.org/ http://www.acharya.org/wp/ https://velukkudidiscourses.com/ https://velukkudi.tv/stream/ பொலிக! பொலிக! பொலிக!

---